¹ No̱k dookai i yii ina wessa Bil eskaa mu'un pa. Dookai i pii ni zəngsa una sommandən. Mari ina zaa noosək Billə naa hadaya irəm a kala willəz, i meddək gakkpa fem pa. ² Bil na ra'sapu aibeiya iya i kamtə hadayai, i og zura iil iya naa aibeiyaiyi es pa. Ika daapu eska hadaya! ³ Zəmaa rooz uzi i esən hadaya kala wir sundusinən ipu naa aibei no̱k hakkeiya ii. ⁴ No̱k ri'ik i me̱e̱gəsapu koo ina esə hadayaa do'nettəz ni nega yaarii koo bui Billə, koo na og kwaala ii wuukrə, eni le'kənaa gakkpa mariya na aibeiyai pa. ⁵ Gwanki de Kweebaaz pu zakrə dəllə te', doo bonge, "Esəkki koo hadaya a ii pa. Amma zoka a go'rə no̱k mii. ⁶ Esəka du'ka hadayarək koo hadaya no̱k hakkei uki goosa pa. ⁷ Sə doo bonge, 'Gwenəm, Npu ang, ni pu biisinən miirə paa rababairə mina bo'rə ina a iin.''' ⁸ Seekarə doo bonge, "Hadayazi, koo esək, koo esəka du'saput koo hadaya no̱k hakkeiyi a ii pa. I goosa pa ves.'' No̱k irəm hadaya azzi i esə dookairə. ⁹ Sə doo bonge, ''Gwenəm, Mii aa az no̱k bo'ka ina a iin.'' Pe'es kubruskəna seenzaz no̱k go'rəka kubruskəna gbo'təz. ¹⁰ No̱k a anni sə i neksaa eska zoka Yeeso Kweebaazzək an yas. ¹¹ Ni firist de'en kala ubla no̱k nooska Bil. Koo bənaya pu esək hadaya munən dən amma a eni le' ra'aska hakkei. ¹² Amma Kweebaaz esə hadaya də muko no̱k hakkei, pu gamnarə na' go'naa Billəkrə haa ting ting. ¹³ Pu zo'okrə sei ina yerpu umkeereiya ulləi gwandə dəntə di'. ¹⁴ Naa esək munə gaupu ina wessan haa tingting iya i neksi pui. ¹⁵ Rumsa Billəs gə yiisaa ri', Seekarə doo bonge, ¹⁶ "A anni dokaa N bo'ok naa ii, ublutta at na ar, Daa Bil doo bonge. N tosək dookaiya mii gwanirə temtirə, gə N biiki gwanirə sundumerə. ¹⁷ N gəək sə N sundə naa hakkeiya ii pa.'' ¹⁸ Ri'ak ara ra'səska hakkei piinnak, eska hadaya no̱k ra'səska hakkei pipa. ¹⁹ Nok ri'ik ungwaniya miirə eska timləi, no̱k a essapu timr ina Yeeso ɓams andə kwa' a ulləi i kuu nok aa, a le'eklen reka Billə mu' na geeka sera unarəl pa ullə buugrə. ²⁰ Essapu bila rekarə Bille mu' ni a gakpen tingting naa urak. Bilaa pəkka eki uki Yeeso, ura wər no̱k aaz. ²¹ Kweebaaz uzi firist a gbi'zaz gau gwant mariya Billeire paa. ²² No̱k ri'ik a ree Billə mu' naa timra wessal a esə timr Yeesorə. Uzi yer timteya aai ookapa sə keesaa hakkeirə. Pii ni waa kwaala ulləi aare timterək, ni neksə zongna aan naa maama ookapam. ²³ De Bil bo'rə neta doosaa boo bo'kat yas naa timr mulə, kaa daa duuguska naa dooka ina a esən timran də pa. ²⁴ A de'es bo'səkaa bon netti gəbən. Gə a sundə ni koo neeya le'ek sə wengs doowi zok sə a iikənkə sə a bo'rə neta wessat. ²⁵ Kaa daa tookənkaa aarək no̱k nooska Daa Bil pa ni uri i bo'onak. Goptəra ri'il, koo neeya aarə te' na bagsə doowi gbam. A bo'rə ri' de a meegəs bəlla Daa Yeeso gətkənal rektəpu dera. ²⁶ Ana waas naa leek sə ana bo'rə hakkei de a me̱e̱sapu zəma paka Kweebaazek, hadaya po'kaat pii es pa. ²⁷ Goptera ri'il, a gau naa sera Bil zeeskənaa bissal, sə gə ɓəsək umkeeraiya ulləi baar, koski ra'a ma' haakrə. ²⁸ Kala neeya mu'us dookaiya Bil esi Muusai wərk naa oksku yirku pa mari ittəkə koo taarukə ina doo bonge pu ri' ullə paa. ²⁹ Ɓəska baara gomalli, amma Kweebaaz waza Billəzzi, gə Billi. Uza na mu'us dokaa dogog mu'usapu kwaala ullə kuusii no̱k uraii mazzi na mu'us Rumsa Billəs, ura gau ulləz, ekigə Bil ɓəsku baar wessawe'. ³⁰ De a me̱e̱men Bil doo bonge, "Go'ka naa gbama eska mari ina i to̱o̱n no̱k bo'ka hakkeiyan a miini. N ɓəski baar ni i to̱o̱k." A kam a eki. De Muusa bii, "Daa Bil zeesək mariya ulləi." ³¹ Gakp ina yirkurənni maz na tor Billə na'rə! ³² Sundun naa dəna i seen meekəna oosaa kweebaazək. I wengs timr ɓərka baalə de i ɓər baar, i ree mu' naa eska timr Billə. ³³ Bəl ularə mari də'ən bansə te', i tosən sə i ɓər baar. Bəl ularə i ɓər baar naa uriya i esə timrai iirə ɓərka baalə. ³⁴ Iiyi kottə iya ipu pursunarə no̱k i esən timr kweebaaze'ək paak, amma i bən i kwee naa yaksa zok de iya esə timr pai uri i pe'es ina pisənnan. I kwee rii no̱k ii naa zura iil i me̱e̱men wessa inge ipu naa net Bille paa tingting, neta ar an a i pe'es diga iirət! ³⁵ No̱k ri'ik zok kanaa wəsən pa ina tosən ɓərka baalə, no̱k ina ree mu' naa eska timr Billə, faaskən wessawe. ³⁶ Ren mu' naa buuka timr ullə no̱k bo'ka ina Bil ii ina bo'rən, esken ina doon. ³⁷ Annabi bii rababazə bonge Bil doo kweebaazə paa gee, "Ura n doo minge zakaz zak lo'ok pa. ³⁸ Amma iya miiyi i gau wessai i rek mu' naa eska timr miirə. Na ii sereiyi sə ina daa eska timr miirə, N geek yaksa zok naa ii pa.'' Amma aa mariya i serəmmaiyi pa. ³⁹ Amma aa a esə timr ulləiyi no̱k səna keesaa tingting.