¹ N gwen zoora Waa Ma'az gbe'rən ina budus rababaaza munən, n gee muzo do̱'neta nattə etirə dookrə naa gwera do' ni pipsəzak paari bonge, ''Zam!'' ² N gwen, pirmus usa pi buzzəz. Ura dəguz kam taau sə i esu meetuwol. Keetə ni daa ya'alak no̱k səna le'es ar. ³ De Waa Ma'az gbe'rətə ina budus zok a ittənən, n gee do̱' ina ittəzən doo bonge, ''Zam!'' ⁴ Sei pirmus usa keetə bibzəz ura dəgus i esu bila na pe'es gabta wessat dəllə te' no̱k sə mari ina ipkpən. I esə ura dəgus fonkaaz gbi'zəz ⁵ De Waa Ma'azi gbe'rətə ina budus zok taanən, n gee do̱' ina taazan doo bonge, ''Zam!'' N og pirmusa wiisas gə ura dəgus kam ina riikarən riikarən ullə na'rə. ⁶ N gee ina goo ni gwera do̱' ikna nazzən dookrə bonge, ''Kooniksa alkamarəz sule muzo, naa gə kooniksiya buroodirəi taarəkə i gakp sule muzo. Ama kaa pog waak naa maama inabi pa.'' ⁷ De Waa Ma'azi gbe'rə ina budus zok nazzək n gee gwera do̱' ina naazzən doo bonge, ''Zam!'' ⁸ Sei n og pirmusa waas. Ura dəgus i deru wərk gə hades uzi gbo'u. I essipu bila naa le'sum dəllə yas ina iu mari naa fonkaaza kunurəz naa wo̱du, naa do̱' neta pu dəllə root. ⁹ De Waa Ma'az gbe'rə ina budus zok gbanaazan n og zəngsa iya i iwi no̱k paka Billəkai naa seedakuma i dognim bagadirə dii. ¹⁰ I go' naa gwera gbi'kak paari bonge, ''Haa bənnaziya Gwanza ees moowa naa zəma oomiz, sei mona zeesapu iya i gau dəlləi sei mona gəəse kwaala eel ya?'' ¹¹ Kai koo neeya iirə te' i esu yaluwa buwwau, gə i doosi bonge ina zo' topa sei dakaa doomei seniya ii naa uriyangiya iirə yariyai naa kita ki'kiyai na kintə iya i ipkpi ni i ipni iik. ¹² De Waa Ma'az gbe'rətə ina i budus zok bambuzan, n og yakaa buttək gbi'kak pii. Ubla yer wiikək ni yaluwa riiurəwak, gə se' raasa yer ni kwaalak. ¹³ Zosiya billə paai i kadətə dəllə te' ni rum reksən yangiya ullləi gittək zaka naa gwaatə gə. ¹⁴ Ara billə paak lips ni rababaaza i koosuzak. Kala yiig naa buta maamdə te'et es ara piinnakrə. ¹⁵ Sei gwaniya dəlləi naa mariya wessai, naa dooniya soojairəi naa iya naa zaudii, naa iya naa le'eskai naa koo neeya senz naa ura senzi paz i wo̱o̱ gbonɓirə naa gbakseya yiimrək. ¹⁶ I doosə yiim naa gbakse, ''Gbə'mee! Sumsumee ur gau teng gwantəzzə mu' naa suksa baara Waa ma'zəz amrə. ¹⁷ No̱k ublaa gbi'ka iirə suksa baalə rektəpu neezi le'ek de'ka ya?''