¹ De Yeeso ɓams dooka pangni tele, sei doosə kubrubaiya ulləi; ² ''I me̱e̱men naasa ga'ka rəs seitə pu ruu ittə, i kamkp Waa Maz sə i ɓaau vaga raurə.'' ³ Do'ga tori naa do̱o̱niya marirəi i tookən firissa gbi'zazzə gwa' ura i eru Kayafaz. ⁴ I daks sú' naazəz səbo kam Yeeso naa ɓə̱'kú, sə bo iwu. ⁵ Ama i doo bonge, ''Zoora naasəllə pa, bo'ta mari i ruutə pangn soma so' marirə te." ⁶ Zo̱o̱ra Yeeso pin Baitanyal ura i deru Saminu bədəzzəz azzə gwa. ⁷ Kita kiiz uza zaa ullo naa waaga wessa we'ek gomkənkarək de̱e̱ngkək, siisu zullə pin rekən rekrək. ⁸ De Kubrubaiya ulləi i og ri'eri, baar sugi sə i doo bonge, ''Anni kamtə laaska waaga ri'akya? ⁹ tqo̱o̱ ika yingəs naa weesa gbi'sas sə ika esə iya zaamai.'' ¹⁰ De Yeeso me̱e̱men sundume a ii sə doosi nok an sə i mo̱o̱s kita kiiza az ya? boosə pu tomsa oomis. ¹¹ Koo bənaya ipunaa iya naa zaam ai ama ipunaa mii koo bənaya pa. ¹² Waaga kuu mirə zokrə eki, ku nok goorəska iika wərka miik. Npu dooskəndə. ¹³ Zəma zə' Npu dooskəndə, kala ara i do̱o̱k paka tingka ak dəllə yas, ina kita kiiza az bo'rən dook zok ko araya nok sunduka naa ur.'' ¹⁴ Uza muzo iya komna naa ittikə airə te, i deru Yahuda Iskaroti, ree firissa gbi'zazzəz ¹⁵ Se doo bonge, ''I eska rigaya mina eskənnuu ya?" Sə i ge' wees zur naa komanai sə i esu. ¹⁶ Diga eri sə laa ni eskəniu wak. ¹⁷ Ublaa seenkak ru'a burodiya yisti piipazzə, Kubrubai i zaa Yeesorə i doo bonge, "Arazi a ii ena orus ar nok naasa reka rəl ya?" ¹⁸ Doosi bonge ren umarə dəllə te, i doosu inge Lamz bonge, "Zo̱o̱ra miil rekttə pu mis, n rek rekaa naasək mooro gwa naa Kubrubaiya mii."''' ¹⁹ Kubrubaiyi i bo'ro ni Yeeso doosinik, sə i go'rə rekaa naasa ga'karəssək. ²⁰ De nimz bo'rum sə zaa gau naa Kubrubaiya ullə komna naa ittikə eyi nok reka rek. ²¹ Ipu rek rekarə sə doo bonge, ''Zəma zə' N dooskəndə uza muzo irə te yingəke.'' ²² Baar sugi wessa we' sə muzo mu' iirə te' i desu gee, ''Lamz koo miizi ya?'' ²³ Iisi bonge ura e tos na' muzo naa mii kəlləz uzi yiikə marirə mu. ²⁴ Waa maz ark ni pu biisənən ullo paak. Ama ina yirku rənni ura i esə waa maz ullo na'rəz! ura ezi to̱o̱ ara ika dingnuk pama.'' ²⁵ Yahuda ura yinguz doo bonge, ''Koo miizi ya, Lamz''? ''Doosu bonge, ''A doosapu naa zura mondəl.'' ²⁶ Ípu rekrə Yeeso pe' burodi sai ii useeko uwe̱'gusu sə esu Kubrubai sə doo bonge, ''Kween, sə i regə. Zoka miiki.'' ²⁷ Gə pe' kər sə ii useeko, esi sə doo bonge, bo'on ii yas. ²⁸ Kwaala miil aa al, dooka rəl, a i kuus nok mari genɲa nok ra'aska hakeiya iiyak, ²⁹ Npu dooskəndə mu'ari n gəək sə n bo' maama yangiya inabi rəi pa. Rekarə ublaa N bo'kun a pemmam naa moi ii gwanta minde Daa rəttə. ³⁰ De í zin gèl, i kee i ri'gə yiiga zaitunakrə. ³¹ Sai Yeeso doosi bonge, ii yas i dekp de' nok mii tuksa assə nok mii, nok pu biisənin bonge, "N vok neebaaz sə máiya i gbə'i arkirəi i faksək. ³² Ama sa'kaa roozo Mina ruuto, N artəkən an rekskarə Urusalima. ³³ Sə biiturus doosu bonge, "Koo gwani yas ina kas miigə n kasək pa ves." ³⁴ Yeeso doosu bonge zəma zə' Npu dooskarə ko tuksa assə, kə̀ə̀z na gə kwii à sinkənə meeke den taanə.'' ³⁵ Biiturus doosu bonge koo ina ikpe naa moo n sinkən meeka pa.'' Kubrubaiya i seetei ii bən i doo ri'. ³⁶ Sai Yeeso ree ar ukarə i der arki Gesimani. Sə doosə Kubrubaiyi bonge gamn ang Nrə weerətə weerək, ³⁷ sai pe' Biiturus naa yangiya Zabadirə ittikə, sə ma' suksa baar naa mo̱o̱ska wessa we' ³⁸ Sə doosi bonge, ''Zəngsa miis pu ɓərk baalə wessa we', haa ni N wərk wənnak. Zo'on ang gamn naa gbaksa tok naa mii." ³⁹ De səə mu' topa sai kas naa muug, sə wəərə sə doo bonge "Daa miiz na bo'runkpa bo'om, daam ɓərka baara al na assisə, ama dei iika miiki dook zok pa, sai a mook. Gə zaa oks Kubrubaiya ulləi Ípu rumro.'' ⁴⁰ Sə doosə Biiturus bonge ''Koo zo̱o̱r mulo i le'ek sə i zo'é paa? Gamn naa gbaksa tok sə i wəərə, nok sə ⁴¹ kai tor ɓasuro pa. Rums ii in ama zok wəng pa. ⁴² Ruu ri'gə den ittinaa roozo, wəərə Bill sə doo bonge, ''Daa miiz na assək pa, sai mina tor pu ɓasuwa auro na gau na à iik.'' ⁴³ Gəə gətə zaa oksi ipu rumro nok no'a ii i mo'sapu. ⁴⁴ Gə daayi ruu ri'gə weerəkrə den taanə də gəə pu dook ina see dookrən. ⁴⁵ Yeeso gətə Kubrubaiya ulləiro doosi bonge, ''Haa es ipu rumro ipu əngəskarə ya? Gwenən zo̱o̱r rektepu, i essə pu waa maz mariya naa hakeiya yairə na'rə. ⁴⁶ Ruutun à ri'gə, ogun ura essə waa mazaz səətə pu mis.'' ⁴⁷ Haa es pu pakrə, sai Yahuda ura komna naa ittikə eyirə te'ka, naa bansa mari genɲa i zaa naa fongkai naa gbalət, diga do'ga tori naa do̱o̱niya marirəi. ⁴⁸ Ri'ak ura yəngək Yeesoz doosipu gee, "Ura n ree sə n kuwwaz gwanzi." ⁴⁹ Ni ungkpa norak sai zaa Yeesorə sə doosu gee, ''N də'sa Lamz!" sə kuwu. ⁵⁰ Yeeso doosu bonge, "Ungwanz, bo'om ina a zaa bo'okron" sə i kamu. ⁵¹ Sai uza muzo iya ipu naa Yeeso eiyirə, yii na' sə du'to fongkaaza ulləz, sə dops toka lamza gbi'zazzək. ⁵² Sai Yeeso doosu bonge, gennəm fongkaaza moo gwandə samrə, nok maza pe' fongkaazaz i ɓəsku baar naa fongkaaz. ⁵³ Í mee inge n puna gbi'kəma nka derən Daa miizak paya? səka tomtə Malaikai gbəəm komna naa ittikəi paya? ⁵⁴ Ina rababai i doon i yi'ik rigaya? sai neta at na bo'rumpu. ⁵⁵ Zo̱o̱ra elirə Yeeso doosə bansa mari eyi bonge, í keetə naa fonkai naa gbalət ni í kamkp ruuzak ya? ko benya N gau naa i ro'tiya Billəirə roo, npu kubruskənnində, ama i kame pa. ⁵⁶ Neta eti yas bo'rungkpa nok yi'is rababaiya Saarirəi, eri Kubrubaiya yas í faks Ii ri'gə. ⁵⁷ Sei iya i kam Yeesoi i ri'gənu kayaafa Firissə gwa' ara lami naa dooniya dooka rəi i dakənnakrə. ⁵⁸ Ama Bitrus duyi sa'ka aari haa rekarə firissa gbi'zazzə gwa', tor sə gau naa seniya gwanzəi, sə bo og ina bo'rumkan. ⁵⁹ Firissiya gbi'kiyai naa mariya í doosə gwanz bisai, ipu laak sedaakoma zagəmrəm Yeeso rə paa nok sə bo iwu. ⁶⁰ Ama i kin una pa, nok i pagrə pan pagrəma songb genɲa, ama sa'kaa roozo uri i ittikə i zaa. ⁶¹ Í doo gee maza azgə bopu naa gbi'kəma boka waagəsə gwaaga Billə ookapa ak sə boka wom ru' taarə rə. ⁶² Domda toz uza ruu paa sə doosu gee, apu naa ina dookarən ya? sə anni ipu dookro mooro lullo anya? ⁶³ Yeeso bagnu koo una pa. Domda tozzi doosu bonge n daksa pu naa Billa naa Zəngsal koo moo Kweebaaz waza Billəzzi ya? ⁶⁴ Yeeso iisu bonge, a doopu wessa, npu dooskəndə mu'ka ang, i ok waa maz gamnarə na'gonaa gbi'kəm rəkrə. Gəə pu zakrə koliya paarirəirə te. ⁶⁵ Sai Domda tozzi taagəs yaluwa ulləu sə gee, "Doosapu səəra pak, sə gəə á laan an ullo paaya?" Gwenin i geesapu səəra paka dook. ⁶⁶ Í sundo an ullə paaya? í iisu gee úr tooton Ikpa. ⁶⁷ Í tu'rusu tutto muugro naa gə í be̱'rú naa nata iit. ⁶⁸ Í doosu gee moozi Kweebaaz ya "Doosmee anni bo'rum ya neezi be̱'a ya? ⁶⁹ Biiturus pu gamnarə goka, sə senza kiizaz zaa ullo sə doosu bonge, moo yam ipunaa Yeeso a Galiliz. ⁷⁰ Ama sin gwanirə mu'ka yas bonge, n mee ina a pu dookron pa. ⁷¹ Gəə keetə sognaa gbi'ka ekirə, waa sai senza kiizaz uza zaa ogu, sə doosə iya i̵pu arkirəi gee, maza az úr bən punaa Yeeso nok maza Nazaratazzi, ⁷² Gəbən sin haa naa gba'tum bonge, n mee maza az pa. ⁷³ Sa'ka roozo de' lo' topa iya i de popsarəi i zaa doosə Biiturus bonge, zəmazi moo yam apu irə te'ka nok meela mooli gbətə. ⁷⁴ Sə ma' de'es naa gba'tungkpa gee, N mee maza azpa ni ungkpa mora kə̀ə̀z kwiitə. ⁷⁵ Biiturs sundo naa paka Yeeso doosu bonge, diga kə̀ə̀z kwii denpa, à sinkine meeke den taanə, sai kee goka sə ree go'to wessa we.'