¹ Mari gənŋazi sə i gakkp lami pa, uriyangiya mii. A me̱e̱me̱n a kink bisa gbi'sas gə. ² Nok aa yas a dəu dənt bilət somaso'. Uza na dəu də' paka ulləkrə pa, ur maza wessazzi, ura le' kamska zoka ulləkaz. ³ Ana tossə pirme labangal iirə suttə i bo'rə ina a iin, sə a yedə zoŋna iin. ⁴ Gwenən gəbən jrigiya maamrəi, koo de pu gbi'ziz sei zaka wiita sə pe'i ama i ru'i naa waa siteeri sə yer ara ru'baaz iin yerkənikrə. ⁵ Rii gəbən me̱e̱l pu waani zokrə, ama bo'rə ne̱ta gbi'tat. Gwenən ni yama gbi'kak du'un zok naa waa ye̱ntərak. ⁶ Me̱e̱l pu ni ra'ak, ar gapta hakkeirə gau zokrə te'ek laas zok yas sə gaps ra' bilaa zəngsəkrək. Ur naa zura gwandəl i gaptə ra' diga gwaaga ra'rəkrə. ⁷ Kala do̱'ne̱ta wo̱'sət, noi, naa ne̱ta gou baar buttət, naa ne̱ta gau gbonarə te'et maz le' len kangbuka, ⁸ ama ura le' kamgbuska me̱e̱laz pii pa; yi' pu naa e̱nku naa imsa iuwas. ⁹ Naa me̱e̱li a no̱o̱sən Daa Bil, gə naa gwanki a kamun mariya i womi goosa Billəssəi su'. ¹⁰ Sə̀'sum naa kamkpna su' keetə su' a mukəkrə. Uriyangiya mii, kana bo̱'rum rii pa. ¹¹ Dur maama muməm keesken maama tinŋəm naa a zogəm ya? ¹² Uriyangiya mii, te' rumb le'len keeska ne̱na inaabi, koo inaabi reptə te' rumbrə ya? Rii gəbən dur maama na mandam le' səkska maama tinnŋəm pa. ¹³ Ne̱e̱zi ɓe'enzəz iirə te' naa me̱e̱gəska ya? Mazzi naa yii gapta wessat naa bo'ka tomteya ulləi naa tiiska zura keetə diga hikimarəl. ¹⁴ Ama ina pu naa keerəsa go̱'pas naa iika zur iirə timterə, kai ka' do̱o̱t sə i pak songb gongarə paa pa. ¹⁵ Hikimaa az a tiitə diga billə paazi pa, ama a dəlləzzi, a rums pi roo paz, a zamrəz. ¹⁶ No̱k ara keerəs naa iika zur pinnak, roozi sakləka naa to̱mteya i go̱'pai i pii. ¹⁷ Ama Hikimaa keetə billə paaz pu ookapa, naa gapta wessa iikənkənarət, teg zur pa, yi' naa yirku, naa yangiya wessai, yiisə mari uri be̱'sum pa, doo gonga. ¹⁸ Ne̱na go̱'numrəi i rug gapta wessat nok iya i bo̱'rə gapta wessatai.