¹ Məta əka ncyyaŋ nkyaŋ ənay ni, nsɨ di nukənnyyo uli tuza ka unyyib. Əŋwwad əka nsɨ tsa nfəg ni, ka ku swan naŋ əgwa kyo nyo, "Ghan bay əji nga twərag a kyaŋ əkwo tɨbay məta nkyaŋ ənay ni." ² Bə də ncuŋ, nsɨ shyyo bumi Ntswa, nsɨ ka ndi cug tyog əzo ə sag bumi tuza ka ni bə əyin ə nswan tuza ka. ³ Ətyə əwo nswan ni ə di naŋ Yasfa bə yakutu ni. Əsɨ byyo gajimale ə kərag ə bwwag cug tyog ji zo di naŋ gajimale zumurudu ə ni. ⁴ Əku byyo ntyog nswag nfyyaŋ bə ənay nio kərag ə bwwag cug tyog ji ni. +Ətad əyyi nswag nfyyaŋ bə ənay byo sɨ nswan tuza cug ntyog na. Basɨ kub jijyad +ətərog dunduŋ bɨ kub uzwwan +búŋ tyog shin zinariya bə pɨpyo ba ku. ⁵ Əmyəram say əsɨ wwud ə nyyo bə ncug tyog ji. Fitila natad byo ə sɨ say duyi cug tyog ji. Fitila ji izo yed +ntswa Əgwaza natad byo. ⁶ Duyi cug tyog ji, əsɨ nshyyo cen gilashi wo say naŋ Kərəw ni. Bə kəucyo cug tyog bɨ kərag bwwag ku, əsɨ mbyyo nkyaŋ sswan ənay byo shyyo əced ə byyo əyyi duswon bə məlyim ni. ⁷ Kyaŋ ced əkwo shyyo duswon ka ni idi naŋ əgwam uyid ni. Əfyyaŋ wu əsɨ di naŋ nyag zo ni. Ətad wu usɨ byyo uyyi ətyog kyo. Ənay wu əsɨ di naŋ əgwoŋ əzo furub ni. ⁸ Nkyaŋ nnwad unay əced na, kəkəb ba ə byyo nfyyeb utâ nio byo nhyad bə əyyi nyyo tuza tɨnad utag. Tutug bə tənwam ba byyo tswuŋ dag ə nyyo, "Ətyə Zɨzǝrag, Ətyə Zɨzərag, Ətyə Zɨzərag ə. Ngwo yed Ətyə Uli Əgwaza Nced kəkəb. Ngwo kə nshyyo, ngwo nini, ngwo bwo na bwwog ə bay." ⁹ Jen əzo nkyaŋ nwad əced na ŋwwo nŋwwad gu kyenkyay shi, ŋwwag shi, bɨ gway ətyə əwo əku swan tuza cug tyog ji ni, ngwo shyyo əced nyyo bɨ kay nnyyo tɨnad jen saŋ sɨsag. ¹⁰ +Ətag əyyi swag nfyyaŋ bə ənay ba, nɨ nad ətə kwa ətəgurub uyyi ba na əbyin duyi ətyə əwo swan tuza cug tyog ji ni. Ətyə əwo nswan bə ncug tyog ji ni, banɨ kwog gu ntoŋ wo shyyo əced tɨnad jen saŋ sɨsag. Basɨ taŋ uzwwan +buŋ tyog ba na duyi cug tyog ji ə mun ənnyo. ¹¹ "Ŋwan ə ntay bəd, Ətyə Uli zɨd u bə Əgwaza zɨd wu. San taŋ dɨdyeb zɨd ku, bə kyenkyay shi mbyyaŋ tyog. Dənian ŋgwon akyo bə əyin ka ə nwad kozaŋ nkyaŋ. Kyaŋ əkwo a cad ni kukwo əsɨ nwad mbyyaŋ nyyo, na nio nshyyo nini.