¹ Sei n gee gwera ukaa keetə Gwaaga Billəkrək do' paari naa gbam doosə malaikaiya gbansa eyi bonge, "Rən i kuus ne̱ta gbansa tasauwiya baar sugənda Billəttə eti dəllə." ² Malaikaa se̱e̱nzaz ree sə kuus a ullən dəllə; sei do'wiiya i go'pai kam mariya ipu naa lambaa do' indəi iya i noos goosa ulləssai. ³ Malaikaa ittəzəz bən ree kuus a ullən gbonarə. Gbona yer kwa'; ni kwa'a maza wərazzəyak, sə kala ina punaa zəngs gbonaa ekirən wər. ⁴ Malaikaa taazaz re kuus a ullən womut na baderə sə maamətta iit yer kwa'. ⁵ N gee Malaikaa mamrəz doo bonge, " Moo maza zəma naa go̱'nummazzi, moowa do̱o̱ naa rikakkazzi, moowa ookapaz, nok a ze̱e̱sapu ne̱ta at. ⁶ No̱k i kuusapu kwa' a mariya i esə timrai naa anabaawairəi, a essipu kwa' ina bo'i no̱k uni ina i to̱o̱n." ⁷ N gee bagadi bagtə bonge, "Riizi Daa Billa gbi'lal, ze̱e̱skaa mo̱o̱k pu wessa zəma. ⁸ Malaikaa nazzaz kuus a ullən ublarə, sə i esu bila na do̱o̱s mari naa ra'. ⁹ I do̱o̱s naa ke̱e̱ka ma'raa rook wessawe, sə i pagrə səəra pak ri'ra Billələ ura punaa iiko ne̱ta ɓəs mari baar etirə paaz. I pu' na' sə i noosu pa. ¹⁰ Malaikaa gbanaazaz kuus a ullən ting gwanta do̱' innirəndə, sei təgra gbə'əs ar gwanta ullət. I təbdə me̱e̱l no̱k gomba. ¹¹ I doorə səəra pak Billə nok gomba naa nogrum, sə mu'us pu'ka na' ne̱ta i bo'rəttə. ¹² Malaikaa bamburəz kuus a ullən womaa gbi'kakrə, womaa Yufurətussak. Maama womaa rookrəm o̱ks no̱k sə ina go̱'rus billaa gwanza ara ubla gbətənakkrə zakənakrə. ¹³ N og rumsa go̱'pas taasə a goo busiya ipu keetəkrə diraagonrə su'rəi, naa a do' indək naa a anabaawaiya songbrəirə. ¹⁴ Ii rumsa maiya i bo'rə ina məssəmrəssi. Ipu keekrə sə i ree gwaniya dəlləirə sə i daksi ar mukə no̱k ya'ma gbi'ma ublaa Daa Billəkrəm. ¹⁵ ("Gwenəm! n pu zakrə ni ruuzak! ura naa sə'səmmazi ura gau naa zo'kaz, ura punaa yaləna ullən zokrəz no̱k bo̱'ta kee kandəzəz sə i og ina burka zokren ullə. ") ¹⁶ I kamti ar mukə ara i de̱r Amagedon naa me̱e̱la Ibraaniyaawairəyak. ¹⁷ Malaikaa gbansaz kuus a ullən zakarə. Sei gweraa gbi'kak do'tə Gwaaga Billəkrə naa ting gwanssə sə doo bonge, "I bo'rusa pu!" ¹⁸ Oosa veklitə, sə do' ni pepsəzzak, sə but lamrəm-lamrəmkaa buttə eki ar an a me̱'ɗəsapu bo̱'rəmkat diga bəlla maz ma'an gapna dəllak, lamrəmka buta gbi'tatti. ¹⁹ Berniya gbi'zaz markən no' taarə, sə dəlməya iya i me̱e̱ Bil pairəi i kadə sə i ua'gə. Sei Bil sundə naa Baabila, dəlla gbi'lal, sə esə dəlla eli koppa naa maama inaabirə i bo̱'rə diga ke̱e̱ka suksa baarəl. ²⁰ Kala butta yaagəs, naa gəbən get i me'ɗə kinka pa. ²¹ Biliya gbi'kiyai i wəng haa ai i kadətə diga paa marirə paa. Sei i de' Bill no̱k laaka dəlla talwi rəl, no̱k laaka dəlla rool mo'tuto pu.