¹ Eska timr uni tabbəskənaa pisə maz na pu zo'ok unarək. Uni kweeka kinka ina maz og dən pan. ² No̱k a anni sə do'ga mariya aai i kin kweeka no̱k eska timra iil. ³ Naa eska timr a mee gee Billi wom dəl naa dooka pak, no̱k ina a ogan bo'tə zok ina piin də pa. ⁴ No̱k eska timli sə Habila esən Bil hadaya ar a Kainurəttak. No̱k eska timra elili sə i zanu gee punaa go'num. Bil zanu no̱k esəka kamtək, noka eki, Habila pii pin pakrə koo de wərapu. ⁵ Naa eska timli sə i pe'es Enoch paari og wərk pa. "Kin zok pa no̱k Bil pe'supu." No̱k i doo bonge zok yag Bil gee tingnuma ullə inagə pe'su paari. ⁶ Eska timr na pii pa ka bo'rum Bil səka gee tingnuma aam pa, no̱k ura zaa Billəz doole esək timr Bil pii, gə faasfan iya i lauwai. ⁷ No̱k eska timli sə Nuhu kwee ina i dinsunu to' bo'rəmkandə diga og pa. Naa eska gbi'kəm naa ser sə wom ɓark no̱k kweeka mariya ullə gwa'ai. Bo'on ri'eki, le'es dəl sə gau pe'ba ɓinteya go'numrəz a zaa eska timləz. ⁸ Noka eska timli Ibraahim de Bil deru duu sə ri'gə ara kweekən ɓintakrə. Ri'gə, mee ara rekənnak pa. ⁹ No̱k eska timli sə gau buta dokarə ginirə dəlləttə. Gau nu'terə naa Ishaaku naa Yaakubu,iya ɓinta iit mutə naa urai. ¹⁰ Bo'rem rii no̱k gwen ina bo'rəmkpa mu'un, kink dəlla gbi'la riibaaz naa wombaaza rooz uzi Bil. ¹¹ No̱k eska timli sə Ibraahim naa Saraatu i kin gbam pe'ka baalə do'gəma iimrə de i pe' Bil punaa go'num, ura doo boo eski wazaz. ¹² Rii gəbən diga mazza muzo wərk dəraz sə zeeu gənɲa keetə. I dag ni zosiya Billə paa naa gə ni wa'rəta su' gbənarəttak. ¹³ Ii yas i wo'əs i kwee ina Bil dooon pa. Goptəra ri'il, de i og sə i raai diga ar ye'na, i ii maraginiyi dəllə te'. ¹⁴ No̱k iya i doo netti i gbəs kaakarə bopu laak dəlla bondo zulləllə. ¹⁵ Zəmagə, inaka sundə dəlla i daal gə, ika kinkin bilaa gətkarək. ¹⁶ Amma ni pinnak, i ii dəlla wessal, waato a Billə paaril. no̱k ri'ik dəgsa zur kam Bil derkirə yangiya Biiləi pa de go'risipu ar gapt paari gə. ¹⁷ No̱k eska timli sə Ibraahim de i gwegu esə Ishaaku. Ura naa yaksa zok kweesapu dokaz es waza ullə muzo təngaz, ura i doo ullə paa gee, ¹⁸ "Diga Ishaakurəzi i der zeeuwa moou." ¹⁹ Ibraahim pe'es Bil le'eklen ruuska Ishaaku diga wərkrə. Riika pak wi, kinsupu gəbən. ²⁰ No̱k eska timli Ishaaku sə'əs Yaakubu naa Isuwa neta zakattə paa. ²¹ No̱k eska timli sə Yaakubu de wərk sə'əs yangiya Yusufurəi. Yaakubu noosi bən gwandə gbalarə. ²² No̱k eska timli sə Yusufu de wərk dera dooso yanga Israilai ina pe' nena booi ina pu ruukrə. ²³ Nok eska timli sə Muusa de i dingnu do'ga mariya ulləi i sumsu se'er taatə no̱k i og waza oozzi, i serəm dookaiya gwanzəi pa. ²⁴ No̱k eska timli de Muusa nootə mu'us derka waza wai kiiza Fir'aunarəz. ²⁵ Goptəra ri'il, teegə ɓərka baar naa mariya Billəi, naa ara geekən tingnuma hakkeirəm ru' topak. ²⁶ Teegə degsa zura duuka kweebaazəl naa zaudiya Masarattəz, no̱k pi'sapu no'a ulləi faaskaa mu'ukrə. ²⁷ No̱k eska timli sə Muusa daa Masar. Serum suksa baara gwanzəl pa, amma wəngs zok naa gwenka ura og zok paz. ²⁸ No̱k eska timli sə kwee paska naa waarəka kwa' no̱k ura wo'gəska yangiya i see dingkii naa pok yangiya i see dingki Israilaawairəi pa. ²⁹ No̱k eska timli sə i ar gbənarə te' wa'rəta kotəntattə paa. De Masaraawai i yaan bo'ka rii, i tums zok yas. ³⁰ No̱k eska timli sə konza Jerikoz kas buttə de i kowu ublut gbansa. ³¹ No̱k eska timli sə Rahap tarabantaaz na mariya ipu yammai i wo' pa no̱k kween mariya i zaa gwenk buta Jerikottək sə i gbisənak. ³² N doo an bən gənɲa ya? Bəl dakske pa mina minge n dook paka Gidiyon, naa Barak, naa Samson, naa Jepta, naa Dauda, naa Saamuyel, anabaawai. ³³ Iya no̱k eska timr i le'es gwant somaso, i kam tomsa zəmas sə i kwee dokaa Billək. ³⁴ I de'es suta kəirət, i ips gbama ra'rem, i seps su' fonkairə, i rumgbə kunt ɓeseɓe', i yer daa yaari ar ya'amrə, sə i tos sojaiya ginirəi i nog. ³⁵ Kitaki' i kin wərkiya i ruusi robaamrəi. ³⁶ Uri i yiisi ɓərka baar, i mu'us ara i faskinik no̱k səbo kin ruuka robaama wessamrə. ³⁷ Uri i fo'i sə i mandi, haa uri i dogi naa sargai i kami ara i gbe'en marikrə. I to'gi naa bile. I margəs uri ittkə naa weeg. I de'rəs uri naa fonkai. ³⁸ I ɓəsi baara ar gbamal, i og dəl goosi pa, i da'rə wo'sə roo, uri i woo yamuttə naa yiimdə naa du'terə. ³⁹ Koo de mariiyi yas Bil kweesipu no̱k eska timra iil dən i kin ina dogon pa. ⁴⁰ Bil bo'rə in una wessa no̱k àà, ina koo ana pii pa a gakp oomin.