¹ De n og n gwen Waa Ma'az de'nərə billa Sihiyonarə allə. Naa mari mu' zu' gbaanarə naa zu' ittəkə naa narkəi 144,000 iya ipunaa riira ulləl naa riira Daa ulləz gwanirə tiilə. ² N gee gwera diga billə paa wuugə ni maam gənɲa tak naa gwera gbi'kak pipsəs zək. Gwera n geek puni ɓankak ipu du'uk banka iirək. ³ I zin gella pəllal teng gwantirə mu' naa do'neta narkə ei naa doonirə mu'. Maza ka le' zinka genlis pipa sei mariya mu' zu' gbaanarə naa zu' ittəkə naa narkəirə 144,000 iya i yipti diga dəlləi. ⁴ Iya eiyi i laas zu'teya gwanirəi naa kita ki' pa, no̱k i kam zu'teya gwanirəi naa go'num goosa kimrəssə pa. Iya eiyi i duugə Waa Ma'az ara rennak tele. Iya eiyi i yipti naa goosa marəmrəz pa ama yang teta seenta Billət naa gə Waa Ma'az. ⁵ I oks songb iirə su'rə pa; ipunaa aibe pa teng gwanta Billəttə mu'. ⁶ N og malaika uza usukrə billə paa, punaa pangna wessa ɓampan sə doosək iya ipu dəlləi, naa dərme tele, pagn, me'te naa mari yas. ⁷ Sə der naa gwera gbi'kak bonge, ''Serumən Bil sə i noosu. Nok zoora biskən az rektəpu. Noosnu, ura go'rə ara billə paak, naa dəl, naa gbəna, naa ara maam wuutunak.'' ⁸ Malaika uza, malaikaa ittəzəz sə gə doo naa gwera gbi'kak bonge, ''Katəpu, Baabilaa gbi'zaz katəpu, ura səərə dərme yas ina bo' waka maama inabirəm inaa kima ullə am.'' ⁹ Malaika uza a taazaz duuti sə doo naa gwera gbi'kak bonge, ''Ura noos do'neta eti naa goosa ulləz yas, na gəə kweesapu alaama ulləz tiilə koo na'rə, ¹⁰ ur bən bo'ok bon maama ianbiya suksa baara Billəm, ura bo' maamiz i ɓəsku baar na ra', naa bileya ra'rəi Billə mu'ka naa malaikuiya ullə ookapai naa gə Waa Ma'azə mu'ka. ¹¹ Yeema iirə ɓasurəm ruuk paa ting ting, ipunaa əngəspa pa tuks naa ubla iya i noos do'netti naa goosa ulləz, naa gə ura kwee alaama ullə riilə ezi. ¹² A an yii ɓəska baara iya naa riisəm ai, iya i duu dookaiya Billəi sə gə i esə timr Yeesorə.'' ¹³ N gee gwera diga billə paa dookrə bonge, ''Biim ina an: Moo iya naa sə'səmaiya iya i wər Daa Billə.'' ''O̱o̱,'' Rumsi doo, ''no̱k sə ina əngəs tomsa iisə, no̱k neta i bo'rə duutki dun.'' ¹⁴ N gwen sə n og kolii buzzaz. Naa uza ni Waa Mazak gabtə kolirə te'. Punaa meetuwolla kangeerirəz gwandə zullə naa kwaanza ro'maz gwandə na'rə. ¹⁵ Sə gə malaika uza keetə gwaaga Billəkrə sə der naa gwera gbi'kak ura pu gabtə kolirə te': '' Pe'em kwaanza mooz sə a ma' kwaaka. No̱k zoora kwaakarət zaapu, no̱k neta o'ka dəllət oosapu.'' ¹⁶ Sei ura pu gabtə kolirə te' ezi mangtə kwaanza ulləz dəllə roo, sə neta o'ka dəllət kwaaz zok. ¹⁷ Malaika uza keetə gwaaga Billəkrə paa; urbən punaa kwaanzz ro'maz. ¹⁸ Gəbən malaiaka uza keetə diga bagadiya ma'ka net dəəntət, ura punaa gbi'kum ra'rə paa. Sə der naa gweraa gbi'kak ura naa kwaanza ro'mazzə, '' Pe'em kwaanza mooz sə a kwaaz nen teta inabirət a i oosapui dəllə, no̱k i oosapu.'' ¹⁹ Malaikaa ezi ɗontə kwaanza ullə ezi dəllə sə toogus neta inabiya dəlləz. Sə kuus denza gbi'za i zaan maama inabimrə a suksa baara Billəm. ²⁰ I digdəz denza zaaka maama inabirəm emi dəllə sa', kwaal bən kuutə diga denza i zaan maama inabirəm sə wuu haa reks ni salandu a pirməzsəs, meel mu' muzo naa zu' taare 1,600.