¹ Sa'kaa ne̱ta etirəttə n gee gweraa unaa do'tə diga billə paari ni gweraa mariya gənŋairəyak dookəe bonge, ''Haliluuya. Kweeka, daraaja naa gbi'kəm gapsapu Billa aalə. ² Ze̱e̱ska ullək zəmazi, nok ze̱e̱səpu tarambantaaza gbi'za laks dəl naa latəraz bis. Gəsapu gimra kwa'a se̱niya ulləirəi, iya tarabantaazi kuusii. ³ I gəə i puu pak ittəzazzə bonge, ''Haliluuya! Yeem keetək ullə haa ting ting.'' ⁴ Do̱o̱niya zur naa narkə ai naa ne̱ta natte Bil wom naa zəngsat i kasə dii sə i noos Bil ura pu gamnarə ting gwanta ulləttəz. Ipu dookrə bonge, ''Na gau rii, Haliluuya''. ⁵ Sei gə gwera keetə ting gwantirə bonge, ''Noosən Billa aal, ii se̱niya ulləi yas iya i serəmmusennai, iya naa gbammai naa iya i punaa gbam pai''. ⁶ Sei n gee unaa do'tə ni gweraa mariya gənŋairəkak, ni maaməta pu wuutəkrə wo̱mutəmak, gə ni perkaa pepsəzzəkak dookrə bonge, ''Haliluuya! Daa Bil pu gwantə, uzi Billa gau gwant yasaz. ⁷ A ge̱e̱ tingtum sə zok na yaga wessawe', sə gə a noosu no̱k naasa wa ma'azzə kiimrək rektepu, gəbən kiiz pəzza ullə go'rəsapu zoka ullə.'' ⁸ I iisupu na tə' nata kimrə oontat, naa lilinna yamzaz ookapaz'' (Nok lilinna ookapazzi tomtiya oomi iya ookakapai rəi). ⁹ Malaikaazi doosə bonge, '' Biim ina an: Iya naa sə'səmaiyi iya i dooti naasa wa ma'azzə kiimrəsai''. Sə gə doosə bonge, "Paka Billə zəmazə'ək aa eki''. ¹⁰ N kisə dənta ulləttə dii sə n noosu, ama doosə bonge, "Kaa bo'rə ripa! Mi bən umgwanza tomsəzzi naa moo naa uriyangiya mooi iya i punaa seedaakumma Yeeso rəm iirə na'rəi noosən Bil, nok seedaakomma Yeesorə umi rumsa anabsimrəm''. ¹¹ Sei n og ara billə paak gbe'rəmtə sə n gwenə, n og pirməsa bussas. Ura dəg pirməssis i de̱ru gee ura wessa naa gongaz. Gwaa ya'am naa ze̱e̱skaa zəmak. ¹² No'a ulləi ipu ni me̱e̱la ra'rəllak, me̱e̱tuwalli ipu gəngən ullə zullə. Puna riira maz me̱e̱pal biisəndəl gwandə zokrə sei gwan kotto sə me̱e̱. ¹³ Tə'tə yaluwa i iktə kwa'rə rool sə i de̱r riira ulləl inge Paka Billək. ¹⁴ Soojaiya billə paai ipu duukurə pirmiya buriyairə paa, i tə'tə liilinna yakkpapa buzza ookapaz. ¹⁵ Fonkaaza rommaz keetə ullə su'rə sə dobdunu dərme, sə gə gakp gwant iirə paa naa gbala we̱e̱s. Digdə ara i ɓo'on maama inabirəmak naa suksa baara go'mago' Billa naa ikoommalləm. ¹⁶ Puna riir biisəndəl gwandə yalurə naa gwandə longlə: "Gwanza gwanirəz naa Dangwanza dangwanirəz." ¹⁷ N og malaika de'narə ublarə. De̱r noiya i usə paai naa gweraa gbi'kak bonge, "Zan tookəntən yas nok naasa gbi'sa Billəz. ¹⁸ Zan i təu galaa gwanirək naa galaa dooniya ya'amrəirək naa galaa pirmerək naa iya dəgii, naa galaa mariya yassairək, iya i gapsə gwanii naa se̱ni naa iya naa gbammai naa iya una zaamai''. ¹⁹ N og do̱'inni naa gwaniya dəlləi naa soozaiya ii. Ipu tookənkarə ar mukə nok gwaaka ya'am naa ura dəktə pirməs ezi naa soojaiya ulləi. ²⁰ I kam do̱'inni naa anabaawaiya songbrə i bo'rə ne̱ta məsəmdə ullə mu'ut. Naa ne̱ta etiti sə səərən mari sə i noos goosa ulləs. Ii ittəkkək i kosi ra'a gəəga pu kweekrə ekirə roo. ²¹ I ips iya i seetəi naa fonkaaza keetə ura dəg pirməssazzə su'rəz ezi. Noi yas i təu galaa iik.