¹ Sei n og na' go'naa ura gau teng gwantə ezirə rababaaz bii zok sa' naa mu' gbangnarə. Bodus zok naa koosna gbansa. ² N og malaikaa naa le'sumaz dookrə naa gbam bonge, ''Neezi reksapu sə gbe'rək rababaaza az sə ka'as ina budəs zokanya?'' ³ Koo uza billə paa koo dəllə te' le' sə gbe'rə rababaazi koo zangu pa. ⁴ N og haa no̱k ura kin zok reksapu gbe'rukarə koo zangukurəz pii pa. ⁵ Ama muzo dooniya eirə te' doose bonge, ''Kaa go' pa. Gwenum! Kəəza meela Yahuudas, yiisuka Daudarək le'suz. Uzi le' sə gbe'rə rababaazi naa ina budəs gbansan.'' ⁶ Teng gwanti naa do̱' netta nattə etirə naa dooniya eirə te', n og Ma ya'al de'narə go̱o̱ ni ipsapu zokak. Punaa gur gbansa, naa no' gbansa iiyi rumsa Billə gbansa tom zok dəllə te' yas. ⁷ Ree kwee rababaazi na' go'naa ura pu gamnarə teng gwantə paa ezirə. ⁸ Zoka kween rababaazik, do̱' neta nattə eti naa dooniya zur naa narkə eyi i buu buttə dii Waa ma'zirə mu'. Koo neeya iirə te' punaa gbank naa urdiya yi' taasauwaz, uzi weerəka Billa iya i esə timrairəi. ⁹ I zin gella pəllal: ''A reksapu pe'ka rababaazirə sə a gbe'rə ina i budənan. No̱k i de'sa naa kwaala mondəl a yipsəpu Bil mari diga kala meel, pak, mari naa dərme. ¹⁰ A bo'risipu dəl gwant naa firissiya i duu Billa aalai, gə i gakp gwant dəllə roo.'' ¹¹ Sei n gwen sə n gee dookaa malaikai gənɲairək keer naa teng gwanti dakaa iik mu' zu' komna naa gə do̱' netti naa do̱o̱ni dakaa iik mu' zu' komna naa zu' komna. ¹² I doo naa gweraa gbi'kak bonge, ''Ura reksazzi Waa ma'az ɗe'es zokal sə kwee gbi'kəm, zaudi, me̱e̱ka, naa le'sum, go'num naa nooska.'' ¹³ N gee kala ina wom zok pu billə paa naa dəllə te' naa gbənarə te'en dookrə bonge, ''Nooska le'sum, naa go'num naa gbi'kəma gwantəm na gau ura pu gaptə teng gwantəz naa Waa ma'az ting ting. ¹⁴ Do̱ netta nattə eti i doo bonge, ''Na gau ri'!'' Sə dooniya ei i buu dii sə i noosu.