¹ Sə gə n og alaama uza gbi'zəz a məsəmrəz billo paa: Malaikai gbansa naa ne̱ta ɓəsək mari baarat gbansa, no̱̱k na ne̱ta etiti sə Bil yiik suksa baara ulləl ɓamsənarək. ² N og una gbotə ni gbonaa polkum ni daroogallaa se̱kəzzak. de'narə pou gbonaa ekirə iiyi iya i reg nasara do' innirəi naa goosa ulləssə, naa gənŋa iya ipu naa ri'ra ulləlai. Ipu kamnarə naa ɓaŋna Bil esin. ³ I zinək gella Muusa se̱nza Billəzzəl, gella Waa Ma'azzəl: "Ne̱ta gbi'ta naa məsəmmatti tomteya mo̱o̱i, Daa Billa gbi'lal. Ze̱e̱skaa zəmak naa gongaakum uti bilita mo̱o̱t, Gwanza dəllə yasaz. ⁴ Ne̱e̱zi serəmkpa sə noos ri'ra mo̱o̱l pa ya Daa Bil? Mo̱o̱zi kotto apu wessa. Dərmə yas i zak sə i no̱o̱sa mon muzə, no̱k go̱'num naa tomteya mo̱o̱rə wessa a yiiyai". ⁵ De' ne̱ta eti as, n og Gwaaga Billək naa nu'təya seedaakumrəi, i gbe'rumtə billə paa. ⁶ Diga ara ar ookarəkrə malaikaiya i kam ne̱ta ɓəsək mari baarat gbansa i keetə. I tə'tə yaləna bunna sekən sə i yag ne̱ta kimde ni maama zinariyarət gumbrə ke̱e̱rat. ⁷ Una muno neta naa zengs eti rə te', esə Malaikaiya gbansa ai i kam seti gbansa naa suksa baar Billəl, iya i gau ting-ting haa ting-ting. ⁸ Gwaaga Billək yi'is naa yeema nooska Billəm naa gəbən gbi'kəma ulləm. Maza le' torka rooz piipa sei dei laaka dəlla gbansa a Malaikai gbansa i kami ai ina yi'sapu.