¹ Sei n og malaika tiitəkrə diga billə paari. Punaa mabuuɗiya dura surka ullək kespallə naa sargai gwande na'rə. ² Sə kam diraagon do̱ga biksa esi, a uzi seetan koo ibilisaz sə dogu wi' mul. ³ Ko̱su dura surkaa ullək kəsəpa elirə roo, sə gbe'e̱s sə ɓóms. Nok sə kana gəə səərək marirə pa, sei wi'a mullai ina assapu. Sa'kaa roozə doolezi i fasku wa bəlla topallə. ⁴ Gə n og ting gwani. Iya i gau paai iiyi iya i essipu iikomma ze̱e̱ska bissəmai. Sə gə n og zəngsa iya i gəpdəs zu'teya ii nok seedaakuma Yeesorəm naa paka Billəkai. Iya i mu'us noosəka do̱' inni, naa goosa ulləs naa kweeka alama iirə tiilə naa iirə na'rəi. I gəə i ruutə naa zengs sə i gau gwant naa kweebaaz wi' mul. ⁵ Wərkiya i seei i we̱e̱tə pa haa sei wi'a mul eyi ina as. Anni ruukaa robaamre se̱e̱nkak. ⁶ Ura naa sə'səmazzi naa oomizzi ura kinə torka ruukaa roobaamrə se̱e̱nəmamaz. Wərka gbo'tikək punaa gbam iya ri'eyirə paa pa. I yerək firisssiya Billəi naa a kweebaazəi sə i gau gwant naa kweebaaz wi' mul. ⁷ Wi'a mul eyi ina ɓampu, i fattək seetan diga pursina ulləzzə. ⁸ Keek goka sə səərə mari ko'kiya narkə delləirə; toogesik Gog naa Magog nok ya'am. I dag ni wa'rəta womarətak. ⁹ I ree kaaka ara dəlləkre sə i ko̱'o̱s ara iya i esə timr Billəi i pinnak, dəlla i iinpal. Ama ra' keetə diga billə paa sə za ra'si. ¹⁰ Seetan ura səəriz i kosu ra' gəəga pu kweekrə ekirə, ara i kosən do̱'in naa anabaawaiya songbrəiyak. I gbiik se̱no tuks naa ubla haa ting ting. ¹¹ Sei n og ting gwansa gbi'sas bussus naa gə ura pu gaptə paaz. Ara paak naa a diik nog ullə mu' ama me̱e̱ ara i ko̱o̱kənnak pa. ¹² N og wərki- a gbi'kiyai naa a ye'kiyai de'narə ting gwantirə mu', sə i gberə rababai. Sei i gbe'rə rababaaz uza-Rababaaza zəngsəs. I ze̱e̱sə robai bis ina i bii rababaiya eyirə te'endə. ¹³ Gbona keetəttə wərkiya ipu ulləi. Wərk naa Haades i esə wərkiya ipu iirəi sə i ze̱e̱si bis ne̱ta i bo̱'rəttə paa. ¹⁴ I kosə wərk naa haades badəra ra'rəllə. An uni wərka gbo'ok - badəra ra'rəl. ¹⁵ Ura i oks riira ulləl rababaaza zəngsəszə paz i kosu badəra ra'rəllə.