¹ Sa'kaa n ogən ne̱tattaz, gə n og malaika uza pu tiitəkrə diga billə paa. Punaa iiko tektapa haa dəl gə ookum naa darajaa ulləz. ² De̱r su' naa gweraa gbi'kak sə doo bonge, ''Dəlla gbi'la Baabilonnal kasəpu! Yerəpu ar gapta mairət, ar woonaa kala rumsa go'passə naa səəra noi. ³ No̱k mariya dərmerəi yas i bo'rəsapu maama inaabiya ullə latəlləm. Gwaniya dəlləi i bo̱'rəpu laatər naa ur. Mariya naa we̱e̱sai naa iya naa gbi'kəmai i geesapu tingtuma ulləm.'' ⁴ Sei n gee gwera uka diga billə paa doo bonge, ''Keetən diga ullə roo mariya mii, nok kai do̱' hakkeiya ulləi pa, bo'ta ne̱ta ɓəsə mari baaraa ullət tiitəndə. ⁵ Hakkeiya ulləi i tookənsapu paari. Bil sunde naa tomteya ullə ənkure i go̱'pai. ⁶ Faasupu ni ur faasən urik, toksuku dən ittənə ina bo̱'rəndə paa. ⁷ Ni tə'gən zura gwandəl sə geen tingnum eki, esnu ɓərka baar naa gomba. Nok doo gwandə timlə, 'N pu gamnarə ni gwanzak, Mii tuukuzzi pa, n bo'rək riiu pa.' ⁸ Noka ri'ik ubla uka ne̱ta ɓəsku baarat tiitəku: wərk, wagər naa busum. Ra' do̱o̱sku yas, nok Daa Bil ura naa gbi'kəmazzi gəbən uzi ze̱e̱sku bis'' ⁹ Gwaniya dəllə i bo̱'rə laatər sə i kée billaa nok urai i go'ok naa wo̱o̱ga su' bəlla i ogən ye̱e̱ma ulləmmakrə. ¹⁰ I də'ək aari nok sərəmkpa ɓərka baara ulləl, sə i dook bonge, "Ina yirkurənni, ina yirkurənni naa berniya gbi'zaz, Baabila, berniya naa gbi'kimmaz! Ɓərka baara mo̱o̱l tiitarə awai toparə te'.'' ¹¹ Mariya gbi'kiya i yiu sə i yingə dəlləi i go'ok sə i kis wagər nok ur, de koo uza yikp ne̱ta ullət es pa. Ne̱ta zinaariya rət, azurfarət naa biliya ¹² gəlkirəi naa lu'u lu'ui naa leilonna yamzaz, naa huzza, naa garura naa Siliki naa jar alharini naa te̱' a dəəkapak somaso', naa ne̱ta i to̱dəs naa te' a go̱mak, naa a tagularək naa te̱' we̱e̱sa wessas, naa billa naa zaka bəskarəl. ¹³ Naa Kirfa, naa ne̱ta sittarət, naa urdiya ra'rəz naa mur naa lubban naa maama inaabirəm, naa waag, naa zuma alkamarəm , naa ne̱gi, naa mai, naa pirme, naa keekeiya pirmirəi, naa se̱ni, naa zəngteya yanga marirəi . ¹⁴ Ne̱ta a iinpat yas za'apu. Geeka tintuma mo̱o̱m naa ootuma mo̱o̱m yas wo̱'pu, gə a puuk kinka pa. ¹⁵ Mariya gbi'kiya i yiu sə i yingəi sə i kin zaudi nok urai i də'ək aari nok səra ɓərka baara ulləttək, sə i go'ok naa wo̱o̱ga su' a suksa baallək. ¹⁶ I dook bonge, ''Ina yirkurənni, dəlla gbi'la puna Liilina yawəz naa galuraa bibzazzai naa Alhariniya bibzaz ka go'rəkə nuus naa netta zinariyarə, binniya naa diimai naa Lu'u lu'ui!'' ¹⁷ Awa muzo kotto ne̱ta eti yas wo̱'pu. Kala do̱o̱nza jirgiya maamrəzzə naa iya i torui yas, naa mariya kinə reka iik diga tomsa gbonarəzzək yas, i de' aari ar ye'na. ¹⁸ I go' de i og ye̱e̱ma pu do̱o̱kəndəm. I doo bonge, "Dəlla palli goo dəlla gbi'la alya?'' ¹⁹ I faa kəəg gwanirə zu'tirə, sə i go' naa gbam naa wo̱o̱ka su' naa we̱e̱ra su' bonge, ''Kai, ina yirkurənni naa dəlla gbi'lal, ara mariya naa jirgiya maamrəi yas i kinən zaudik. I wo̱'supu ni umkpa norak.'' ²⁰ ''Zok na yagən ullə pa, ii mariya i esə timrai, naa manzaanii naa anabaawai, nok Bil kamtəpu bisa iis ullə pa!'' ²¹ Malaikaa naa gbammaz pe' billa gbi'la gooni naaral sə kosə gbonarə sə doo bonge, ''Bilaa akrəzi sə i kosək Baabila dəlla gbi'lal yirkurə naa gbam, i puuk oku pa. ²² Do'kaa ɓanŋ naa ges naa uuka guri naa pipkpa algeetai i geek zok dellirə pa. Maza naa tomsa na'rəs koo irəm a pas ya kink zok dəllirə pa. Í geek do'kaa naalək moorə pa. ²³ Oosaa pitilarək okəek moorə es pa. I puuk geeka gweta mariya i bo̱'rə kiimai moorə pa, nok mariya moorə naa zaudii iiyi yangiya gwaniya dərmerə a səəri naa neta moorə təgrarətai. ²⁴ Ulləzi sə oks kwa'a anabaawaii naa iya i esə timrai, naa kwa,a iya i ibdi dəlləirəi.