¹ Zan rikak iya ipu naa zaudii, go'on paari nok ɓərka baara i torkal. ² Zaudiya iiz womsapu, yaləna iin rəərə́əz resapu. ³ Kangeeri naa Azurfaa iiz yerpu ina zukan, kuuska ullok esək seedaakum iirə paa sə reg zoka iik ni ra'ak. I laksapu zaudiya iiz zuk ru'a ɓamnarəirə. ⁴ Geen, wo̱raa toksa tombai iya i togi pai rektəpu miirə - toksa iya i pe'sən ne̱ta o'ot gwa i kangbusas reksapu Daa Billə. ⁵ Ipu gapnarə tingnumrə dəllə te' sə i tos zuta iit ne̱ta go̱'pattə. I su'sapu zongna iin nok ɗe'eska. ⁶ I wo̱'o̱s sə i iu maza naa go̱'numaz. Mu'sən pak pa. ⁷ Nok riik, gbo'on timr uriyangi haa zakaa Daa Billəkrə, ni baabaaz zo'on ina ta' o' on naa gbo'ka timrak haa sei maama se̱e̱mam naa a bamsənarəm na langtək. ⁸ I bən gbo'sən timra iil, nok zakaa Daa Billək rektəpu. ⁹ Uriyangi, kai go̱o̱mo ində te' pa nok i ze̱e̱skən bis. Gwenən, ze̱e̱sba bis pu de'narə sugognarə. ¹⁰ Misaalu, gwenən ɓərka baar naa we̱ngska zoka anabaawaiya Billə i doosə mari pak ri'ra Billəlləi. ¹¹ A de̱r iya i wengs zokai, "Iya naa sə̀'səmai." I gee gen we̱ngska zoka Ayuubarək, gə i me̱e̱me̱n daliilaa Daa Billəz Ayuubarə paa, ni Daa Bil yi' na yirkuk. ¹² Ina ara go̱'karən uriyangi, kai gba'tum naa ara billə paak koo buttə diik, koo naa irəm gba'tumka uka pa. "O̱o̱" a iiz na gau "O̱o̱" "Ouwowa" iiz na gau "Ouwo," nok bo̱'ta bis sarən. ¹³ Uza pu ɓərk baalə iirə te' ya? Na we̱e̱rə Bil. Uza pu naa yaksa zok ya? Na zin gella nooska Billəl. ¹⁴ Uza pu kunzəz iirə te' ya? Na de̱r do̱o̱niya ikiliisiyarəi, do̱o̱niyi ina we̱e̱rəsu Bil sə ina wo̱o̱su waag ri'ra Daa Billəllə. ¹⁵ We̱e̱rəka maza naa eska timlək go̱'sək kunzi sə Daa Bil ruusu. Na bo'rə hakkei, Bil ra'səskui. ¹⁶ Nok riik doon hakkeiya ii ində te' sə i we̱e̱re Bil nok koo ne̱e̱ya nok sə i go̱'o̱s. We̱e̱rəka Billa ura esə timləz kam kam toms wessa. ¹⁷ Iliya mazzi ni aak. We̱e̱rə Bil bonge maam naa lang pa wi' taaree naa se'er bamburə. ¹⁸ Gə iliya we̱̱e̱re Bil, ara paak gbe'rum sə maam langtə buttə sə mari i kin neta o'ot. ¹⁹ Uriyangiya mii, uza iirə te' na kee bilaa zəmakrə sə uza na gətnu, ²⁰ maza ezi na me̱e̱ ura gətun maza naa hakkeiyaz neta bo'rə go'pattəz gbisapu zəngsa ulləs diga wərk naa hakkeiya geŋnairə.