¹ Sa'kaa ezirə n og malaikai narkə de'narə ka'seya dəlləirə, i kamsapu zakaa dəllək naa gbam no̱k bo'ta zaka gwaa dəllə, koo gbənarə, koo té' ukarə paa. ² N og malaikaa uza zakrə diga dii punaa ina Billa gawal budusan. Wootə su' naa gwera paari rekarə malaikai narkə i esi bila ina bis dəl naa gbəna: ³ ''Kai bis dəl, gbəna, koo tet pa sei mina gapsəpu seniya Billəi na' ti'teya iirə zanga.'' ⁴ Naa gə dakaa iya gapsi na'ai: Mu' zu' gbansa naa narkəi 144,000, iya i bi'si diga meela mariya Israilairəi: ⁵ mu' komna naa ittəkəi diga meela Yahudarəllə i gapsi na', mu' komna naa ittəkəi diga meela Rabinurəllə, mu' komna naa ittəkəi diga meela Gaddəllə, ⁶ mu' komna naa ittəkəi diga meela Asharəllə, mu' komna naa ittəkəi diga meela Naptaalirəllə, mu' komna naa ittəkəi diga meela Manaasarəllə. ⁷ mu' komna naa ittəkəi diga meela Simandəllə, mu' komna naa ittəkəi diga meela Leevirəllə, mu' komna naa ittəkəi diga meela Isaakarəllə, ⁸ mu' komna naa ittəkəi diga meela Zabuluunarəllə, mu' komna naa ittəkəi diga meela Yusufurəllə, naa mu' komna naa ittəkəi diga meela Benjamindəllə i gapi na'. ⁹ Sa'kaa nettirəz n og doora bansa mariya maz ka le' ge'ki pai diga dərme, me'te, naa mari somaso' ipu de'narə teng gwantirə naa Waa ma'aza mu'. I təsapu yaluna bunnan sə i kam daləta té' dibinorək iirə nattə, ¹⁰ ipu derk su'rə naa gwera paari bonge, ''Keeska a Billa aali ura gau teng gwantəz naa gə Waa Ma'az!'' ¹¹ Malaikai tele naa dooniya ipu de'narə keer naa teng gwanti yas naa do̱' neta nattə eti i buu buttə dii ura gau teng gwantəzzə mu' sə i noos Bil, ¹² bonge, ''Na gau ri'! Nooska, le'sum, me̱e̱ka, useeko, gbi'kəm, le'ka naa gbam naa gau Billa aalə ting ting! Na gau ri'!'' ¹³ Sei uzo dooniya eirə te' dese bonge, ''Iya paiyi i tə' yaluna bunnan aiya, gə i keetə araya?'' ¹⁴ N doosu minge, ''Bil na zo'a, a me̱e̱men,'' sei doose bonge, ''Iiyi iya i keetə ɓərka baara gbi'lalləi. I dəpsapu yaluna iin sə i yeri buriyi naa kwaala Waa ma'azəz. ¹⁵ Noka ekiki ipu de'narə pou teng gwanta Billəttə, sə i noosu tuks naa ubla gwandə gwa'. Ura pu gamnarə teng gwantə paaz bo'siki nuur. ¹⁶ I geek wo̱du koo ɓəngba es pa. Ubla ma'ki pa koo ma'ra uka pa. ¹⁷ No̱k Waa ma'aza teng gwantə te' al gakp neebaaza iiz, sə neei ara dura maamrəkrə, sə Bil ra'sək meema iirə no'rəm.''