¹ Wakatanga kulayija kumbali kwegungwa, akale luvute lwabanhu lwakombunganila. Wakangina mubwato yakabeli mukati mwegungwa ekagala mukati mwalyo. Luvute lwabanhu lwakabeli kumbali kwegungwa. ² Wakabalayija zunu zunji muntojaniso, mukulayija kukwe, wakati kwabali. ³ "Whililani! Undimi wakenda kuzhe kunobyala imbeyu iye. ⁴ Paakabebyala, imwe imbeyu yakambwelela kumbali kwenzila, inyuni jikezha jikayilya. ⁵ Imwe mbeyu yakambwelela pamwala, kusijakabeli nonseche unji. Pakalepo zukamela, nokuti ayijakabelina unseche unomila. ⁶ Pakwakeja , zulimwa zwakapisa, nokuti azujakabelina miji, zwakakoma. ⁷ Imwe mbeyu yakambwelela , mukati mozulimwa zwemiwha. zulimwa zwemiwha zwakakubuka zukazwidyamija, azujakabhisa zuzwalwa. ⁸ Imwe mbeyu yakambwelela munseche mbuyanana ikabhisa zulimwa zwakabekubuka , zuwanda akale kuvunwa makumi matatu, makumi mashanu anakamwempela nezana." ⁹ Kova eti, "Unenzebe jokuwha, ngewhe!" ¹⁰ Wakati eliyega Jesu, bakabeli pelyo naye nabegumi linatubili bakombhuza nozwemitojaniso. ¹¹ Wakati kwabali, "Kunamwi mwakapiwa zulosisika zwobushe bwaMwali. Koga kunabo bokuzhe zose zunu mitojaniso, ¹² kuti bekabona, eya bekabona, koga abatobona, kutila kuti kana bekawha, eya bekawha, koga beleke kuwhisisa, nokuti bengashanduka Mwali ebalekelele." ¹³ Wakati kwabali, "Ani amutowhisisa untojaniso yoyu na?" Muchawhisisa chini imwe mitojaniso?" ¹⁴ Umbyali unobyala iwhi. ¹⁵ Yaba ndibo bayikokumbali kwenzila, kwakabyalwa iwhi. Kana bekawha, pakalepo Satani unozha esikobatolela iwhi lyabyalwa mwabali. ¹⁶ Yeyi ndiyo imbeyu yakabyalwa pamwala; yaba, bokuti kana bakawha iwhi banolitambula nolushanto. ¹⁷ Koga besina miji mukati mwabo, koga besungwala konshaji. Kana kushungulujwa nokusheteswa kwasika nokuda kwewhi, banombwela nokukambija. ¹⁸ Bamwe ndibo yabaya banonyalwa mumiwha. Ndibo banowha iwhi, ¹⁹ koga bedisisa zwenyika nokunyepela ifuma nezwilakamilo zokubamfumi ndizo zunojipa iwhi, zusizwale michelo. ²⁰ Yeyo yakabyalwa munseche umbhodo ndibi yabaya banowha iwhi, belitambule besikozwala michelo minji. ²¹ Jesu wakati kwabali, "Mosobiga mwenje mungumba kuti munowubiga munsangwa kana mudako lombheda? Mowunginisa musikombiga pechigalo chawo. ²² Nokuti akuna chakasisika chisinobhudila pachena, akale apana chilobwata chisinobhuda pachena. ²³ Kana unhu elinenzebe jokuwha, ngewhe!" ²⁴ Wakati kwabali, "Whisisani zwamunowha, nokuti inzila yawunota nayo nawi bachakutila alo, zunji zuchapamijwa kwauli. ²⁵ Nokuti unanazo, kuna iye uchapamijwa, nooyo usina, nozwa ana nazwo zwichatolwa." ²⁶ Wakati, "Bushe bwaMwali bunanga sonhu wakabyala imbeyu yiye munyika. ²⁷ Unolala busiku esikomuka masikati, imbeyu imele isikokubuka, koga atoziba kuti zunota chini. ²⁸ Inyika inozwala yoga zuzwalo: Kunotanga lupando, nzebe, kojobuya zulyo zwakakola munzebe. ²⁹ Kana zulyo zwayiva, unokambija kovuna nokuti unshaji unobaswika." ³⁰ Wakati akale, "Tingabukwejanisa neni bushe bwaMwali, ndichipi chitojaniso chatingashingisa kupandulula yozu? ³¹ Chinanga sembeyu yemastadi, inoti, kana yabyalwa, inhukutuku kupinda imbeyu jose jimomu munyika. ³² Koga, kana yabyalwa, inokubuka kupinda zose zulimwa zumomuchilili, akale zunota inhabi hulwana, kutila kuti inyuni jedenga jingata zuzhumbo muntuzi wayo." ³³ Nemitojaniso minji inanga seyi wakaleba mawhi kunayibo zunda nokuwhisisa kwabo, ³⁴ ajakabeleka chinhu kunayibo kusina ntojaniso. koga wakabeti kana eli ega, wakabepandulula kubalayijwa babe. ³⁵ Nelyo izhuba, Pakwakawaba busiku, wakati kwabali, "Andeni kunelimwe bhazu." ³⁶ Nezwo bakasiya luvute lwabanhu, betola Jesu benda naye, somwakabeli mubwato. Kwakabeli naamwe mabwato akabenda naye. ³⁷ Akale kwakaba nebhepo igulwana nobukali, akale indangwena yakabe ngwina mubwato zwakatisa kuti ivula ide kuzhala mubwato. ³⁸ Jesu emene elimubwato elilele munefo. Bakomusa, beti, ''Ndayiji, amuneshungu kuti tabulofa?" ³⁹ Wakamuka, ekakalalila ibhepo, ekati kugungwa, "Lunyalalo! Jikama!" Ibhepo lyakapela, kukaba nokuwhilijila.