¹ Pabakaswika muJelusalema, beli pelyo ne Bhetifegi ne Bhetani pedunhu lyeOliveti, Jesu wakatumila balayijwa babe babili ² akati kwabali, ''Indani peguta likoku nelimwe ibhazu pelyo nasu. Pamunongwina, muchawana kana kedonki kasanu kakathanwa. Mukasupule mukabuze kwandili. ³ Umwe akati kwamuli, 'Mumuzutilani yozu na?' munshandule muti, 'Ishe ndibo bamukada banolibwiliza nokukambija.'' ⁴ Bakabhuda bakenda kule bakawana kana keDonki kekasungililwa kuzhe kwenzila, bakakansupula. ⁵ Bamwe bakabelimile pelyo bakati kwabali, ''Mukumutani mukasupula kana keDonki? ⁶ Bakalebeleka nabo sokubujwa kwabo naJesu, banhu bakava babuja kuti bende. ⁷ Bakaseng akana kedonki kunaJesu bakaposela zumbalo zwabo pakali bakakagalila. ⁸ Banhu banji bakawala micheka yabo mumigwagwa, bamwe bakawala inhabi jabakabatema muminda. ⁹ Bakabekwendela mushule nabakabetobela bakabeshomeja beti, 'Hosana! Ulokombolelwa unozha muzina lyaShe. ¹⁰ Bulokombolelwa bushe bukumuzha natate bedu Davida! Hosana wopezhuluzhulu. ¹¹ Jesu wakangwina muJelusalema akapinda nomutempeli ekalinga zose. Feno unshaji wakabapela, wakenda kuBhetani nabalayijwa babe bali gumi nababili. ¹² Muchimuka pabaka bebhuda benda kuBhetani , wakabeli nezhala. ¹³ Elikule wakabona unti wonkuyu wakabeli namazhani, wakenda kuti kunobona kuti angawana unchelo pawuli, akawana pesina mazhani, nokuti awujakabeli unshaji wonkuyu. ¹⁴ Wakalebeleka nawo nkuyu eti '' Apana ucholya nchelo unovha kwawuli.'' ¹⁵ Bakezha kuJelusalema, akangwina mutempeli akabatatamila banotengesa nabanotenga. Wakapindimula matebuli abakabetengiselana imali nozugalo zwaabo bakabe tengesa inkwilimba. ¹⁶ Hajakavumila kuti unhu kuti enyamule chinhu chokutengesa mutempeli. ¹⁷ Wakabalayija eti, ''Azujilokwalwa na kuti, 'Ingumba yangu ichashobwa kuti ingumba yokunamata kunduji jose'?Asi mwaita ingumba yembavha.'' ¹⁸ Batebuji unkulwana nabakwali bakawha zwakabaleba, bakashaka inzila yokuti bempalaje. Bakabontya nokuti ibungano lyose lyakachenamiswa nendayijo jije. ¹⁹ Pakakwaba madeko, bakabhuda muguta. ²⁰ Pakabekwenda zwinganangwana, bakabona unti wonkuyu wakoma nemiji yose. ²¹ Petulo wakayeya akati, ''Ndayiji, linga! Unkuyu wamwakatuka wakoma.'' ²² Jesu wakabashandula eti, ''Bimbani kunaMwali. ²³ Chokomende ndinoti kwamuli kana umwe wenu eti kudunhu, 'Nyamuka uzuposele mugungwa,' esino kahajika mumwoyo mumwe koga edimbwa kuti zwaaleba zunotikana, ndizo zwichatiwa naMwali. ²⁴ Nokudalo ndinoti kwamuli: Zose zwamuno namatila nokukumbila, dimbwa kuti mwazutambula akale zunoba zuzo. ²⁵ Pawunoma unamata , unokwelela kulekelela bose, kutila kuti tate bedu bako kudenga banotilekelela zubi zwedu.'' ²⁶ Asi kana usino lekelela, tate bokudenga abatokulekelela. ²⁷ Bakabuya muJelusalema akale. Jesu ekwendela mutempeli, batebuji bakulwana,bakwali nabakulwana bakezha kunayiye. ²⁸ Bakati kwaali, '' Ngapi masimba uta yozu zunhu akale wakapiwa nani isimba lyokuti uzute?'' ²⁹ Jesu wakati kwabali , ''Ndomubhuza umbhuzo umwempela. Ndibujeni ndomubuja nami kuti masimba okuta zunhu yozu ndowawana kupi. ³⁰ Lubhabhatizo lwaJohane, lwakava kudenga kana kuti banhu na? Ndishanduleni'. ³¹ Bakalangana pakati pabo bekahabajana beti, ''Tingoti kuva kudenga', uchati, 'Ini musakadimbwa kwaali?' ³² Koga tingoti, 'Kuva kubanhu', ... .'' Bakabetya banhu, nokuti bose bakagutisika kuti Johane wakabeli mpolofitha.Bakanshandula Jesu bakati, ''Atitoziba.'' ³³ Jesu wakoti kwabali , ''Anditomubuja kuti masimba ndowawana kupi okuta yozu zunu.''