¹ Bulus se̱nza Billəz naa manzo a Yeeso kweebaazəz nok iya esə timr mariya Bil te̱e̱gii naa me̱e̱ka zəmak na iika gapta Billəttə te', ² naa iya i de'es timr zəngsa ɓampa Billəssəi, iya pag songb pai, bo'si alkawal diga zo̱o̱ra do̱o̱ləi. ³ Gbəttə paka ullə esə mina dook. N bo'rək naa dookaa Bil kweebaaza aazzək. ⁴ Rekarə Titus waza zəma eska timra aalləz, go'nəm naa gapta wessat diga Daa Billa aallə naa kweebaaza aaz Yeeso ura kweekaaz. ⁵ No̱ka riiki sə n daata Kariita no̱k sə a ɓams tomsa yiis zok pas, sə a te̱e̱gə do̱o̱ni dermeya gbi'ki airə ni n doosnak. ⁶ Doolezi Doonz na gau ura i doo ina go'pan ullə paa paz, Ya'za kiiz muzəz, naa yangiya wessai iya i də'ni ke̱e̱ku koo i kams zur pai pa. ⁷ To̱o̱ ton doonza iya i duu Bil airəz na gbi'kəma ulləm gbaaka gwaga Billəkrəm, na gau ura bo'rə ina go'pan paz. kana gau maza pag pagn zuk zukaz pa koo maza ɓəs baar paz. Kana gbakə suksa baaraz pas, ko bo'̱baaz, ko ro̱'baaz ko sutun baare. ⁸ Gobtəra ri'ik na gau maza kwe̱e̱ mara ginis, ura ii ina wessannaz. Na gau maza naa go̱'nummaz, maza naa sundumez, maza kams zuraz. ⁹ Maza kam paka i kubrusunuk ɗenɗennaz nok səna we̱ngrəs uri naa kubruskənaa wessak səna go'rəs iya mu'sui. ¹⁰ Nok iya i kwee pak pai ipu gənga, gon mariya i nabsapuirə te'ka pakrəma iim a zukammi. I səərə sə i yaas mari. ¹¹ Zəmazi i to̱o̱ton ro'kənarə nok i kubrusən ina to̱o̱ kubrəskənarə pan, not baksiya dəksa zulləz sə i gbans zeeu yas. ¹² Uza muzə iirə te'ka, ur maza naa ɓe'ruwazzi, doo bonge, "Kiraawai mariya i rumgbo songbeiyi, iya i lapu laatərai, do'neta go'pat, wo̱ri naa sutum baarei. ¹³ Paka eki pu wessa, nok riik go̱'rəsni sə i kinə eska timra wessal. ¹⁴ Kaa gən timra mo̱o̱l səiya Yahudaawairəirə koo dookaiya mariya i yesə gongaakum kurairə pa. ¹⁴ Kaa gən timra mo̱o̱l səiya Yahudaawairəirə koo dookaiya mariya i yesə gongaakum kurairə pa. ¹⁵ Iya ipu oomii, ko anya pu oomi. Ama iya ipu naa se̱'e̱m sə i esə timr pai ina oomin pii pa. Nok timteya ii naa sunduniya ii i laapu. ¹⁶ I pe' géé bo me̱e̱me̱n Bil, ama i sinnupu tomteya iirə. I duu ina doon pa. Ura tammən ina oomin iirən pii pa.