¹ Amma koo dokaa seenkak punaa ar nooska dəllə roo no̱k duuka noosəkaa rook. ² No̱k ror pii okapa no̱k gakkpən rora gokallək i der arki ar go̱'nəm, arkirə ina de'eska fitila rən pii, na tebur, naa burodiya yiikarəz. ³ Popsa naa yaluwa soknarə ewi ror ula pii, i der ar ookakək. punaa bagadi a zinariya rəz no̱k ina dəətəm rən, naa gəbən sanduki a dokarəz, ⁴ pu gwe'kanən naa zinariya rəllə punaa koora zinariya rəz naa manna, naa gbalaa Harunarə suktə tagsak naa bille a dokarəi. ⁵ Sanduki a dokarəzzə paa, punaa cheriboma naa gbi'kəmaz, gbe'eskanən naa zəngsa yirkurəz, ina an yas e le'ek sə e doosən munə mu' pa. ⁶ De' i go'rus neta eti, firistii i tor rora gokallə koo bənaya no̱k langsi. ⁷ Amma firist a gbi'zaz tor rora ittəllə də muko willə, naa kwaal no̱k eskarə, gwandə naa mariya i bo'rə hakkeiyai rə i mee pai. ⁸ Rumsa Billəs pu yiikrə gee bila pii amma rekarə ara ar ookarəkrə pa no̱k rora ookapa goka al pii asə. ⁹ Ina an riigəskaki zamanuwa azzə. no̱k pat esək naa hadaya, a wongka e esə at ii ipunaa gbi'kəma i ɓamsək ura wər as gwandə timlə pa. ¹⁰ Amma ina an rekarənni naa ina bo'karən naa nekska ina zok iin anni, bako a pənnan na za. ¹¹ Kweebaaz zaa ni firist a gbi'zaz neta wessattə. Sei tor tent a gbi'ta gbi'it a maz go'ri naa na'a ulləi pai, a dəllə roon pan. ¹² Naa kwaala buirəi naa a yanga negirəi pa, amma naa kwaala gwandəl sə tor ara ar ookakrə də muko no̱k an yas sə a kinə kweeka ɓampakrə. ¹³ No̱k naa kwaala buirei naa a yanga negirəi naa kuka maama i zaasapu diga tam dəm iya i markənpu naa Bil no̱k nekska zok, ¹⁴ Dən riga sə kwaala kweebaazzəl, rekarə Rumsa ɓampassəl esə zura gwandəl naa aibe pa Billə, ra'səs temtiya ai no̱k tomsa wərkrəz sə a noos Billa naa zəngsal ya? ¹⁵ No̱k a anni, tor te'ka dokaa pəzzazzə. Ri'zi boo, wərk gapsapu no̱k kweeka iya dokaa senkakrəi hakkeiya irəirə, iya i derii boo i kweek alkawalla binta ɓampassəm. ¹⁶ Doka pii ni ina a iinak. Paka ina iindəkrə, no̱k ma'kəna kamkpa toms, doole uza yiik ura go'rəz wərpu. ¹⁷ Sei ura doo ina iin na wərpu sə ina roon ma' toms. Ma' toms pa ura rooz na punaa zəngs gə. ¹⁸ No̱k ri'ik Bil tos dokaa seenzaz tomsə naa bilaa do'nettə kwaala i wuu firist naa esə hadaya ge. ¹⁹ Sa'kaa Muusa doosən Israilaawai koo anya ni Bil doon ulle dookairək, pe' kwaala yanga negi rəi naa a buirəi sə daksi naa maam. Ig yaluwa ulləu kwaala eirə sə waa kwaala rool rababaaza bille dookairəi. Sə waki marirə paa. ²⁰ Doosi bonge, "Kwaala alli dokaa pəkkak a Bil esən i duukii." ²¹ Riizi gəbən, faa kwa'a rooi tentə naa kala anya a i kamən toms arkirən. ²² Naa wakəka kwa'a aiyi sə i neksən koo anya. uni ina doo zok Billə dookairə. Kwaal na wuu ina de'es do̱'in, Bil ra'sə hakkeiya mariya ei pa. ²³ Naa bilaa hadaya rək to̱o̱ton ara firist neksəkən neta yii ina kweebaaz bo'rə paarin. Amma Bil neksək neta pu Billə paat naa bilaa ar hadaya iit. ²⁴ Kweebaaz tor ara ar ookare marii go'rək pa, goptəra ri'il, tor Billə paa no̱k gakkpa Billə mu' no̱k aa. ²⁵ Tor arkirə no̱k eska zura gwandəl dən gənɲa pa, ni firist a gbi'zaz bo'rənak, ura tor ara ar ookakrə wir naa wir naa kwaala urirəi. ²⁶ Naka a anni gə ka torpu dən gənɲa diga ma'ka dəl. Amma ri'ak də muko zi tan yiik zok dəl ɓamnarə sə pe'sək hakkei no̱k eska zura gwandəl hadaya. ²⁷ Mari yas i wər də' muko, sa'kaa roozə Bil zeeski bis no̱k hakkeiya ii. ²⁸ Riizi gəbən, Kweebaaz za wər də muko, Bil yesu hadaya səna bər baar no̱k mari gənɲa iya i bo'rə hakkeiyai. Gətək dəllə te' ittəza roozə, naa no̱k eska zura ulləl hadaya pa no̱k iya i bo'rə hakkeiyai pa, amma no̱k sə keesəkən iya i zo'uwai.