Nsɨ cyyaŋ nsɨ di Zwon Tsyyeb ji yoŋ bə Əgan əfan Sihiyona ka. Dunduŋ bə ngu ənied ci kwob ci nswag nnay bə ənay byo əwa kə ndyurug əyorog guka bə əyorog Əcyo guka bə ukpəraŋ bana ni, əmun əyoŋ. Nsɨ fəg ga ŋwwad əyyaŋ ə nyyo tuza kyo swan naŋ səhwod ə́twoŋ kyaŋ cen ənio ntyoŋ naŋ tad nza ni. Əŋwwad əka nsɨ bwo nfəg ni kasɨ swan naŋ ənied tswod zunzwom ucwoŋ ə ntswod ni. ³ Basɨ bwom əbwom əfay duyi cug tyog ji mbyyaŋ duyi nkyaŋ nwad nnay əced na bə +ətad əyyi ba. Əyin əsɨ may gwô myyab əbwom əkyo dag sə bə ənied 144,000 byo əwa kə nsan nyyo ndyo bə dunio ku ni. Ba byo əkə gba lwam baku dɨ ŋway nyyo a shɨshɨg kɨ nyyo bə ənyyug. Baku gba əpyo ba dɨ swan zɨzərag dɨ shyyo gbaŋ dɨ nyyo shɨshɨg kɨ nyyo wu. Baku yed ənied əba hwi Zwon Tsyyeb ji kwo əji ə ji nnyyed. Ba byo əku san ə nyyo bə ənied swanta ba bâ ga yed utsa fway Əgwaza dənian Zwon Tsyyeb ka. ⁵ Bwoy əlyem sɨ nshyyo bu unuŋ bana dag. Basɨ yed ənied saŋ əbun duyi cug tyog Əgwaza ji. ⁶ Nsɨmo di ətəm ntswa əyyaŋ ə tyoŋ bumi kəucyo tutən tuza ka. Ngwo sɨ byoŋ tə̀m usham əlyyad saŋ sɨsag ji ə shey ənied əba swan bə dunio ku, bə kozaŋ ukəraŋ, ŋwab, əlyem bə ənied əba na fəg ni. ⁷ Əsɨ yoroŋ bə gbəndaŋ əŋwwad nyo, "Fəg uwun Əgwaza bɨ joŋ gu kyenkyay shi, jen fag əlyyad gu ji maŋ mbay. Kwog gu ntoŋ gu əwo nwad tuza bə əbyin bə a ncen mbyyaŋ nnan səhwod na ni." ⁸ Ətəm ntswa əfyyaŋ wu bwo əsɨ nhwi ə nyo, "Shwod kwa kwo, shwod kwa kwo, ŋwan gbəndaŋ Babila ə shwod əkwa. Ukəraŋ əkyo lyyen ənied ba bâ sswo əkan shɨshɨg kɨ nyyo dɨ yed +uləm əkwa shushog lwam ni." ⁹ Ətəm ntswa ətad wu bwo sɨ hwi ba bə gbəndaŋ əŋwwad ə nyo, "Kə əyin əsɨ kwog ga kətug nzwag wu ntoŋ bə wuwwo gugwwug shab agwaza əkyo twərag ji ni, əna san alama ji wu ukpəraŋ ka mbyyaŋ bwag gu ku. 0 Əbwo na sswo əkan hyoŋ sɨn ndyen Əgwaza u. Səhwod əkan nhyoŋ ənio əhyyay bɨ kyaŋ dag bumi ukuruŋ ndyen gu na ni. Ətyə əwo sswo na ni, əna sswo ubuŋ bəd bumi ndoŋ bə sulfur duyi zɨzərag +ətəm ntswa Əgwaza ba mbyyaŋ Zwon Tsyyeb ji. ¹¹ Ncuŋ ndoŋ sswo ubuŋ baku na ya nini tɨnad jen saŋ sɨsag. Də bâ na shyyo tswuŋ tutug bə tənwam dag. Bə ənied əbyo kwog ga kətug nzwag wu ntoŋ bə wuwwo gugwwug shab agwaza ji ji. ¹² Əji wu ə yed tɨlɨd ənied əbyo ə hwi dokoki Əgwaza ji bɨ ŋwwag tsswo baku bumi Yesu ni, byo yed zɨzərag ni bâ gba əpyo ba bɨ gbaŋ əlyo." 3 Nsɨ fəg əŋwwad ə nyyo tuza ə nyo, "lyurug kyaŋ əkwi ni! Əgway əna bwwo nkwom əna kwi bumi Ətyə Uli ni bə lɨbərka." Tswa ji sɨ nyo, "Î," "Dənian əka bâ ntswuŋ zwod nyyo ntəm ku ni,ətan ntəm bawu əna hwi ba." ¹⁴ Ncyyaŋ ulwo ka sɨ byyo jɨjyad ninian. Əyin naŋ Ŋgwon Ətyɨbɨshyi kyo nswan tuza ninian ka. Ə' ku kub uzwwad tyog zinariya əpyo gu ka mbyyaŋ lənji əwo əfad bəd ni bə mbwag gu ku. ¹⁵ Kukwo ətəm ntswa əyyaŋ əsɨ gud ə wurug nyyo bə gbəndaŋ Uli Dyeb Əgwaza ka bə əyoroŋ ətyə əwo swan tuza ninian ka ni bə gbəndaŋ əŋwwad nyo; "Kyag lənji wu â ŋwwo fway ku. Jen fway ji maŋ bay naŋ nkyaŋ fway dunio na kə mbyaŋ ni." 6 Kukwo gu ətyə əwo ə swan tuza ninian ka ni əsɨ ta lənji gu wu bə dunio ku, əsɨ nfway nkyaŋ dunio na. ¹⁷ Ətəm ntswa əyyaŋ əsɨ gud ə wurug bə gbəndaŋ Uli Dyeb Əgwaza ku bumi tuza ji, Əsɨ bwo byoŋ lənji əwo ya bəd ni. ¹⁸ Ətəm ntswa əyyaŋ bwo əsɨ gud ə wurug bə əgān fi turare ji wo byyo tyog tuza loŋ ku ni. Əsɨ yoroŋ ətyə əwo byoŋ lənji wo ya bəd ni bə gbəndaŋ əŋwwad. "Kyag lənji awu wo ya bəd ni â tuŋ nkyaŋ fway inabi na bə dunio ku, naŋ ji kə mbyaŋ ni." 9 Ətəm ntswa wu əsɨ ta lənji guwu bə dunio ku, əsɨ ntuŋ kəkəb inabi byo byaŋ ni bə dunio ku. Əsɨ jib na bumi gbəndaŋ taska ku dulwo shwi səhwod inabi shin ndyen Əgwaza na. ²⁰ Əku kpərag ulwo shwi səhwod inabi na də mənta ukəraŋ ka. Əswog əsɨ kɨ tyoŋ nyyo dulwo shwi səhwod inabi na wo ənad junjun ku naŋ linzami bə unuŋ tsay ni tɨnad mil ci kwob jyuŋ bə ci utâ.