¹ Jesu wakabhuda kunobu bugalo akenda kuJudiya nokuseli kolwizi lunowhi Jolodani, lumbwembwembwe lwakezha kunayiye. Wakabalayija sonhu wakabatumwa kuzhodalo. ² Koga baFalisi bakezha kunayiye benkweja bakombhuza, ''Zupo pomulawu na kuti undume eshime unkaji uwe?'' ³ Wakashandula, ''Mozisi wakamulayilani na?'' ⁴ Ibo bakati, ''Mozisi wakavumija unhulume kuti ekwale chitupa chipo pomulawu chokulambana usikontatamila zo.'' ⁵ ''Yozu zwakavha mumwoyo yenu kuti wakakwala mulawu yoyu,'' Jesu wakati kwabali. ⁶ ''Koga kutanga kubumbwa, 'Mwali wakabumba unhulume nonhukaji.' ⁷ 'Nayozu unhulume uchabhuda kuna dade babe ende kunobhatana nonkaji uwe, ⁸ yaba babili bachaba nyma imwempela.' ⁹ Nayozu akale ndoti kunamwi zwashanganiswa naMwali, ngakusabe nonhu uchabapalajanisa.'' ¹⁰ Pabakabeli mungumba, balayijwa bakombhuza akale. ¹¹ Wakati kwabali, ''Unoshima unkaji uwe esikolobola umwe nhukaji unobeta bupombwe. ¹² Unhukaji engolamba ndume esikolobolwa nomwe, wata bupombwe akale.'' ¹³ Bakabuza bana babo batukutuku kunayiye kutila kuti ebabhatebo, koga balayijwa bakabajibisa. ¹⁴ Paakkazubona Jesu, wakanyema akati kwabali, ''Lekani bana batukutuku bezhe kunami, nokuti bushe bokudenga ndobwabo. ¹⁵ Chokomende ndoti kwawuli, yoyu uchaleka kutambula bushe bokudenga echili mwana hatono ngina kudenga.'' ¹⁶ Wakabatola bana akabanyamula ebabiga luboko lulwe ebakombolela. ¹⁷ Paakatanga lwendo lulwe. kunanhulume wakalabuka kunayiye akafugama akabhuza, ''Ndayiji ulolulama, ini zwandingate kuti ndilalame bupenyu businopela?'' ¹⁸ Jesu wakati, ''Ini mundishoba ndayiji ulolulama? Apana unhu ulolulama kuzhe kwaMwali oga. ¹⁹ Moyiziba milawu inegumi: 'Usubulaye, usute bupombwe, usukwibe, usunyepe, usuchengeje, kuja dade namayi babo.'' ²⁰ Unhulume akati, ''Ndayiji zose yozu zwalebwa ndakazutobeleja ntolo ndichino kubuka.'' ²¹ Jesu wakondinga akaba noludo kunayiye. Wakati kunayiye, ''Kune chinhu chimwempela chawusijimuta. Tengesa zunhu zose zwawunanazo upe kunabo banosheta, nayozo uchawana bushe kudenga. Wakaleba kunayiye akati, usikozha unditobele.'' ²² Koga unhulume yoyu nezwakalebwa wakashungulujika akabhuda akenda eline shungu, nokuti wakabeli chinoti elina zunhu zose. ²³ Jesu wakabalinga bose akati kuna balayijwa babe, ''Ini banhu balofuma beli nobulemu bokuti bengwine bushe bokudenga!'' ²⁴ Yaya mawhi akata kuti balayijwa bechename. Koga Jesu wakati kwabali, ''Bana, zukukutu chini kuti mungwine mubushe bwaMwali! ²⁵ Zulelu kuti ikamela lingwine mukazhisho kenaliti kunakuti umfumi engwine mubushe bwedenga.'' ²⁶ Zwakabachenamisa bakabhuzana boga beti, ''Nayozu ndiani uchachijwa?'' ²⁷ Jesu wakabalinga akati kunayibo, ''Nabanhu zunokonwa, koga naMwali zunota. Nokuti naMwali zose zunota.'' ²⁸ Petulo wakatanga kulebeleka naye eti, ''Linga, tasiya zunhu zose tikakutobela.'' ²⁹ Jesu wakati, ''Chokomende ndinoti kwawuli, akuna nhu wakasiya ingumba, banakwayina kana dade namayi nabana kana minda nokuda kwangu kana indebo mbuya ³⁰ uchotambula izana mukulalama kwabo: jingumba, banakwayina nabamayi kana bana neminda, kutongwa, munyika ichozha, nobupenyu businopela. ³¹ Koga yabo bako kumbeli bachaba mushule nabo nebo bokushule bachaba kumbeli.'' ³² Bakabeli munzila benda kuJelusalema, Jesu wakabekwendela kumbeli. Yozu zwakaba chenamisa balayijwa, nayabo bakabetobela.zwakabatyisa. Jesu wakatola begumi nabili akababuja zwatikana kunayiye. ³³ ''Lingani, timuthanisa tinda kuJerusalema, mwananhulumyana uchapilwa kubatebuji bakulwana nabakwali. Bachantongela lufu besiko mpilija kuluji lwamaJentali. ³⁴ Bachonseka , bemfile mate, benabhe, bembulaye, besiko mbulaya. Koga mushule mwamazhuba matatu uchamuka.'' ³⁵ Jakobe na Johani, bana baZebhediya, bakezha kunayiye bakati, ''Ndayiji, toda ute zunhu zose zwatichakumbila kuti utitile.'' ³⁶ Wakati kunayibo, Ini zwamunoda?'' ³⁷ Ibo bakati, ''Timukumbila kuti ugale nasu mubushe bwedenga, kuluboko lolulyi nolo kuchesho. ³⁸ Koga Jesu wakabashandula eti, Amutoziba zwamumukumbila. Munotubula kunwa munkombe wandichanwilwa kana kuti mubhabhatizwe nenzila yandaka bhabhatizwa nayo na? ³⁹ Ibo bakati kuyayiye, ''Totubula.'' Jesu akati kwabali, ''Unkombe wandichanwila, muchanwilabo, nokubhabhatizwa kwandichata, muchatiwabo. ⁴⁰ Koga uchagala kuluboko lokulya kana lwechesho atoba wangu kuti epiwe, asi kunayabo bakazubambila.'' ⁴¹ Pabakazuwa bamwe balayijwa banegumi bakati bakonyemela Jakobe na Johani. ⁴² Jesu wakabashoba akati, ''Yabo banowhi batongi babaJentali, banoso bakubukila, nabo bakulwana babo banosotonga nenzila ipo pezhulu. ⁴³ Asi ayitoba iyo nzila yamunota nayo pakati penu. Wose unoshubila bupenyu bubhodo unokwelela kutanga waba umwe wezushingi zuzo, ⁴⁴ nowunoda kuba wokutanga unokwelela kuba chishingi chabo bose. ⁴⁵ Mwana nhulumyana hajakezha kochijwa koga kochijisa, nokupa banhu bupenyu kushanganisila bose.'' ⁴⁶ Bakezha kuJericho. Ebhuda muJericho nabalayijwa babe nolumbwembwembwe lwabanhu, mwana nhulumyana waTimiyasi, Bhatimyasi, wakabeli chiphofu, wakabeligele kumbali nkogwagwa. ⁴⁷ Paakawa kuti ndiJesu uNazalena, wakabepinda wakatanga kushomeja akati, Jesu mwana waDavida, ndiwhile she!'' ⁴⁸ Banji bakondambija kuti eshomeje, beti umubazhoja ewhilijile. Koga wakalila kas eshomejela pezhulu, ''Mwana waDavida, ndiwhileni ishe!'' ⁴⁹ Jesu wakama akalayila kuti enoshobwa. Bakachishoba chiphofu, bakati, '' Usutye! Nyamuka! Jesu umukushoba.'' ⁵⁰ Wakalasha zumbalo, akalabuka, kuna Jesu. ⁵¹ Jesu wakanshandula akati, ''Ini zwawunoda ndikutile?'' Chiphofu chakati kunayiye, ''Ndayiji, ndimuda kuti nditubule kubona''. ⁵² Jesu wakati kunayiye, ''Inda. Kubimba kuko kwakuchijisa''. Pakalepo wakatanga kubona akale, akontobela.