¹ De neta at as, n gwen, n og sugogna gbe'rumpu billə paa. Gweraa n see geekak pagne ni porak, doose bonge, ''Zam paa ari, N yiiska ina bo'rumkpa neta at naa as gə.'' ² Ni umkpa norak npu Rumsə sə n og teng gwans billə paa naa uza gaptə paa. ³ Ura gau paa ezi goo ni yaspa naa yakutuk. Duragəpz duza ko'oz teng gwanti. Duragəbəza rooz go̱o̱ zumurudu. ⁴ Keer naa teng gwanti teng gwant zur naa narkə i ko'os, gə iya i gau paai iiyi do̱o̱ni zur naa narkəi iya i tə yaləna bunnannai, naa meetuwolla kangeerirəz zuttə. ⁵ Ra'a veklək naa gweera ni pipsəzak keetə teng gwantirə. Fitilai gbansa ipu kweekrə teng gwantirə mu', fitilaiya gbansa ei rumsa Billəs gbansazi ⁶ Gəbən teng gwantirə mu' gbəna pii ookapa seka ni kiristallak. Keer naa teng gwanti do̱'net uta nattə yi' naa no' sa' na mu'. ⁷ Do̱' ina seenan go̱o̱ puni kəəzak, do̱'ina ittəzan go̱o̱ puni negəzak, a taanan punaa muug ni mazak, gə do̱' ina nazan puni vaaluwa usəzak. ⁸ Do̱' ina narkə eyi ii yas ipunaa bente bamrə ba', naa no paa naa dii. tuks naa ubla i dàà dooka bonge, ''Oomo, oomi, oomi uzi Daa Billa naa Gbi'kəmas uzi do̱o̱, uzi ri'ak, uzi gətək gəbən.'' ⁹ Koo bənaya do̱' netti i esə gbi'kəm naa noosək, səna iisə ura pu gamnarə teng gwantirə useeko, ura gau ting ting az, ¹⁰ dooniya zur naa narkə eyi i buu dii ura tengsə ezirə mu'. I gu' ura gau teng gwantirəzzə sə i ɗongs meetuwolla ii ullə teng gwantə mu' sə i doo bonge, ¹¹ ''Moowa a reksazzi, Daa eez naa Billa eel, kweem gbi'kəm naa noosək naa le'sum. No̱k a wom koo anya, naa iika mook sə i gau sə i wom zok.''