¹ Mushule kwezwo Jesu wakatanga kubalayija nonkwejaniso, Wakati, " unhulume wakabyala unda wonzhambi, ekashosha lukuta, ekacha igodi lokuswinila. Wakabaka bushoshe ekakweletisa unda wonzhambi kubalimi bonda. Wakabhuda akenda mulwendo. ² Wakati waswika unshaji wokuvuna, wakatuma undanda kubalimi bonzhambi kuti enotola michelo munda wonzhambi. ³ Koga bakontola, bakondoba, bekombwiliza alo. ⁴ Akale wakabatumila umwe undanda, bekondwajisa munsholo bekonswabisa. ⁵ Wakatumila umwe bo, yoyu bakombulaya. Bakabhata bamwe balanda nenzila inokwendelana, bamwe bebaloba bamwe bebabulaya. ⁶ Wakabasala nonhu umwempela kuti ontume, unhulumyana uwe waanodisisa. Wakabeli wopejeleja kutumwa kwabali. Wakati, 'bachondemekeja mwananhulumyana wangu.' ⁷ " Koga balimi bonzhambi bakati kunomwe nomwe wabo, ' yoyu ndiye undyi wefuma. Izhani, tumbulaye, kuti ifuma ibeyedu.' ⁸ Bakombhata, bakombulaya, bekondashila kuzhe konda wonzhambi. ⁹ Nokudalo, mweni wonda wonzhambi uchata chini? Uchezha kopalaja balimi bonzhambi esikopa unda wonzhambi kunabamwe. ¹⁰ Amujakabala lukwalo na? 'Ibwe lyakalashwa nombaki ndilyo lyakaba ibwe lopechiswi. ¹¹ Yozu zwakava kunaShe, akale zunochenamisa mumesho edu."' ¹² Mushule mozu batungamili babJuda bakapota inzila jokunsunga Jesu nokuti bakaba bezwiziba kuti wakabelebeleka ekananga ibo. Koga bakatya igapo lyabanhu. Bakonsiya bekabhuda yopo. ¹³ Beva yopo bakatuma umwe wabaFalisi nabaHelodi kwaali kuti bombhate namawhi awe. ¹⁴ Pabakezha, bakati kwaali, Ndayiji, yozo zunoyeywa nabanhu amuneni nazo nokuti amutoshaluja. Munolayija inzila yaMwali. Zumo mumulawo na kulipa untelo kunaKesali kana pe? Tinolipa na kana pe?" ¹⁵ Koga Jesu wakabeziba kuchengeja kwabo wakati kwabali, " munondikwejelani biya? Buzani idineliyo kwandili ndiyibone." ¹⁶ Bakabuza limwempela kunaJesu. Wakati kwabali, " unkwejaniso yoyu nolukwalo yolu ngozwani?" Bakati Kwaali, "Ngezwa Kesali." ¹⁷ Jesu wakati kwabali, '' ipani Kesali zwaKesali, Mwali zwaMwali." Bakashamiswa naye. ¹⁸ BaSadusi , ibo banoti akuna kumuka kubafi bakenda kwaali. Bakombhuza, beti, ¹⁹ " Ndayiji, Mozisi wakatikwalila kuti, 'kana unkulu wonhu angopala esiya unkaji esina mwana, ununa elobole unkayi wonkulu uwe, esikokubusa bana bonkulu uwe.' ²⁰ Kwakaba kulipo bana bonhu beli bashanu notubili; wotanga wakalobola unhukaji, akafa esasiya bana. ²¹ Wabili wakontola naiye akafa, esasiya bana, nowatatu wakata alo. ²² Bashanu notubili abajakasiya bana. Kopejeleja, unhukaji wakafabo. ²³ Pabachamuswa kubafi, unoba unkaji wani pakati pabo? Nokuti bose bashanu notubili bakaba naye eli unkaji wabo." ²⁴ Jesu wakabashandula eti, " atobeli icho na chinangwa chokulashika kwenu, nokuti amutoziba iwhalo nchena kana isimba lyaMwali? ²⁵ Nokuti kana bamuswa kubafi, abatolobola kana kulobolwa, koga bananga seNhumwa kudenga. ²⁶ Koga mawililano nozwabakafa banomuswa, amujakabala lukwalo lwaMozisi, penyaya yeshango, kuti Mwali wakalebeleka kwaali eti, 'ndimi Mwali waAbhulahama naMwali waIsaka naMwali waJakobe'? ²⁷ Atobeli Mwali wabakafa, koga wabapenyu. Mulolashika kasa." ²⁸ Umwe wabakwali wakezha ekawha indebo jabo, wakabona kuti Jesu wonshandula zwibhodo. Wakabhuza eti, "nguupi mulawo ulokosha kupinda yose? ²⁹ Jesu wakashandula eti, "chilokosha ndicho yechi, 'iwhilila iwi Isirayeli, She Mwali wedu, ndiye She ega chete. ³⁰ Ida She Mwali uwo nomwoyo uwo wose, nendangalilo jijo jose, nesimba lilyo lyose.' ³¹ Mulawo wabili ndiwowu, 'ida umbakijani uwo sezwa unozwida iwi.' Akuna milawo mikulwana kupinda yeyi.'' ³² Unkwali wakati kwaali, " Ndayiji, mbuyanana! mwaleba ichokomende kuti Mwali umwempela, akuna umwe kuzhe kukwe. ³³ Ku uda iye nomwoyo wose nokuwhisisa kose, nesimba lyose, nokuda umbakijani uwo sozwa unozwida iwi zunopinda yose mipilo yokupiswa nemibhayilo." ³⁴ Jesu wakati ebona kuti washandula nobuchenjevu, wakati kwaali, "awiko kule nobushe bwaMwali." Mushule kozo akuna wakada kumbhuza mibhuzo. ^{35 36 37} Jesu wakati elayija muTempeli wakati, "bakwali banoleba chini kuti Khristo ndiye Mwananhulumyana waDavida? Davida emene ekazhajwa noMpepo uNchena , wakati, "She wakati kunaShe wangu, gala kululyi loluboko lwangu ndijine ndibige babengi babo mumakumbo awo."' Davida emene unonshoba kuti 'She,' iye Khristo engaba mwana waDavida chini?" Luvute lwabanhu bakonwhilila nolushanto. ³⁸ Mukulayija kukwe Jesu wakati, ''chenjelelani bakwali, banokwenda bekambala ingubo ndefu bemuswa mumisika, ³⁹ bebe nozugalo zulokosha mumaSinagoge nozubhula zupopezhulu pemiliya. ⁴⁰ Besikopalaja ingumba jenchilikaji, benamata minamato milefu kuti beyebwe nabanhu. Yaba banhulume bachapiwa undandu nkulwana. ⁴¹ Jesu wakagala pelyo nensangwa yokupila zupo mutempeli; ekalingisisa bakabeposa imali munsangwa. Bafumi bakabeposa imali inji kupinda bose. ⁴² Unchilikaji unsheti wakaposa masheleni mabili, anokwelana nepeni. ⁴³ Wakashoba balayijwa babe ekati kwabali, "Chokomende ndinoti kwamuli yoyu unchilikaji wapila zunji kupinda bose bapila munsangwa yozupo. ⁴⁴ Nokuti bose bapila mukuwana kwabo. Koga yoyu unchilikaji, mukusheta kukwe wapila imali iye yoseyabekwelela kulalama nayo."