¹ I og alama uza gbi'zi billə paa: kita kiiz uza ɓundus zoka ullək naa ubla, naa se' raasa gwandə dəntə dii, naa meetuwolla zosi komna naa ittəkəi gwandə zullə. ² Punaa baar pu go'okrə nok gomta baar, gəbən ar dingtə, ³ Gə alama uza yii zok billə paa: Gwenəm! Sei gbama biksa bimnan naa zut gbansa na gə guri komna, gə punaa meetuwol gbansa ullə zullə. ⁴ Sallaa ullək boo poupu dii naa salusiya zosiya paarii haa ɗongti dəllə roo. Gbama biksa rooz pu de'narə popsa naa kita kiiza yaan dingt ezi, nok səna dingtənak sə bo təps waza ullə dingus. ⁵ Sei ding waz, waza ya'zaz, ura gakp gwant dərmerə tele naa gbalaa te' weesak. I kweerə waza ulləz rekarə teng gwansa Billəssə, ⁶ sei kita kiizi nog doolə roo, ara Bil kwe' gusəkrə, nok i gbaaku aa eri ru' 1,260. ⁷ Ri'ak ya'am ruutə diga billə paari, malaika Mikailu i gwaa naa doora gbama biksa esi; sei gbama biksa esi naa malaikaiya ullə i gwaa. ⁸ Ama gbama biksa rooz punaa gbam wessa sə le'sukənak pa. Noka ri'ik ur naa malaikaiya ullə i kinə ar billə paa pa. ⁹ Doora gbama biksa esi, biksa do̱o̱z ura der seetan az, ura səərə dəl yas az i ɗongsu dəllə roo gwan naa malaikaiya ulləi tele. ¹⁰ Sei n gee gweera gbi'kak billə paa: ''Ri'ak kweeka zaapu naa gbi'kum, naa gwanta aarə Billəm, naa gbi'kuma Kweebaazəm. nok ura ribdə uriyangiya aai ɗongspu zok dii, ura ribdi tuks naa ublaa Daa Billa aalə mu'. ¹¹ I le'su naa kwaala Waa ma'zək nok paka iirə naa seeidaamak, nok i gbaa zəngsa iis haa wərkrə pa. ¹² Noka ri'ik zok naa yagən moo iya billə paai, iya i gau rooi. Ama ina yirkurənni iya ipu dəlləi naa gbəna, nok seetan tiitəpu iirə. Punaa suksa baara gbi'lal, nok me̱e̱men zoora ullə seetuz pu topa ¹³ De gbama iksa esi me̱e̱sapu i ɗongsupu dəllə roo, sei nengə kita kiiza ding waa yara maz ezi. ¹⁴ Ama i esə kita kiizi bente ittəkə a gbi'kiya naa gbakui nok səna usə rekarə ara i go'su doolə roo. Ara eki ki gbaanuk wakate muzorə, zoor gənɲa naa zoor topa woonzuz diga biksirə muugrə. ¹⁵ Biksa roos wim maam gwandə su'rə ni womak, nok sə maami naa wo̱'su. Ama dəl po' kita kiizi. ¹⁶ Dəl gbe'rə su'a ullək sə bo'os womaa gbama biksa roos wim gwandə su'rəm. ¹⁷ Sei gbama biksi baar go'mu wessawe' naa kita kiizi sə rigə go'ok ya'am naa zeeuwa ullət, iya ipu duuk dookaiya Billəi rəi sə gə i kam kan seeidaama Yeeso rəm. ¹⁸ Sei gbama biksi de' buttə pou gbənarə.