¹ Uriyangiya mii, kai duu go̱ngaakumma Daa Yeeso Kweebaaz, Daa a darajarǝz naa be'sum pa. ² Maz uza na ree ara i tookǝnnakrǝ naa yalǝna wessan naa ma'za kangeerirǝz na'rǝ; sə gə ura naa zaamaz na tor naa yaləna wiisapun, ³ kai gən hakkilo ura naa yalən ookapa ezirə sə i doosu bonge, "Useni gawum ara wessa akrə," sə gə i dooso ura naa zaamaz, "Moo de'em aa eri," koo "Gawum miirə dəntə dii pa." ⁴ Ina bo̱'rə rii i ze̱e̱s bissi ində te' sə i yer ze̱e̱sba biseiya naa sundumeya i go'pai pa ya? ⁵ Ke̱'en to' uriyangiya n iini pai, Bil te̱e̱gə maza naa zaam dəlləz sə yer maza naa na' eska timlə sə pe' ɓinta gwanta Billə i bo̱'sə iya i iuwai alkawalaz pa ya? ⁶ Ama i saasapu iya naa zaamai! Iya naa na'ai iiyi i ɓəsen baar sə i gobdən ar bissə pa ya? ⁷ Iya naa na'aiyi i doo səəra pak ri'ra wessa i de̱rnənnallə pa ya? ⁸ Naa riik yas, ina duusapu dookaa Billəz ni i biin rababairə bonge, "Iim doowiya mo̱o̱z ni zura mondəlak," i bo'rəpu wessa. ⁹ Ama ina ii irəm mari uri som, ipu bo̱'o̱k hakkeirə, bis kamsən pu ni iya i ka'as dookaiyak. ¹⁰ Ne̱e̱yaa duu dookai yas ama sə deu də' naaz uzarez pu naa aibeiya ka'aska dookairez! ¹¹ Nok Bil ura doo bonge, "Kai ruure ya'az koo kiiza mazzəz pa," gəbən doo bonge, "Kaa iu zur pa." Mona ruure ya'az koo kiiza mazzəz pa ama mona iu zur, a ka'sapu dookaiya Billəi. ¹² No̱k riik pagən sə i bo̱'rə ni iya i ze̱e̱ski bis naa dookaiya faskarəiyai. ¹³ Nok bis zaa naa oka yirku pa iya i og yirku pairə. Yirku le'eslen bis! ¹⁴ Uriyangiya mii, anni go̱' uza na doo bonge bopu naa eska timr, ama toms pu roo pas ya? Eska timr keeskuken ya? ¹⁵ Misaalu ur waz uzaa ya'zaz koo kiizaz na ii yalən na reka rek nittə ni'ik, ¹⁶ sə uza iirə te' na doosu bonge, "Rem oomi, ma'sum zok sə a reg rek oomi." Mona esu una ne̱ta iitə pa, anni go̱' roo ya? ¹⁷ Rii gəbən eska timr naa zura ulləl napu naa toms pa, pu wərkək. ¹⁸ Uza gəbən dook bonge, "Apu naa eska timr, mii pu naa toms." Ge̱e̱se eska timra mo̱o̱re toms roo pal, mii n ge̱e̱sika eska timra miirə naa tomsal. ¹⁹ A essəpu timr Bil pu muzə, pu wessa, ama mai bən i esə en timr sə i ning enirə paa. ²⁰ Mo̱o̱ mə'sas, a ii me̱e̱ka ni eska timr toms napu roo pa pu kottok ya? ²¹ Domdaa aaz Ibraahim gə i zanu nok toms pa ya? De esə waza ulləz Ishaaku bagadirək? ²² A og pu eska timr naa tomsa ulləs, gə naa toms eska timra ullol kin ina iin. ²³ Rababaaz yi'is de doo bonge, "Ibraahim esə timr Billə, i ge'u ni maza naa go̱'nummaz." Nok riik i de̱r Ibraahim vereya Billəz. ²⁴ A ogpu nok naa tomsi sə maz kin gbiska, naa eska timr kotto pa. ²⁵ Rii gəbən Rahap taranbantaaz toms gbisu, de kwee tombai sə keesni bila uka pa ya? ²⁶ Ni zok rums na pii pa wərkik, rii gəbən eska timra toms pu roo pal pu wərkək.