¹ Yeeso naa Kubrubaiya ullə ipu popsa naa Urusalima sə i ree Betafaazi, yiiga zaitunnakrə, sai Yeeso tom Kubrubaiya ulləi ittikə. ² Doosi bonge ren dəlla mu'ka elirə, reksəkaa iik i oksək Gumbaaz pu maanarə eri naa waza ulləz eri, bintən waa Gumbaaza ezi i kamtu. ³ Uza na doosun una, doosunu inge, 'Dangwanzi iiwu,' maza rooz etkunnu naa gbaku" ⁴ Sei doosi bonge ina i doo anabirəzzənni yi'səka ri'ak. ⁵ ''Doosun nuuza Sihiyoonaz, 'Ogum, gwanza mooz pu zakrə moorə, punaa kamska zur vomde rə paa.''' ⁶ Sei kubrubai i bo'rə ni Yeesu doosinik. ⁷ I kamtə waa gumbaazi, sə i ummə yallən gumbaazirə paa, sə Yeeso dək, sə gau paa. ⁸ Bansa mariya eyi gənga i umrə yalləna in bilarə paa ullə mu'ka, uri boo idoptə dansa gbonyi sə i gbakri ullə mu'ka səna digdi. ⁹ Sai bansa mari i assə Yeesorə mu'ka wo̱o̱gò sút" "Gee Hosana waza Dauda rəz! ura naa se'səmmazi ura pu zakrə naa ri'ra Daa rəz! Hosana Billə paa!'' ¹⁰ De Yeeso ree Urusalima mariya dəllirəi i saklə yas, sə i doo bonge, ''Neezi az ya?'' ¹¹ Sei iisi bonge, ''Yeeso anabiya Urusalima azzi, buta Galilittə." ¹² Sei Yeeso ree gwaaga Billək rə, re oks mari yingurə gwaaga Billəkrə sə ne̱ni. Sə waagəs gba̱tà̱ iya ipu yingəkrət, naa gəbə boksiya i yingini golii. ¹³ Sə doo bonge gwaaga miik gakp gwaaga wəərəkrək, ama i gwaaga miik ar wo̱o̱naa ruirək. ¹⁴ Sei ruri naa bədi, i zaa gwaaga Billəkrə, se go'si ¹⁵ Ama firissiya gbi'kiyai naa biibai, de i og neta mesəmrət sə i gee yangi i wo̱o̱go sut gee ''Hosana Waza Dauda rəzzə,'' sei baar sugi. ¹⁶ Í doosu bonge, ''A gee gen ina mariya ai i doon ya?'' Yeeso doosi bonge, ''Oo! Ri'ak mooi ii i me'ɗe zangəka paya? waa yangiya woomrəirə su'rozi nooskaa wessak paya?'' ¹⁷ Ruu daayi ri'gə dəlla Bitaniyallə sə ree kitə ru' taarə. ¹⁸ Ubla gbo'təkarə gə dəllirə sai wodu gomu. Sai oktə rúmb sə ree roo, ¹⁹ oks rúmbì reu pa dangti kotto. Sai doosə te' rúmbi gee kaa reu gəbən pa, ni eki sai rúmbi kos mu'ka. ²⁰ De Kubrubai i og inni sei mesəm kami, sə i doo bonge, ''Go'rə riga sə rúmba au kos ri'ak mu'ka ya?'' ²¹ Yeeso bagi bonge, ''zəma zə' Npu dooskəndə ina punaa eska timr, sə tím ina sinkənsəna pa, i bo'ok ina N bo'sə te' rúmba au kotto pa, ama I le'ek len dooska yiig, 'Naa ruu sənarəde ar ɓo'narə,' bo'ruk ri. ²² Koo anya ina oorə wəərək rə roo i kinkən. ²³ De Yeeso tor rora Billəllə pu kubruskəndə, sai do'ga mari naa firissiya gbi'kiyai zaa Ullə sə i desu bonge, ''Naa gbi'kəma pammi sə bo'ro neta ri'at ya? neezi eta bilaa rook ya?'' ²⁴ Yeeso doosi bonge, ''Mii bən N deskən den des muso, ina Iisé pu sə n doosun bilaa miirə kubruskəna rək. ²⁵ Batismaa Yohana rəz gə keetə oraya? keetə Billə ya koo marirə ya? Í wi'gəs gwanrə te'ka engə, ana angə keetə marirə dooska bonge nok an sə à esə timr ullə paya? ²⁶ Ama ana doo angə keetə marirə, ser kamnaa mariyi nok Í meemen Yohana Saarəzi. ²⁷ Í doosə ́ é meepa, úr bo doosi bonge mii bo n dooskə bilaa n bo'run neta ri'at pa. ²⁸ I og rigaya? maz uza ounaa yangi ittikə, sai ree doosə ura do̱o̱nzaz gee rem a kamtə to̱ms ó'ka, ²⁹ sai wazzi bagu gee n rek pa ama sa'kaa roozo sundo sə ree. ³⁰ Sai Daa ezi ree waza muzozzo, doosu paka mukok, wazzi iisu gee n rekren Daa, sa'kaa roozə. ree pa. ³¹ Waza pazzi yangiya ittikə airə te' sə Í duu paka Daarək ya? Í doosu gee séénza ezi. Yeeso doosi bonge zemazi npu dooskəndə mariya Í kwee sookai naa kima'ki, Í artəkən amn rakarə Gwanta Billəttə. ³² De Yohana zaa iirə I naa Bilaa oomək i kwe̱e̱u pa, de mariya I kwee sookai naa kima yaari. Yas naa ri'ik i kwe̱e̱u sə i essə timr ullə pa. ³³ Ke'en to' re'sa pak ukarə, maz uza pii sə də'rə teta innabi rət, sə daasə baabai uri ina gwensəbo, urboo ri'gə genum but utarə ar ye'na sə lo'te haa. Də ɓəlla akpa nenaa te'tirəi. ³⁴ Gə tomtə sənza ulləz mariya eirə nok iina etu nen inaabiya ii oosa pui. ³⁵ Ama baabaiyi ii pe' seniya ulləi ii ɗu' uza, ii eu uza, sə ii toogə urri. ³⁶ Gəbən mazza naa baakaz tomtə səni urri ii ar an səniya maakai, baabaiyi ii goosi ni i goosə səniyei, ³⁷ Sa̱a̱ka roozə mazzi tomtə wazza gwandəz gwanirə, bonge, leegə i esku gbikəm. ³⁸ Ama de̱ baabaiyi ii og wazza gwandəz ii doo gwanirə te' ura peek bint az uza az, zan a eu sə bint naa seesa an. ³⁹ Ii peu , ii kossu baakirə saaka sə eu. ⁴⁰ Ri'ak gə maza naa baak ezi naa zaagə bo'ok baabaiya ai rigaya? ⁴¹ Mariya eyi Í doo gee zak sə ɓəsək mariya eyi baar sə ibdisi, sə asə baa uri iya i kamtuku ⁴² Yeeso doosi bonge, Moi ii I me'ɗə zangəka rababai paya? 'Billa wombai i mu'sal uli billa gau wessal we'el womlə te'kan to̱msa Billəssə. Mo iirə bo ina messəmrrəni. ⁴³ Noka riik n pu dooskən də, gwanta Billət peesək zok iirə sə ii bəsek menki uri,iya i kamtuku rentei. ⁴⁴ Mazza kasə billirəə paaz kagəsək wekilwee, ama mazza billi kasu rəz namsuku ni zummak. ⁴⁵ De firissiya gbi'kiyai naa Farisaawai i gee re'sa pakki i meegəsən pu pakrə iirə paarə zi. ⁴⁶ Ama ina yaa boka kamu, sei i serum bansa mari nok i pe'əu ni anabizak.