Kukwo nsɨ di alama əyyaŋ bumi tuza wo yed gbəndaŋ bɨ ti əyin cyyo kwod ni. Əbyyo +Ətəm ntswa natad dunduŋ bə zwod natad byo yed nŋhan zwod bani. Ba byo na yed ndyen Əgwaza na wo gwo na nyyo ə ŋan ni. Nsɨ di kyaŋ gud wurug kyo di naŋ cen gilashi wo ya əyyi ə hyyay bu loŋ ni. Ənied əbyo ə yoŋ ə tuŋ cen ku ni, ba byo yed əsɨba ya zwaŋ ji tuza ga kətug nzwag wu bə wuwwo gugwwug nkyaŋ shab agwaza ji ji mbyyaŋ tuza ləmba əkyo twərag əyorog guka ni. Basɨ byoŋ zunzwom əzo Əgwaza u kə joŋ ba ni. ³ Baku bwom əbwom Musa kyo, ŋgwon ntəm Əgwaza kyo bə əbwom Zwon Tsyyeb ji. "Shi bɨ ti əyin cyyo kwod kwo yed ətan ntə́m a ba, Ətyə Uli nced sələy. Saŋ əbun bə cucug byo yed ndwag a na gbəndaŋ Əgwam tuza kəkəb ənied əkag ba. Ənnyan ə bəd əna ŋway fəg uwun Ətyə Uli, gu əbə joŋ əyorog gu ka keŋkyay shi? Ŋwan ə bə əyin a ə di zɨzərag bəd. Kəkəb ənied +ukaraŋ na na bay bâ kwog ntoŋ duyi a ka dənian ntəm saŋ əbun a na ə byərag ə won ni." Məta nkyaŋ ənay ni nsɨ cyyaŋ, gbəndaŋ Uli Dyed Əgwaza u sɨ nyyib ulwo alfarwa kyo twərag gu tuza ni. ⁶ Nyyo dulwo əkyo sswag bə zɨzərag ku bumi gbəndaŋ Uli Dyeb Əgwaza ku, +Ətəm ntswa natad byo byoŋ zwod natad na ni sɨ bay. Basɨ kub zɨzərag +ətərəg nio byyo linen ya əyyi ni mbyyaŋ ə mun ə ləb ufoŋ zinariya bə nfɨrɨŋ bana. ⁷ Ənyyuŋ bə nkyaŋ nwad əced unay na sɨ ŋwwag +ətəm ntswa natad ba cicyo zinariya natad byo nhyad bə ndyen Əgwaza na əwo ə nshyyo nini tɨnad jen saŋ sɨsag ji. Gbəndaŋ Uli Dyeb Əgwaza u sɨ nhyad bə ncuŋ nio nyyo bə kyeŋkyay shi Əgwaza ji bɨ tyog gu ku. Əyin əsi may ŋwwo ku dag sənaŋ annobəy natad ənio nyyo bə +ətəm ntswa natad ba ə tyag ntəm bana ni.