¹ Ama moo, doom ina wessan paka go'num rəkrə paa. ² Doolezi yara mariya do̱o̱riyai ina gau mariya naa kamska zurai, iya zu'tiya ii ipu oomii, iya naa go'numai, naa gapta wessat, naa eska timr, gbaakaa oomik, naa buuka timr. ³ Ri'eri gəbən, doosən kitaki a do̱oriyai ina gau gapta wessat ni to̱o̱ kitaki ika gamnak naa kamska zur, ikana sukrə uripa. Ka' ina gau seni bo'ka maama inaabirəmrə pa, ina kubrusen ina wessan ⁴ nok sə ina geesə yanga kitaki sə ina gbaa yaari na yangiya ii. ⁵ Ina gèèsi sə ina gau ki'a naa sundumeya oomii, naa me̱̱e̱kai, iya gbaa gwaama iim sə i geesə yaariya íiyai. ina bo̱'rə rii nok paka Billək kanaa laask zok pa. ⁶ Ri'erizi gəbən weenrəsim yanga gbami ina gau naa kamska zur. ⁷ Ko andəya yiim zura mo̱o̱l ina kubrukarənnən, səgə a bo'rə ina zəman kubruskaa mookrə. ⁸ Doom paka wessak sə i bə'əskəna pak, nok sə ura kwee paz na gee dəksa zur, nok pu naa ina dook aarə paan pa. ⁹ Se̱ni ina kweesə dangwaniya ii pak ko andəya. Ina yagi zok, ikana sinkən naa ii pa. ¹⁰ Ikana ruuri una pa. Nok riik ina no̱o̱si sə ina esi gbi'kəm koo andəya tele, sə ina kamtə baksi kubruskənaa Bil kweebaaza aazəkrə. ¹¹ Nok go'numa Billəm gbotəpu marirə yas, geesaa ana mu'us gapta mairət naa neta dellət. ¹² Kubrusnaa ana mu'us neta go'pa dellet. Ana gau gapta wessa Billə mu'ut, zamanu a a pinnu azzə, ¹³ sə ana de'es timr kweeka sə'səmrə paa. Ublaa go'numa Daa aarə gbi'zazzəm naa kweebaaza aaz Yeeso rəm gbotkənakrə. ¹⁴ Yeeso esə zura ulləl nok aa səbo kweyaa bissə mu'ka tele, səbo yesaa mariy wessa we'ei bondəi, iya i təəgii, sə i le'eklen kamkpa tomsa wessassai. ¹⁵ Paggəm naa gbam sə a wengris neta at. Go'rəsum naa gbi'kəm tele. Kaa ii sə uza na bə'sa pa.