¹ Bulus naa Timotawus seeniya Kwebaaz Yeeso rəi rekarə iya i koosi Kwebaaz Yeeso rəi Filibii naa iya i bgaa iya i esə timrai, naa dikoni. ² Go'num naa gau naa ii, naa gabta oomi keetə Bil Daa azzə, naa Daa Billa al Yeeso Kwebaaz . ³ Npu iisək Billa miil useiko rə no̱k ii, weerəka miik rə koo bənaya, ⁴ Koo bənaya mina pu weerəkrə no̱k i tele, n weerə naa yaksa zok. ⁵ Npu iik useiko rə no̱k daksəka zura iil pakka Billək rə te', diga ma'karə haa ri ak, ⁶ N meegəsapu no̱k anni, sə ura ma' toms oomi iirə te'kaz re̱k muuka haa ɓamsəkarə ublaa Yeeso Kwebaazzək. ⁷ Go̱gon ara n geekən ri'eri iirə pak, no̱k ipu mirə timte i tele ii dowi a miiyi go'numma Billəmrə, naa me̱e̱gəska paka Billək. ⁸ No̱k Billi seida miiz, npu naa ningsa a iik i yas, iikaa Kwebaaz Yeeso rəz. ⁹ Npu weerək rə akrə, iikənka a iik naa ree muu, me̱e̱ka naa me̱e̱gəska rət tele. ¹⁰ Npu weerəkrəzi no̱k sə ii gwegə tegəka neta arat. ¹¹ Npu weerək rə no̱k sə ii gau mariya wessai, iya naa aibei pai ublaa Kwebaazzək. No̱kka ri'eri zi sə i gau naa neta wessat a i kinə Yeeso Kwebaazzət naa gbikəm. ¹² Ri'ak n ii minge i me̱e̱, uri yangi, neta bo'rum naa miit gabsapu reka muu paka Billək zəma zə, ¹³ No̱kka riik sə doka mirə Kwebaazzək me̱e̱gəsapu zok haa naa soozaiya Firatariyum yas, naa gə mari uri. ¹⁴ Haa mari uri gənga i kinə gbam wessa no̱k dokaa miik, ii keetə kakarə, sə ii doo paka Billək. ¹⁵ Zəma zə, ii uri, ipu dook paka Kwebaazək rə naa keerəs naa səərəme, uri boo naa sundume a wessai. ¹⁶ Ii ya i doo paka Kwebaazzə naa iika ai ii me̱e̱men bonge ii gabsə ak zi sə mina təks paka Billək. ¹⁷ Ama uri boo ii doo paka Kwebaazzək naa iika zur, naa markənka, ii me̱e̱ bonge boopu ɓərke baalə dokaa miikə te' ¹⁸ Sei anya?, koo billa pak ya, i waas-wan ya? ko zəma ya? ipu dook paka Kwebaaz rə, zok yagne yan inna enni, o, zok yakke yan. ¹⁹ n me̱e̱ ina an gbiske gbin, inna an bo'rumkpa no̱k weerəka iik, naa gə paka rumsa Yeeso Kwebaazəz. ²⁰ No̱k inna n esən gongan, minge, n geek dəksa zur pa, goptira riil, sə n wegs timr koo bənaya, naa gə ri'ak, n i nooska Kwebaaz naa zoka miik. Npu naa ika Kwebaaz na kinə nooska mirə zokrə koo n se̱e̱k koo n wərk. ²¹ No̱k miirə gə, Kwebaaz zi zəngs, wərk boo bagsi zi. ²² Ama sə na gakp gan gabta zokrət, sə naa tomsa omis gə, to̱o̱, n me̱e̱ a n kaakən pa. ²³ Ama ittənən go'gon hakkilo i miis ni ii in nka daa ara ak, nka gau naa Kwebaaz, a eki ki assə mii. ²⁴ No̱kka riik gabta mirə zokrə root doolezi no̱k ii. ²⁵ De n me̱e̱gəsa pu inna eni rə paa gə, n seek sen sə n gau naa ii pat, no̱k reekaa irə muuk, naa yaksa zokka irə eska timlək tək. ²⁶ Faasəmma room umi, səgbəme a irrə Kwebaaz Yeeso rəi ii baktək zok no̱k gətkaa miirə iirək. ²⁷ Rigən riətta to̱o̱ paka Kwebaazzək at, bo'on ri'eri no̱k ko mina zaa gwekəndə, ko ipu ang pa sə n gee n ii minge n gee enge, ipu yaale naa sudune a muyoi i tele, no̱k eska timra paka Billə rə al. ²⁸ Kai serum na inna umkeereiya ii i bo'oskən an pa, ina yiisiki wōkaa iik, ama i boo i yi'sikən kweeka iik, inan boo keetə Billə zi. ²⁹ Ama ii bo'sən pu go'num, nok Kwebaaz, no̱k eska timr Kwebaazzə tan pa ama haa naa ɓərka baar no̱k ur. ³⁰ Ii puna ɓərka baar ni mirə ii og sə i gee npu ɓərək rə haa ri'ak al.