Əsɨ joŋ n shan nnyyo ntəm bə nji naŋ shan may kyaŋ ni. Əsɨ tag n, "Dərəg yoŋ â mag gbəndaŋ Uli Dyeb Əgwaza ku bə əgán fi zənaŋ wu mbyyaŋ ənied əbyo dyeb Əgwaza u əzo ni. Əwod â yog mag unuŋ kənyyo tuŋ ulwo fag əlyyad bə gbəndaŋ Uli Dyeb Əgwaza ka, dənian əka əwa kə ŋwwag ənied əkag ba. Ba byo əna shay əbyyan zɨzərag umi ukəraŋ wu, zwad nswag nnay bə əfyyaŋ. ³ Nna ŋwwag ənied əfyyaŋ əbyo ə lyen ni, bana yoŋ ndyo bâ jen uswon ji nnwam ci kwob jyyuŋ bə cyi shwaŋ bə nswag utâ. Kub kyikyag ətərəg shin byyan tsswo." ⁴ Nkyaŋ nfyyaŋ ənio lyen n na kub n uma ni, na nio yed+ukwon ufad ufyyaŋ bə ulwo nswad fitila shwaŋ əna yoŋ duyi Ətyə Uli dunio wu ni. ⁵ Kə əyin əsɨ dam nyyo bǎ kətug, loŋ na wurug bə unuŋ bana bâ tyag bə +nəndwan baba kəkəb. Konyan ə cad ə nyyo ba kətug , tɨlɨd kwo ə hyay ba bə ndwag əkwi ni. ⁶ Ənied əfyyaŋ əba lyen ə yoŋ ndyo ni ə byyo ced dɨ nyim tuza ji ə yog ləw za də njen əzo, ba ntwərag əlyyad uswon ji. Ba byyo tyog bwwag +səhwod na ncyyo əswog, əwod bâ ŋwwag dunio ku kətug tuza sswo ubuŋ də njen əzo ba ncad ni. Jen əzo ba ntyag lyyad əlyyad kub uma na ni, kətug nyam əzo wwud bɨ byoŋ saŋ sɨsag ji ni, əna kwan zwaŋ bə mba. Əna ya zwaŋ ji ə hyay ba kəkəb. ⁸ Nkwom bana nâ myyan bə ndwag nyyed bumi gbəndaŋ ukəraŋ kyo uyed kidê Saduma bə Masar. Kwo twərag ulwo əkyo əku nkpaŋ Ətyə Uli zɨd wu bə ətyəm əhwu wu ni. Əna kyag nnwam ntad bə əkum, əyyaŋ əba nyyo bə kəkəb ənied ba, bə nŋwab, bə əlyem mbyyaŋ ənied əkag ba ba bay kɨ ya uswon dɨ cyyaŋ nkwom bana. Bana lag ə cyyo nkwom na bumi ndyag na. ¹⁰ Ənied əbyo ə swan bə dunio ku ni ənǎ gway bəd bɨ nyyo swoŋ ya bɨ swwo. Bana kɨ twoy bə əyyaŋ ba zənaŋ dənian əka ənied əlyyad əŋwwad Əgwaza əfyyaŋ əbyo əku ŋwwag ənied əba shyyo bə dunio ku ni zwod. ¹¹ "Əwod də məta nnwam ntad bə əkum, sswan sɨced əzo nyyo bə Əgwaza ənǎ ŋwwo ba bâ dərog ə yoŋ bə tɨtag ba ba. Uwun bəd na ya ənied əba di bani. ¹² Əwod bâ fəg gbəndaŋ əŋwwad əkyo nyyo tuza ni ə nyo bə mba, "Dərəg bay əji!" Sə bâ dərog bumi ninian ə nkad bumi tuza ka kwo na cyyo +nəndwan ba ba ə cyyaŋ nyyed baku ni. 3 Bumi tswam əzə, əzǒ ulwo ka nǎ shyyo gbəndaŋ tyɨrɨm əbyin wo əna cyyo cyyan unyyuŋ, bumi cyyan swag bə ukəraŋ əkyo una tyirɨb. Əwod ənied ci kwob natad byo əna kwi dənian tyɨrɨm əbyin ku. Əsɨba sɨ mbwad ə shyyo əced ni, əna tyɨrɨm lwam fəg uwun bəd, əwod bâ ŋwwag Əgwaza u kyənkyay shi. ¹⁴ Sswo ubuŋ əfyyaŋ wu ə sswag. Di la! Ətad sswo ubuŋ ətəbay bə də ncuŋ. ¹⁵ Kukwo ətəm ntswa natad wu əsɨ hyyab əgwa guka, ə lyyad bə gbəndaŋ əŋwwad bumi tuza ka ə nyo, "Cug tyog dunio ji nini yed cug tyog Ətyə Uli bə Kristi zɨd wu. Ngwô əna nyyo tyog ku nini tɨnad jen saŋ sɨsag." ¹⁶ Kukwo +ətad əyyi nswag nfyyaŋ bə ənay ba byo əswan bə ncug tyog bana ə myyan bə uyyi bana əbyin duyi Əgwaza ka. Ba sswó ubuŋ nyyo Əgwaza u sujada! 7 Ba nyo, "Zɨ taŋ a dɨdyeb Ətyə Uli Əgwaza kəkəb. Ŋwan əwo nshyyo nini, wo ku nshyyo nyyo bɨ kay nnyyo ni, dənian ŋwan ə kə nkyag ga nced awu kusɨ ncyyo əsɨ ngya uswon bɨ tyog ku tɨnad jen saŋ sɨsag ji." ¹⁸ Kəkəb bɨbyin ku əsɨ fog əkug, əwod ga ndyen awu əsɨ bay. Jen ji maŋ mbay zo əna fag əlyyad tuza ənied kukwi ba. Wo bwo əna nŋwwag nyin nnwan ntəm ənied əlyyad əŋwwad Əgwaza zaŋ ji ni. Mbyyaŋ kəkəb ənied ŋwwag cucug ba, bə əsɨba ə tswoŋ uwun əyorog nka di ŋwwag ka shi bə nswad baku ni, had bə əsɨba əku kyag ba kyaŋ ni dag bə əshin nced ba. Jen ji maŋ mbay zo əna nhyay ənied əba byyan dunio ku ni. 9 Kukwo gbəndaŋ Uli Əgwaza u bumi tuza ka əna nyyib əwod ə di kwati lɨkəwali gu wu bumi Uli Əgwaza ka. Sə ga mimyrəm say əsɨ gwud əwurug, bə rugugi bɨ nyyo tad nza, tyirɨm əbyin mbyyaŋ ga cəcəd nfaŋ tyyen.