¹ Yeeso iisi sə doosi re'sa pak uka bonge, ² Gwanta Billət puni gwanz uza ura go'sə waza ulləz naasa Kimrəs. ³ Sai tom séniya ulləi gee, ina detə mariya i gbə̱' zok naasa kiimrəs səi, ama i zaapa. ⁴ Gəbən Gwamzi tom séni uri gee, doosi n deri eyi, N kwe'gəs pu reka pat. N ɗé'rəsapu ne̱gi naa galət uta pat, N kweesapu net tele, zan naasa kiim rəssə. ⁵ Ama mariyei ii pee derka ki oomi pa, uri i rigə oomutta iit'tə, uri boo i gə ar yingu rə. ⁶ Uri boo ii vobdə seniya gwanzə ei, sə i bəsi bar dəksa zur si ii iuwi. ⁷ Sei gwanzi bar gommu sə tomtə soojaiya ulləi, inna ibdəsə ibdəbaya ei ina gabs dəlla iil. ⁸ Sə doosə seniya ulləi naasesi goosa pu, ama mariya a derrii ii to̱o̱ pa ⁹ . Nokka riik ren billaa go̱kakrə, sə i detə mari ni i oksinik ina zaa naassa kiimi rəssə. ¹⁰ Seniya ei i ree billi gbikak rə si ii togətə mariya i ogii,mariya oomii naa a oomi pai, ar kiimi yiis naa mara ginni. ¹¹ Ama de gwanzi zaa koosuk mara ginaya eyirə, sai oks uza ura te' yaluwa naasəu pau. ¹² Gwanzi desu bonge doowi nok an sə à te'te yaluwa naasə paya? sai mazzi bagu pa. ¹³ Sai gwanzi doosə séniya ullə gee, dogdən maza az dent naa nat, sə kosu goka ara tegra rəkkə, ara go'kun wora naa tebdəka bu'ukrə. ¹⁴ Nok i derk mari genɲa ama i teegiki topa ¹⁵ Sai Farisaawai i kee i dokto ni i kangɓən Yeeso paka ullə doo ekirə paa, ¹⁶ sei i tomtu Kubrubaiya iirəi naa Hiridussəi, sə i doosə Yeeso bonge, ''Lamz é meemen moo maza oomizzi, gəbən à kubrusunkun pak Billək oomi. A ze̱e̱ mari pa, nok apunaa bé'sum pa. ¹⁷ Doosumee moo a sundo rigaya? Go'gon ena tog sooka eek Kaisallə ya? Koo go'paya? ¹⁸ Ama se Yeeso meegəsapu əngkuwa iiu sə doo bonge, ''Mooi ii zaga mariya ai nok an sə i ii gwekə miiya? ¹⁹ Yiisine weesa sokro esi, sə Í kamtu dinari. ²⁰ Sei Yeeso doosi bonge, ''Muuga neeki naa riira neeli ya?'' ²¹ I doosu bonge, ''Kaisar.'' Sei Yeeso doosi bonge, ''Esən Kaisar ina Kaisaran, Bill bo ina Billən.'' ²² De i gee pakki sei zok məsi. ²³ Gwan ublaa ekirə Sadukaawai i zaa oksu, iya i doo gee ruuka roobamrək piipa sə i desu, ²⁴ bonge ''Lamz, Muusa doo bonge, maz na wər, səna punaa wazpa, so'o̱za ulləz gəəsək Kiiza ulləs sə dingsu yangi. ²⁵ Ungwani ipii gbansa, ura se̱e̱ kam kiiziz wər, waz piipa, sə so'oz gəəs kiizi. So'ozi urma wər da̱a̱ wazpa, ²⁶ sei so'ozza taazəz kamu reekarə ii gbansa . ²⁷ Sa'kaa roozə sei kitta kiizi zaa wər. ²⁸ Ri'ak ruukaa roobaam rəkrə gə' kiizi enkən neezi iya gbansa airə tə'ya? de ii yas i kamsupu gə. ²⁹ Sai Yeeso bagi bomge i mee ina ipu dookron pa, nok i meegəsən rabarai naa gbi'kəmaq Billəm pa. ³⁰ Nok ruuka roobaamrək kiim piipa. Gəbən kankpa ki piipa. Nok i pag ni malaikaiya billə paarik. ³¹ Ama nok ruuka roobaamrək i zangə ina Bill doosənnan paya, bonge, ³² miizi Billa Ibrahimrəl, miizi Billa Ishakurəl, miizi Billa Yakuburəl Bill uli Billa wərk pal. Ama Billa naa zəngsal. ³³ Mariya eyi i gee pakki, sai kubruskənaa eki məsi. ³⁴ Ama de Farisaawai i gee, le'sapu Sakuwaai sai í tookən ar muko. ³⁵ Uza muzo irə te'ka ura mees bissaz, desu nok səbo gweknuk, ³⁶ ''Lamz, dookaa pazzi gbi'zəz dookaiyarə te' ya?'' ³⁷ Yeeso doosu bonge à iik Daa Billəz ni iin timra moolak, naa zəngsa moos yas naa sundumiya mooi. ³⁸ Uzi dookaa gbi'za naa i seetəirə te'ka. ³⁹ Dookaiya ittikə i doo bonge, 'Iim doomiya mooz ni a iin zura moolak.' ⁴⁰ dookaiya ittikə airə te'ka pazzi sə i de'es dooka naa kubruskənaa anabawarək ya.'' ⁴¹ De Farisaawai i tookən ar muko sə Yeeso desi des usa. ⁴² Bonge, Moo ii i sundo anni Yeesorə paaya? Waza neez ya? I doosu bonge, ''Waza Dauda rəz.'' ⁴³ Yeeso doosi bonge nok an sə Rums doosə Dauda na derə Dangwanz ya? Bonge ⁴⁴ Danwanz doosə Dangwanza miiz, ''Gam miirə na' go'narə sai mina yespu umkeerəiya mooi mondə dəntə di''' ⁴⁵ Dauda na der kweebaaz Dangwanz bo̱'ok riga? sə Ii deru waza dauda rəz ya? ⁴⁶ koo maz muzo, sə pagu pa, naa gəbən maza sundə desku unaz piipa.