¹ Sei n og malaika uza gbi'zəz tiitəkrə diga billə paa. Ɓundusaa zok kolirə te', gə dura geps pu ullə paa. Muuga ullək puni ublak, gə dənta ullət de'səza ra'rəzak. ² Kam waa rababaaza gbe'rapu zokaz ullə na'rə sə de'es də go'naa ullək gbənarə paa, də ukii ullək boo buttə paa. ³ Sei woo su' paari ni kəəz go'nak. De woo su'ki pipsiya gbansa ai i guutə naa gwera iik. ⁴ Zoka pipsiya gbansa ei i woon su' n biik dera, ama n gee gwera uka diga billə paa bonge, ''sumsum ina pipsiya gbansa ai i doon. Kaa bii pa.'' ⁵ Malaika n ogu de'narə gbənarə naa buttə diiz təg na' go'naa ullək billə paa. ⁶ Sə gba'tum naa ura gau ting ting az, ura wom billa paal naa dəl naa ina pu iirə te'enaz, naa gbəna naa ina pu te'en, sei malaikaazi doo bonge, ''Lo'ka piik pa. ⁷ Ama ublaa malaikaa gbansas pipkpən poraz, ina məsumdə Billə yi'ik ni doosən seniya ulləi anabaawaiyak.'' ⁸ Gwera n gee diga billə paa eki doose gəbən bonge, ''Rem, pe'em rababaaza gbe'rənza malaikaa de' gbənarə naa buttə paa ezirə na'rəz.'' ⁹ Sei n ree malaikaa roozə sə n doosu na ese waa rababaazi. Doose bonge, ''Kweem rababaazi sə a təwu. Yerk baara mool zokra, ama tink ni wosik moorə su'rə.'' ¹⁰ N pe' waa rababaazi diga malaikaazirə na'rə sə n təpsu. ting ni wosik miirə su'rə ama de n təpsu baara miil yer zokra. ¹¹ Sei gwera ula doose bonge, ''Doolezi a dook ina bo'rumkpan marirə, dərme, me'te, naa gwanirə paa.''