¹ Sinkənka naa dinkənkaa iirə te'ek keetə diga araya? Keeto diga e̱nkuwa ində iika zullə pu gwaalə ində te'etə pa ya? ² I ii, i kinə pa. I iu zur sə i kweerə, ama i le' kinka pa. I gwaarə sə i sinkənka, naa riik i kin pa nok i oorə pa. ³ I ooro, i kin pa nok i ooro naa sundumeya i go̱'pai, nok i kamkpən toms bilaa ində e̱nkurəkrə. ⁴ I ruiya yaari naa ki'rəi" I me̱e̱ inge gwans naa dəl mu'uska Billi pa ya? No̱ka riik, kala ura ii gwans naa dəllaz, yesapu zura ulləl keereya Billəz. ⁵ Koo i sundo inge ina rababaaz doon pu rii pa de doo bonge, "Rumsa de'es aarə zokrəs pu keerəssə nok aa". ⁶ Ama Bil esə en go̱'num genŋa gwanki sə rababaaz doo bonge, "Bil mu'us iya i təg zurai ama esə go̱'num iya i tiis zurairə." ⁷ Nok riik, esən zuta iit Billə. Mu'sun seetan, no̱kno̱n diga iirə. ⁸ Səətən Billə, ur gə səətək iirə. Ne̱ksən nata iit, iya naa hakkeiyai sə ne̱ks timteya ii, iya naa timte ittəkəi. ⁹ Baar na gomun, sə i go! Bitta iit na yer gomta baar wi, yaksa zoka iik na yer yirku wi. ¹⁰ Tiisin zuta iit Daa Billə mu', təkən paari. ¹¹ Kai pagrə ne̱t ində paa pa uriyangi. Ura doo una ur waz uzarə koo ze̱e̱sə ur waz bisaz paksapu dookairə sə ze̱e̱s dookaiya Billəi. Mona ze̱e̱s dookai, mooa a duu dookazzi pa. ¹² Maz muzəzi ura esə dookai sə ze̱e̱s bisaz. Uzi le'ek sə wo̱'o̱s koo kees. Mo̱o̱ ne̱e̱zi sə a ze̱e̱səkə do̱o̱wiya mo̱o̱z bis ya? ¹³ Ke̱'e̱n to', iya doo inge, "Wonka koo bo'ta e rek dəlla allə sə e gaptə wir mulə roo, sə e bo̱'tə yingu, sə e kin baksi." ¹⁴ Ne̱e̱ me̱e̱ ina bo̱'rəmka bo̱'tanya, gə zəngsa mo̱o̱s anniya? Nok a goopu ko̱liya i gbor to̱pa sə i ra'səmmai. ¹⁵ Goptəra riik, doon inge, "Daa Bil na kamee gə, e bo̱'o̱k an naa an. ¹⁶ Ama rikak ipu təg zulle naa ina i ii bo̱'kan. Təka zura eli e̱nkuwi. ¹⁷ Nok riik, ura me̱e̱me̱n bo̱'ka ina wessan sə bo̱'rə pan, hakkeiyi ullo paa.