¹ Sei malaikaa gbanaarəz piu poraa ullək. N og zosus katə diga billə paa rekarə dəllə te'. I esə zosuzzi mabudiya dura surundalləz. ² Gbe'rə dulli, sei yeem keetə diga dullirə naa gbindan ma'raa ra'rək. Ubla naa zaka i yerə wiikək no̱k yeema suptə dullirəm. ³ Yeemirə te' zaasi uri i keetə dəllə te', i essipu le'sum ni ta'sək dəllə te' yas. ⁴ I doosi bonge kaina ɓəs wo̱'os koo tè' uka dəllə te' pa sei mariya ipuna na'a Billəi tiilə pai kotto. ⁵ I esi bilaa ikkpa mariya eirək pa, ama ina ɓəsi baar haa se'er gbanaarə. Gombaa iirək gook ni a leez ta'an mazak. ⁶ Rua eirə mari i laak wərk ama i kink pa. I wink boka wər ama wərk noki ⁷ Zaasiiyi i goo ni pirmiya i go'rəsi no̱k ya'amai. Zu'a iirəi ipunaa una ni meetuwolla kangeerizak, gə muuma iim goopuni muuma marirəm. ⁸ Ipunaa suk ni suka kita ki'rəkak naa nu' ni nu'a kəirəiyak. ⁹ Ipunaa book gumrə ni booka weesək, gə do'kaa iirə beterək puni do'kaa pirmeya ya'amdə gənɲayak. ¹⁰ Ipunaa sallut naa dora ni ta'sik; iirə salluttə ipunaa le'suma ɓəska marirə baar haa se'er gbanaarə. ¹¹ Ipunaa malaikaa dura surundəllə ni gwanza iizak. Riira ulləl naa Yahudaawam uli Abaddon, naa Helinaawam boo uli Apoliyon. ¹² Ya'ama seenam assapu. Gwenəm! Sa'kaa ezirə neta ɓərka baalət ittərə piti zakrə. ¹³ Malaikaa bamburə piu poraa ullək, sei n gee gwera keetəkrə diga gulla bagadiya kangeerirəz Billə. ¹⁴ Gweraa rook doosə malaikaa bambus ezi ura naa poraz bonge, ''Fasum malaikaiya narkə iya i mayi wooma gbi'ka Efrettakrə.'' ¹⁵ Malaikaiya narkə ei i go'rəsapu zok zoolirə, ublaa ekirə, se' ekirə, i fasi no̱k ikkpa ina ar reeta marirəzan. ¹⁶ Dakaa soojaiya i dəg pirmei mu' mul zu' komna 200,000,000 zi. N gee dakaa iik. ¹⁷ Riizi n ogən pirmiya rooi miirə rudumrə naa iya dəgii. Booma iirə gumrən pu bimnun, wiinun wi', naa gə maa ruməm. Zu'a pirmiya rooirəm goo puni zu'a kəirəm gə iirə suttə ra' yeem naa yingbək keetə roo. ¹⁸ Ina ar reeta marirəzan iu zok naa neta taatə eti: ra', yeem, naa billa maama rumrəu a pu dookrət a keetə iirə su'rən. ¹⁹ No̱k le'suma pirmiyayirən pu gwanirə suttə, naa salluttə no̱k salluta iit puni bigag, gə ipu naa zu'a i ɓəsni mari na nogrəm. ²⁰ Mariya i seetəi iya netti iwi pai, gə i pu' na' tomteya i bo'rirə i pa, gə i daa nooska mai naa do̱'za kangeerirəz naa bile nattət pai neta ok ar pa, gee pak pat, koo rigə pat. ²¹ Koo i pu' na' diga ipkpa zullə pa, naa bo'ka langsi, naa tomteya kima ki'rəm naa bilutta ruurət pa.