¹ De Yeeso og bansa mariya eyi i dag, sei dəg ge'rə paa, sə gau dii Kubrubaiya ulləi i zaa ullə. ² Sə gbe'rə su' sə kubrusəni bonge, ³ ''Iya naa sə'səmaiyi iya naa zaamai rumsə, nok gwanta Billət a iiti. ⁴ iya naa sə'səmaiyi iya go' rikakai nok i tapskəntan timte. ⁵ Iya naa sə'səmaiyi iya naa tawaliui nok i kin dəl. ⁶ Iya naa sə'səmaiyi iya ipu ge̱e̱k wodurəi naa gbəngba nok go'num, baar daki. ⁷ Iya sə'səmaiyi iya naa yirkui nok i okskən on yirku. ⁸ Iya naa sə'səmaiyi iya timteya ii ooniyi, nok i gwenk gwen Bil. ⁹ Iya naa sə'səmaiyi iya i daks zur wessai nok i derki yangiya Billəi. ¹⁰ Iya naa sə'səmaiyi iya i mu'sun, nok go'nummai, gwanta paarit a iiti. ¹¹ Mooi iya naa sə'səmaiyi mari ina də'ən sə gə i ɓəsə baar, ipu dooruskən bonge ii engka baiyi songbrə paa nok mii. ¹² Zok na yagən, gəbən namn waag naa yaksa zok nok faasəma iim pu gbi'nən Billə paa. Mariya eyi i bo'sə anabaawaiya dokai ri. ¹³ Moi iiyi zimgba dəlləz, ama zimgb na markən naa tingtuma ulləm, naa anni sə i go'kən ya? ama i bo'kunu toms mu'ka pa, sei koska mari i digdəsku. ¹⁴ Moi iiyi osaa dəllək, dəlla gau paaril gau sə sums zok pa. ¹⁵ Bən i gaps fitila sə i ku'suku naa teebər pa, ama i dengku teebərlə paa nok sina esə oosa iya ipu gwa'rəi. ¹⁶ noka ri'ik daan oosaa iik na oos ar marirə mu'ka, nok sina og tomtiya eyi a wessai, sə ina noos Daa paariz. ¹⁷ Kai og ni n zaa laksək ina Saari i doo dookairənni pa, n zaa noka n laksəniki pa ama noka n go'rəskini. ¹⁸ Zəma zə' Npu dooskəndə sei paa naa dii na as pu zanga, koo munə le'ek sə argəs pa dookairə te', sei netat na yi'sapu zok. ¹⁹ Noka ri'ik uza muzo na ka'as dookai səna kubrusən uri som, uzi i derku topa gwanta Billəttə, ama ura kami sə kubrusəniz, uzi i derku gbi'zəz gwanta paarittə. ²⁰ N doosən eska timra iil, na arpu eska timra biibai naa Faarisaawairəl pal, bilaa ni i torkən gwanta Billəttə paarit gə piipa. ²¹ I gee i doosə mariya ningkai, kai na zu' maz pa, kala ura əu mazaz tospu bissə na'rə. ²² Ama npu dooskəndə ura doosə doowiwa bonge mo̱o̱ maza zukaz, i gapsku do'ga marirə té. Naa gə maza doo bonge mo̱o̱ maza zukkazaz tossapu gwaaga ra'rəkrə roo. ²³ Mona pu esək esəka mookrə bagadirə mu'ka, sə a sundə doowi baar na gomu puna moo. ²⁴ Daam esəkka mook, bagadii zirə mu' ruum a oks doowi zanga a mu'us geekəntə sə a getə sə a esə esəka mook. ²⁵ Geekən naa maza tumaz ya, diga n reks or bissə denpa, bo'ta ura tomaz reksa na maza bisbissazzə. Sə maza bisbis ezi na kama dogba seegəi rə na'rə i koska pursinarə. ²⁶ Zəma zə' N doosa ni a keetəkənak pipa sei mona tokpu waa weesa i duwaz zanga. ²⁷ I gee i doosun ka'ina go'ro kima ki'pa. ²⁸ Ama geen doosun maza gwen kitakiiz sə gən iika timləz, gapsa puna ur timli rə. ²⁹ Gebən nora mool na'gona rəl na toska degɓa de'rə ragum nolli a ɗongs. Aska an agau na naa nor mulo, naa zok pat tokən ra'rək. ³⁰ Gebən na'go'na naa moorok na toska ton sə a dəu de' gupsum na,a rooi aska an naa a gau naa na' muyo, naa zoka moot pat ora a torkən ra'rək. ³¹ Gə̱ə̱ i doo géé, maza nen kiiza ullozzaz a esu rababaaz faska rəz. ³² Ama n pu doosukən də neya fas kiiza ullozzaz sina oksu yaarirətə pa tossapu laaka yarirə, gəbən maza kam kiiza fattufan az i gau kiimi pa. ³³ Gebən i doosə mariya i arrənnai kai na gba'tum songbro paapa. Ama gba'tuma Iim na gau a Billəm. ³⁴ Ama kai gba'tum zuk pa koo naa ara paak nok ora gwanta ullət gamnakki. ³⁵ Koo naa dəl nok ara dənta ullət digənnaki, koo naa Uruselima nok dəlla gwanza gbi'zazzəlli. ³⁶ Kaa gba'tum naa zura mool pa, nok akale' go'ka suk bukkuk koo wiikək pa. ³⁷ Ama paka mook na gakp o̱o̱ na o̱o̱, na ewwe na gau ewwe, dooka na ara eki a keetə Setandəkki. ³⁸ I gee ingə, "Nor a nolləkrə" nuur bo anulləkrə. ³⁹ Ama kai dingkən naa engku ində te'ka pa, aza na bè̱ à laktəka na' go'narək yəsmu a na' ukarək na bè̱ ⁴⁰ Uza na iya kamkpa bissə mu' nok kwe̱e̱rəkən yaluwa mo̱o̱wak, daksmu a gbə'karəu yam. ⁴¹ Ura pi'a bo ri'gə mel muzoz ri'gən meeli ittəkə. ⁴² esən ura desənaz, gə kai no'os ura laa gimr irrəz pa. ⁴³ Ì gee i doo bonge, iim ura i gau ar mukoz, mu'sum umkeereiya mooz. ⁴⁴ Ama n doosun gbaan engka bai, wəərən Bill nok iya i ɓəskən baarai. Sə'sən iya i kamnən su'ui, go'on go'num iya i mu'sunnai rə paa. ⁴⁵ Nok sə i gau yangiya Daa Billa pazzəi, nok pi' ubla sə okum engka baazə naa ura go'numazzə, gə langtitə lan ma̱a̱m mariya i o'pairə naa iya omiyrə. ⁴⁶ Sə mona gbaa iya i iyai kotto faasəma pammi a kink ya? Nok iya i kwee sookai ma i bo'rə ri' panaa? ⁴⁷ gə ina de'es uriyangiya mooi tangə, i bo'rə an naa iya i seetəi ya? Ri'zi gəbən menki i bo'ro paya? ⁴⁸ Noka ri'ik to̱o̱ ika gau yi'sini, ni Daa irə Billə paaz gamn wessak.