¹ Bəlla i dingən Yeeso Baitalaami a Yahudiyattət, dənna Hiridus pin gwantəl, Sei mari uri iya i me̱e̱ zosii i ke̱e̱tə diga di' rekarə Ursalima sə i doo bonge, ² "Ura i dinŋu ezi pu ara gwanza Yahudaawairəz? No̱k e og zosiya ulləi di', ee bən è zaa nooskurə." ³ De Hirudus gwanz gee ri'eri sei baar sugu haa, naa iya ipu yam Uruselimai yas. ⁴ Hirudus to̱o̱gəs firissi naa biibaiya marirəi, desi bonge, "I dingk Kweebaaza rooz ara ya?" ⁵ I doosu gee, "Baitalami a Yahudiyaz, no̱k pu biisinən ni anabi doonnak, ⁶ 'Moo, Baitalami, buta Yahidiyattə, apu topa gwaniya Yahudaawairə paa, Moorəzi gwant ke̱e̱tək ura gakp neebaaza mariya Israilai rəz."' ⁷ Sei Hirudus der iya i me̱e̱ zosi eyi lo'ti sə ii desi bəlla zosiiyi i gbətənak. ⁸ Sə tomi Baitalami, bonge, "Ri'gən i laatə waa wazzi. Ina kintu i zaa doose, no̱k mii bən n zak sə n noosu." ⁹ De i gee gwanz i kam bilaa iik, sei zosiya i ogti di' ei assirə mu'ka sə ree de' ara wazzi piin akrə. ¹⁰ De i og zosiya eyi zok yagi go'ma. ¹¹ De i tor gwaagire i oks wazzi naa maiya ulləz maryamu. I gu' dii sə i noosu, i gberə ɓunta iit sə i esu, zinariya naa luban naa yaluwa wenzu rət. ¹² Bil gbəsi rudumrə bonge, kaina gəə Hirudussə pa, sə i ri'gə ri'gitta iit buta gwanirəttə bila ukarə. ¹³ De i ri'gəpu, sei malaika gbəsə Yusufu rudumrə, doosu bonge, "Ruum paa, Pe'em wazzi naa maiya ulləz, sə i ri'gə Masar gamn arkirə sei mina doosun, no̱k Hirudus laak lan wazzi sə bo laasu." ¹⁴ Tuksa esirə Yusufu pe' wazzi naa maiya ulləz i rigə Masar. ¹⁵ Sei gau eri haa Hirudus wər. No̱k yi'iska paka Daa Bil doo anabiya ulləz zə, "N der wazza miiz diga Masar." ¹⁶ De Hirudus og mariya ai i yiisu be'ru wi, baar sugu go'ma go, sə tom ina ibdəs yanga yara mariya ipu Baitalami naa iya ipu ɓapsarəi diga wi' ittəi rekarə dii, ni riin bəlla mariya ei i doosunuk. ¹⁷ No̱k yi'iska ina Irmiya anabi doon, ¹⁸ "Gwera gee zok Ramah, wəra na waggəl go'ma go', Rahila go̱' no̱k yangiya ulləi, mu'us ka'kaa marirək, no̱k yangi i piipa." ¹⁹ De Hirudus wərpu, sei malaika gbəse Yusufu rudumrə Masar doosu bonge, ²⁰ "Ruum a pe' wazzi naa maiya ulləz sə i ri'gə buta Isra'ilattə, no̱k mariya i laa ikkpa wazzii i wərapu." ²¹ Yusufu ruu sə pe' wazzi naa maiya ulləz, sə i zaa buta isra'ilattə. ²² De' gee Arkilawus uzi kwe gwanta daaa ulləzzət Hirudus, ser kamu rekskarə arkirə. De Bil dinsu to' rudumrə. Sei ke̱e̱ rekarə buta Galilittə. ²³ Sə re̱e̱ gau buta Nazarattə no̱k yi'iska ina anabi doon bonge, i derku maza Nazarattaz.