¹ Yeeso keetə Gwaaga Billə ekirə pu ri'gəttə, sai Kubrubaiya ulləi i zaa í yiisu ni womn gwaagək. ² Ama i iisu bonge i og neta at ya? zemazə npu dooskəndə billa seek domerə paal sə gbansək pal piipa. ³ Pu gamnarə billa Zaitunallə paa, sai Kubrubaiya ulləi í zaa ullə gwani muyo sə i doosu bonge, doosəmee benazi neta zt bo'ringkpa ya? anni yiitək zok getkaa mookrə naa kpamkpaa dəllək ya? ⁴ Sai Yeeso iisi bonge maz geegen maz kana yaasən pa, ⁵ nok mari genɲa i zak naa ri'ra miil, sə í doo bonge "Boozi Kweebaaz" Sə í ye̱s mari genŋa. ⁶ I ge̱e̱rək ge̱n ya'am; Naa pang na ya'am rən noka riik timteya ii kai na ruupa, nok sei na boorum pu ri'eri ama gbapsa za dən pa. ⁷ Delme i rukənka, woodu zak naa buut gbamrək at soma so. ⁸ Ama neta eti yas ma'kaa bər baaləkki. ⁹ Sə bən i ɓəskən baar sə i ibdən. Mari yas i mu'uskən nok riira miil. ¹⁰ Sə mari gənga dək də' sə i reg amana a doomei rəz, sə gə i muus doomei. ¹¹ Anabawaya songbrəi i keetək sə yaas mari gənɲa. ¹² To̱mteya i go'pai i baktək zok, sə gbakaa mari rək gənga tapsək. ¹³ Ama ura de̱e̱s zok har rekarə gbapsa rəz kink kweeka. ¹⁴ Paka tingk kak gwantək do̱o̱k zok dəlla yas, nok seidiskəna iya i es timr Billə pai, sə ɓapsa zak. ¹⁵ Noka riik ina og neta go̱o̱pat i doo sə̱rurət, ni saariz Daaniyel doon ak, i dees ara okapa rums sək rə ( Ura zangəs na meegəsən ), ¹⁶ Too iya ipum buta Yaahudiyat təi ina nog ina gbə yiim rə. ¹⁷ Ura pu rollə paariz kana tiitə nok sə boo pe'tə una gwaaro pa. ¹⁸ Ura pu ookaz bən kana gətə gwaa nok pe̱e̱ka yallu a gbəkarəu pa. ¹⁹ Ina yirkurənni iya ipunaa yangii naa iya ip aaməsək yangirəi ublaa ekirə! ²⁰ We̱e̱rin nok nomma im kana za naa niig ko ubla əngəskəna rə pa. ²¹ Bəlla elirə gbərka baar ulla zak, a medə borumkpa pal diga maaka dəl har zakarə ri'ak, gəbən meetək borumkpa pa har dəl gbamna. ²² Ina ka ya'rə ru' a ai pa, waa maza ka gbiisəs piipa; Ama nok iya i teegi ai, sə ru'a ai i ya'rik zok. ²³ Ri'erizi uza na doosun bonge Kweebaaza az, koo Kweebaaz aa ezi kái kweepa, ²⁴ nok Kweebáiya songbrəi i ruutuk ɓeseɓé, naa anabawaiya songbrəi i zak sə í yiisən neta mesəm ret ɓeseɓe nok səbo yaas mari naa íya í teegí, na bo'runkpa gə. ²⁵ N artə n doosunpu neta at nagə bo'rum. ²⁶ Gəbən ina doosun inge Kweebaaz pu dəllə roo, kai kee sə i ree dəllirəpa, koo Ína doosun gee ogun pu rora roorillə, kai kwe̱e̱pa. ²⁷ Ni oosa gbetən dibla Billə sə okəmn paak ri'erizi get kaa waa mazzək zak ri'eri. ²⁸ Ara ina wəran pinnak a ok dogbaai roo. ²⁹ Ama ɓərka baara al na ɓam i təksək ubla, sə' rasa ookək pa, zossi i kaditək diga paari, sə gbiikəma Billəm lamtək. ³⁰ Sə Waa Maz gbətək o̱sarə paari, sə me̱teya dəlləi yas i gberik guum. sə i ok Waa Maz pu zakrə kollirə te' naa gbam naa gbiikəm. ³¹ Gə tomtək malaikaiya ulləi i uutuk po̱ra sə i daksək iya i teegii diga gbapsa dəllə rekarə gbapsa dəlləi. ³² Kubrun naa te̱ rumb, ina og neta eti, me̱e̱n wumsa rektapu. ³³ Riizi bən ina og neta eti, me̱e̱n me̱n rektəpu sugogna rə. ³⁴ Zəma zi n pu dooskəndə bəlla al ark pa, sei ina yiisapu neta at yas.v ³⁵ Ara parik naa diik kpang kpan amoa paka miik kpang pa. ³⁶ Ama ubla naa bəlla neta attəl Maza meez piipa ko tombaya paarik, ko Waz sei gwan Daa kotto. ³⁷ Ni boorunən bəlla Nuhu rəllək ri'eri bə gətkaa Waa Mazzək. ³⁸ Ni ru'a maama tufanam rək rə ipu bookrə, ipu kamrik kiirə, ipu kesək yangirə kiimrə, haa rekarə ublaa Nuhu to'rən gbark rək. ³⁹ Naa me̱e̱ka iik pa haa maama tufanarəm za wo̱o̱si i yas, gətkaa Waa Wazzək zak ri'eri. ⁴⁰ Ri'eri zi i oksək mari ettiikə ba'ak rə i pe̱e̱k muzo, i daak muzo. ⁴¹ Kitakii ettikə ipu nallə i pe̱e̱ku muzo i daak a muzoz. ⁴² Noka ri'ik, gamn naa zo̱o̱ka nok i me̱e̱ ubla dangwanzza iz gətkənak pa. ⁴³ I bən meen ina an, daa naa gwaagaz naka me̱e̱men bəlla ruuz zakən naa tukz al , ka gau zo̱o̱krə bo'ta ika toru gwag. ⁴⁴ Noka riik, gamn naa gbaksa tok, nok Waa Maz zak bəlla i tammən pallə. ⁴⁵ Senza pazzi pu wessa, ɓe'enziz, sə dangwanzza ulləz ka esu kamkpa gwaaga ullə səka esi rek bəlla i inallə ya? ⁴⁶ Senza naa sə'səmazzi ura dangwanzza ulləz naa zaa oksək pu go'ok ri'eri. ⁴⁷ Zəma zə Npu doosəkəndə dangwanza ulləz de'esku ina pisuttə paa yas. ⁴⁸ Ama sénza naa ke̱e̱kuz na sundo gwandə timlə, sə doo gee Danwanza miiz naa lo'topu. ⁴⁹ Səna ma' duuka doomiya ulləi to̱msoi, sə íre bo'rutə neta go'pat. ⁵⁰ Dangwanza ulləz getək ubla meen bonge getkən pakrə, zo̱o̱ra gbamzi meen pallə. ⁵¹ Dangwanza ullə oksuku su ɗa'au, sə esku faasəma ullom naa dangkaamei, erizi sə go'ok naa tebdəka nu'