¹ Wakabhuda pakalepo akenda kusha kunayibo, balayijwa babe bakontobela. ² Lyakati lyasika izhuba lyeSabata, Wakalayija muSinagoge. Banhu banji bakachenamiswa nechi chitiko. bakati, "Wakazuwana kupi yozu zwamulayija" "Ini zutondejelo yozu zwamuta namaboko awe?" ³ "Atobeli mbezhi na, mwana waMariya Unkulu waJakobe naJose naJudasi naSimoni? Bakazwaji babe atinanabo na yopano?" Bakalwajilwa kasa naJesu. ⁴ Jesu wakati kwabali, "Umpolofita atokujwa, kuzhe kokuti kusha kunayibo pabanu bokunayibo nokumakamu nokungumba kwabo." ⁵ Ajakatubula kuta mishingo mikulwana, kuzhe kokulapa banhu bashoma ebabhata namaboko awe. ⁶ Wakachenamiswa nokusodimbwa kwabo. Wakabhuda akenda kumizi elayija. ⁷ Wakashoba igumi nababili akatanga kubatuma mububili, ekebapa isimba pezhulu pemipepo mibi, ⁸ ekabayila kuti besinyamule chinu mulwendo lwabo, kuzhe kweswimbo_ besinyamule zokulya, zukwama, nemali mumabhanti abo_ ⁹ koga bembale imbatata, besimbale zunu zubili. ¹⁰ Wakati kwabali, "pose pamunobengwina mungumba, mugale kuswika pamuchabhudila. ¹¹ Kana bekalamba kumutambula nokumuwhilila muguta yeyo, mukabhuda yopo, mukuhumule inchena mumakumbo enu senzila yokupupula." ¹² Bakenda kunopupula kuti banhu balokwelela kushanduka. ¹³ Bakabhisa mipepo mibi inji, bekaguba bose bakabelwala namafuta bebachilisa. ¹⁴ Ishe Helodi wakawha yozu, nokuti izina lyaJesu lyakabazibikana. Bamwe bakabeti, "Johane umbhabhatizi wamuswa mubafi, ndizo elinamasimba okuta zuchenamiso . ¹⁵ Bamwe bakati, ndiEliya." Bamwebo bekati, "Umpolofita, somwe wabapolofita bantolo." ¹⁶ Koga Helodi pakati awha yozu wakati, "Johane, wandacheka nsholo, kuti wamuswa." ¹⁷ Nokuti Helodi wakabatuma banhu kuti benosunga Johane, wakabovalila muntolongo nokuda kwaHelodiyasi( unkaji wonkulu waFilipu), nokuti wakabondobola iye. ¹⁸ Nokuti Johane wakababuja Helodi kuti, azumo mumulawo kuti ulobole unkaji wonkulu uwo." ¹⁹ Koga Helodiyasi wakonyemela ekazubiga mundangalilo ekada kuti ebulayiwe, koga azujakabeta, ²⁰ nokuti Helodi bakabontya Johane; eziba kuti wakabeli unhu ulolulama akale elinchena, wakombhata zubhodo. Kunwhilila kwakompa lushanto lukulwana, nokudalo wakonwhisisa ekashanta. ²¹ Kwakaba nechibaka muzhuba Helodi lyakabepembelela izhuba lilye lyokuzwala kukwe wakashoba bakulwana nabatungamili bomuGalili kuti bezhopembelela naye nezo wakabambanyila zyokulya zwamadeko. ²² Nokudalo kwakezha mwana nsichana waHelodiyasi ekabazanila, wakashantisa Helodi nabo baakabelya nabo. Ishe bekati kunsichana, "Kumbila chili chose chawunoda ndichakupa." ²³ Wakakowa kuna iye eti, "Zose zwawuchandikumbila, ndichakupa, kuswika iganta lyobushe bwangu." ²⁴ Wakenda kunamai babe akati, "Ini zwadingakumbila?" Bakashandula beti, "Unsholo waJohani umbhabhatizi." ²⁵ Wakabwila nokukambija kuna she, ekakumbila, eti, "Ndoda mundipe , feno, unsholo waJohani umbhabhatizi mundilo ilotiwa nozukunyana." ²⁶ Koga yozu zwakapeshungu kunashe, achijakabelambika chikumbilo chiche nokuti wakabakowa mbeli kwabanhu wakabelya nabo. ²⁷ Nokudalo she wakatuma umpolisa wabakondinda ekolayila kuti ombuzile unsholo waJohani. Umpolisa wakafugama ekabhuda. Undindi wakenda ekanondumula unsholo muntolongo. ²⁸ Wakabuzwa unsholo mundilo bekompa nsichana, unsichana ekanopa mai babe. ²⁹ Bakati bawha yozu , balayijwa bakanotola umbili uwe bakonjika. ³⁰ Bapositoli bakashangana naJesu bakombuja zose zwabakata nozwabakalayija. ³¹ Wakati kwabali, "Bhudani nokwenu munde kulosisika munyetutuke konshaji." Nokuti banji bamungina benda, besinowhana nonshaji wokulya. ³² Nokudalo bakangwina mubwato bakenda kubugalo bulosisika beliboga. ³³ Akale bakababona bebhuda banhu banji bekabaziba, pamwempela bakalabukila kwakale namakumbo beva mumaguta ose, bekasika mbeli kwabo. ³⁴ Pabakabhuda mubwato , wakabona luvute lwabanhu ekebawhila ishe nokuti bakabeli semhwizi jisina uncheji. Wakatanga kubalayija zuzu zunji. ³⁵ Kwakati kwaswibha, balayijwa babe bakezha kuna iye bakati, "Yobu bugalo bulosisika akale kwaswibha . ³⁶ Batatamileni kutila kuti bende kunyika ipo pelyo nokumizi kuti benozutengela zokulya." ³⁷ Wakabashandula eti, "Bapeni zokulya." Bakati kwaali, " Tingenda na kunotenga zunkwa zwamadinali manji anokwana zana mbili tisikobapa belye?" ³⁸ Wakati kwabali, "Munazunkwa zungana? Indani munolinga." '""Pabakazwibala, bakati, Zunkwa zushanu nehove mbili." ³⁹ Wakalayila banhu kuti begale mubuhwa bunyolo beli mutukapo. ⁴⁰ Bakagala mutukapo twabanhu bamwe beli makumi mashanu bamwe zana. ⁴¹ Wakatola zunkwa zushanu nehobe mbili, ekalinga kudenga wakakombolela ekachimedula ekapa balayijwa babe kuti benopa banhu. Ekakobela banhu bose ihove mbili. ⁴² Bose bakalya kuswika baguta . ⁴³ Bakatola tusyepu twechinkwa, bekazhaja insangwa jinosika igumi notubili, notusyepu twehove. ⁴⁴ Kwakabeli nabanhu banosika zwiulu zwishanu. ^{45 46 47} Nokukambija wakabuja balayijwa babe kuti bengine mubwato kutila kuti bende mbeli kukwe kunelimwe bhazu, kunda kuBethsaida, iye echinotatamila luvute lwabanhu. Paakabhuda kuna ibo wakenda kudunhu kunonamata . Kwakati kwaba busiku, ibwato lyakababaphakati pegungwa waka ⁴⁸ Wakabona kuti bamushungulujwa nobuyambo, nebhepo. Kwakati kwaba busikuwakezha kwabali, ekwenda mugwegulu, wakabeda kubapinda panayibo. ⁴⁹ Koga pabakombona ekwenda mugungwa, bakabeti posa chipuku nokudalo bakalila , ⁵⁰ nokuti bakombona bekashushikana. nokukambija wakalebeleka nabo akati kwabali, "Simitijani! Musitye!" ⁵¹ Wakangina nabo mubwato, impepo likama. Bakachenama kasa. ⁵² Nokuti abajakabawhisisa kuti zunkwa zunolebani. Koga, mwoyo yabo yakabakakoma. ⁵³ Pabakataluka, kunelimwe bhazu, bakenda kuGenesaleti bekangwina munelimwe bwato. ⁵⁴ Pabakabhuda mubwato, banhu bakakimbija kumbona, ⁵⁵ bekalabuka mubugalo bekatanga kubuza banolwala kose kwabakewha kuti upo. ⁵⁶ Pakabengina mubugalo, mumaguta, nomunyika bakabebiga banolwala mumisika. bakonkumbilisisa kuti bebhate umpendelo wengubo iye, akale mubunji bwabo bakombhata bekachijwa.