¹ Sundəsini ina noos gwani sə ina esi gbi'kəm, ina kweesi pak sə ina gau naa gbakska tok tomtiya wessairə paa yas. ² Sundəsimi ikana doorə koo mazpa, kaina sinkənpa, ina daa ko neya naduu ina goosun. ka ina noos zur marirə pa. ³ Nok aa bən do̱o̱, mariya naa sundume pai yi naa mariya i gee pak pai. A yaàpu bila, sə a gau se̱niya geeka tingnum naa ne̱ta dəlləttəi. A gau enkurə te'ka naa ze̱e̱sa. A me̱e̱kənpa sə a mu'uskən andə te'ka. ⁴ Ama go'numa Daa Billəm naa a kweebaaza aazzəm gbaaka ullək marirə paak na gbotə. ⁵ Nok tomtiya go̱'numrə a kamiiyi pa, ama nok yirkuwa ulləmmi sə kweyaa. Kweyaa neksəkaa dinkaa pəkkakrə, naa pə'kəma Rumsa Billəssəmrə. ⁶ Daa Bil kuutaa Rumsa ulləz gənga keesbaaza aaz Yeeso kweebaazə. ⁷ Bo'rə ri'erizi nok sə ikana zeesaa bispa go'numa ulləmrə, a gakp naa bagsa timr mariya i pe'ek ɓinta zəngsa ɓampassəi. ⁸ Paka ak kwesapu zok. N ii minge i doo paka ak naa gbam ne̱ta attə paa, nok iya i esə timr Billəi ina pe' kamkpa tomsa wessa ni gon Bil esni ina kamənnak. Neta at a wessatti, gəbən puna baksi marirə mu'ka yas. ⁹ Daan sənumma mə'əmrəm naa neta do̱ka do̱'o̱t naa suksa baar naa dinkənka dookairə paa. Ne̱ta eti pu zuk gəbən bagə una pa. ¹⁰ Mu'sən koo ne̱e̱ya ura kamtə markənka iirə te'kaz ina dinsupu to', də' mukə koo dən ittənə. ¹¹ Me̱e̱m mazzi keepu bilaa wessak, pu bo̱'o̱k hakkeirə sə wo̱'o̱s zura gwandəl. ¹² Mina tomtə Artimas ko Tikiikus mo̱o̱rə, gbatəm a okse Nikopoolis, ara n iin gakkpəna googakrə. ¹³ Tomtən Zinas ura le' zeeska bisaz naa gbaku, naa apoolos ni soou kamkpini unarə pak. ¹⁴ Doole mariya aai ina kubrə ni i kamkpən tomsa wessas sak, sə ina tok neta gbeei baarat ya' ina gau kotto pa. ¹⁵ Mariya epu yammai tele, ipu də'əskarə. Də'səm iya i gbaaa eska timləi. Go'nəm na gau naa ii yas.