¹ I esəpu gbala mina kamən toms naa ur, ni gbalaa riika nettək. I doose bonge, ''Ruum a riitə gwaaga Billək naa bagadi, naa mariya i noos rooi. ² Ama kaa rii ara gokak gwaaga Billəkrə pa no̱k i essəpu menki, i digdəsək dəlla oomil haa se'er komna naa ittərət. ³ N esək seedaakuiya mii ittəkə, gbi'kum ina doo ina bo'rumkpan ru' 1,260 i tə'ək basa yalun.'' ⁴ Seedaakuiya ai uyi teta zaitun dət ittərə naa gəbən de'enza fitilai ittəkəi a ipu de'narə Daa dəllə roozo mu'. ⁵ Uza yaani ɓəska baar, ra' keetək iirə su'rə sə wo'os keeriya ii. Kala maza yaani ɓəska baaraz i ipkpə bilaa akrə. ⁶ Seedaakuiya ei ipunaa gbi'kuma i gbe'eskən ara paak no̱k maam kana zaapa zoora ipu dookən ina bo'rumkpan dən. Ipunaa gbi'kuma i yerkən maam sə gəə kwaalal sə gəbən ika kamtə ɓasu zoora go'sizzə. ⁷ Ina ɓamsapu seedaakuma iirəm, do̱'neta keetə dullə roo zaa gwaak ya'am naa ii. Le'eski sə ipsiki tele. ⁸ Zongna iik kisək bilarə dəlla gbi'lallə (uki ara i der Sodom naa Masar ak) ara i ɓaan Dangwanza iizak. ⁹ Ru taare naa reeta ii uri diga marirə te' ɓa'te, naa me'te somaso', naa dərmeya i og wəngna iik. I iik sə i tosi gaggəllə pa. ¹⁰ Iya i gau dəlləi zok yaki iirə paa haa i bo'rək naas. Haa i tomrə esək gwanirə te'ka no̱k anabaawaiya ittəkəi i ɓəs mariya i gau dəlləi baar ai. ¹¹ Ama sa'kaa ru' taarəkə naa topai ənsəma Billəm toskirə, i ruuk sə i de' naa dənta iit. Sera gbi'lal kamkp iya i ogii. ¹² Sə i geek gwera gbi'lal billə paa dooski bonge, ''Zan paa aari!'' Sə i usuk paari kolirə te'ka, sə gə keeriya iirəi okirə. ¹³ Zoora elirə but lamrək wessa we', sə ar uka dəllirə wo̱'sək. Mari mul gbansa i wərk lamrəka dəllə elirə, mariya i seei boo no̱k ser kamnd i noosək Billa paal. ¹⁴ Ɓərka baara ittənən assapu. Gwenən! Ɓərka baara taaləl; pu zakrə ya'. ¹⁵ Sei malaikaa gbansas piu pora ullək, sei gee gwera gbi'kak pagrə billə paa dookrə bonge, ''Gwanta dəllət yerpu gwanta Daa aaz naa Kweebaaza ulləzzə. Ura kisək gwant diga ri'akat ting ting.'' ¹⁶ Sei dooniya zur naa narkəi iya i gau teng gwansa Billəssə mu' buu muuma iim dii sə i noos Bil. ¹⁷ I doo bonge, ''E iisa useeko, Daa Billa naa Gbi'kumaz, ura pii wonkaz naa gə ura pii ninkas, nok a pe'sapu gbi'kuma moom sə a ma' kiska gwant. Ura kissə gwans koo andəya tele, ura pii wonkaz naa ura pii ninkaz gə ura zakaz. ¹⁸ Dərmei baar goomi, ama suksa baara mool zaapu. Zoor zaapu ara zeeskən roobai bissək naa gə faasuka seniya anabawai, naa iya i esə timrai, naa iya serum riira mool ai, iya zuk ai naa iya naa gbamai. Zoor zaapu ara a wo̱'sək iya wo̱'os dəllai.'' ¹⁹ Sei gwaaga Billə paak gbe'rə zok akwatiya alkawalləz og zok gwaaga Billəkrə. Sei oosa sekəm ak gbe'tə, sə pipsəs i do'rə, sə but lamrə, naa talwiya gbi'kiyai i kadətə.