¹ N i minge i pokənkə Kwebaazzə, una pii sə na wo̱səkəna diga ikaa ulləkrə iikən kən zəngsə naa yika yirku. ² Yi'sən yaksa zoka miik naa sundumeya omii naa kinka go'numa yam am, ma'an daksəka zur naa zəngs naa sundumeya muyoi. ³ Kai bo'rə una na ika zur pa ko nooska zur, ama tiisən zur ogən uri i ara pu. ⁴ Kai daamə naa ina ii iin pa ama naa iika uri rək. ⁵ Gamn billaa akrə ura pi Kwebaaz Yeeso rəz. ⁶ Ura gau gooka Billək rəs ama yes zura gwandəl i kweekən naa Bil pa ni ina yaware ren. ⁷ Ama pee zura ulləl una pa. Yerə ni senz ak sə gau naa goosa mari rəz. I ogsu deng deng ni mazzak. ⁸ Tiiz zura ullol, tis zura gwandəl sə esə gbikəm haa wərk rə, wərka vaga raurək. ⁹ No̱k ri'ik sə Bil esu gbikəm gbimam. sə esu ri'ra ar kala ri'ral. ¹⁰ No̱k ri'ra yeeso rəl koo rugbe ya pai ya ii guuk dii, rugbeya ipu paai naa a dəlləi naa a dəllə dii. ¹¹ Ko me'la palya keesək pak sə doo gee, Yeeso Kwebaaz Dangwanzzi, zakarə nooska Billə rə. ¹² No̱k ri'ik gbaabaiya mii, ni koo bənaya ii esə en gbikəm ko mina pu ang pa, ni ri'ak n pun ang pa ak, bo'on tomsa irə kweekarəz naa ser pa. ¹³ No̱k Billi pu tomsə irə te'ka bo'on sundume naa bo'ka tomsa go'sukun an. ¹⁴ Bo'on koo anya naa gootume pa naa gə ro'or pa. ¹⁵ No̱k sə i gau mariya i tuumi pai naa gə zəmak, yangiya Billəi naa aibei pai. Bo'on ri' sə i oo ni oosak dəllə roo iya kəəz sə i duu pai zamanu azzəi rə te' ¹⁶ Kamn paka zəngsək naa gbam no̱k sə n kinə ni n nooskən Kwebaaz ublaa ullok rə. angzi sə n meek n nog zuk pa, n ɓər baar zuk pa. ¹⁷ Ko ni i dəksine ni ina marka rə hadaya rə naa gə tomteya irə eska timləi, zok yage, gə zok yage naa ii yas. ¹⁸ Naa ri'ik bo'on yaksa zok, bo'on yaksa zok naa mi. ¹⁹ Ama minge n tomtək Timoti irə naa loka pa, no̱k sə n kinə gbam mina mesapu goosa iis. ²⁰ Npu naa maza zəngsa ès rəkənkə naa ur az pa, sə oksukən yirku naa zəmak as pa. ²¹ No̱k gwani yas i laa kinkaa gwanirə zu'terək, a Yeeso Kwebaazək pa. ²² Ama i me̱e̱men daraza ullos, ni bo'on tomteya gwandə daa rəi yak, sene paka tingkak rə te'. ²³ Uzi n de'es zəngsa miiz minge n tomtuku naa lo'ka pa, mina og rigəta i rigət. ²⁴ Ama npu naa gbam Billə minge miin naa zura mindəl n zak naa lo'ka pa. ²⁵ Ama n sundə minge too ton nka puu tomtəkən Abafaroditus, ur ungwanzi, dowiya tomsəs zi dowiya ya'am rəzzi, tombaz, senz no̱k tomteya mii. ²⁶ De pi merka ikrə pat moos haa de i gee pu kunziz. ²⁷ Zəma kunə haa to'pa ka wər. Ama Bil oksu yirku, gwan muzə pa, ama naa mi, no̱k baar kana sugə baar sugəndə pa'pa. ²⁸ No̱k ri'ik minge n tomtuku, no̱k ina puu oka zok yakən no̱k gbitəpu yirku rə. ²⁹ Kween Abafaroditus naa yaksa zokka gbikak Billə, gwenən daraza mariya ni ur airəi. ³⁰ No̱k tomteya Kwebaazəiyi sə ɓadə wərka. es zəngsa ullos no̱k sə boo sene no̱k boka yi'is tomteya i too ika bo'sei ai.