¹ No̱k ri'ik de a ko'sapu zok naa irəm bansa mariya sedaakumrəi, a mangs ina mo'aa sə gənnaa sa' sə hakkei kamaa ya'an. A buu timr lemma sə a nog noma pu aarə mu' am. ² A de'es hakkiloo aaz Yeesorə, ura uzi esaa sə bagsaa eska timraz, ura no̱k yaksa zoka pu aarə mu'uk dooszok na wərka vaga raurə paak, ³ moos naa dəgsa zur pa sə gau na' go'naa gwanta Billəttəkrə. Og on ɓərka baara aal. ⁴ De i wengsapu zok naa yaara basuwa hakkeirəu, amma i ɓər baar sə i wər pa no̱k mu'uska enku ni Yeeso bo'rək. ⁵ Kai zins paka Solomon pag waza ulləzzə paak pa, a gookən naa a Bil wengrəsən yangiya ulləiyak gee: "Waza miiz ke'em to' Daa moozə na da'a gə, zok naa wəsa daa na da'a pa.'' ⁶ No̱k koo neeya ura Daa iuwaz da'ku dan, sə go'rəs ura deru a ulləzzaz. ⁷ Bil da'ka dan naa laaka mona wengs zok neta go'mat na kina gə. Bil na da'a, kama pu ni daa kamən yangiya ulləiyak. Dai yas i da' dan yangiya ii. ⁸ No̱k ri'ik dən mona meedə kinka da'kaa Billək ni dààn yangiya ulləi yassak pa, moo waza Billə zəmazzi pa. A pii ni yangiya ruuləiyak iya daa ka'iz pii pa. ⁹ Daiya aai i daaa apin waanik, a noosi no̱k i bo'on ri'ik. No̱k ri'ik doole a go'ok zok no̱k kweeka Bil Daa aarə rumsəz na dààa no̱k sə a gau wessa. ¹⁰ Daiya aarə i dingai i dààa bəl topa ni i og go'ok, ama Bil koo bənaya da'aa sə po'aa goosa ullə ookapassə. ¹¹ Bəlla Bil da' naan, goo ni unaa geekən yaksa zok paan pa. Goptəra ri'il, goma. Ama sa'kaa roozə a oks a kubrusapu una roo. ¹² No̱k ri'ik, goptəra bo'ka ni a yapsənpu rumsək, esəm timr daakaa Billəkrə aska. ¹³ Rem mu' naa duuka Yeeso no̱k iya i esə timr i weng pai i kink gbam sə i daa duuka bilaa Billək pa. I go'sək rumsə. ¹⁴ Yaan si gau gapta wessat. Bo'om ina a le'kan sə a gau oomi naa koo neya gamn naa riisəm ri'erizi sə a og Bil. ¹⁵ Geem uza kana daa duuka Bil pa, ura ogsaa yirkurəz goosa go'pas kana bu'tə mooirə te' no̱k uri kaina gəəsa pa. ¹⁶ Geengen uza iirə te' kana tor laatərlə ni Isuwa yingəsə gbi'kəma ulləm no̱k rekak pa. ¹⁷ De ii pe'ka ɓinta sə'səmrət mu'ka sei i mu'su no̱k kinə sə pu' na' pa. ¹⁸ Ina zak Billə, i okusapu net gənɲa ni mariya Israilai i ogun ge'a siinaiyakrə. I de ge'a Bil doosi kaina pogo pakrə no̱k gwan naa zura gwandəl tiitə pu roo. I og ra' dookrə naa gbam. ¹⁹ I gee do'kaa porarək, sə i gee Bil paktə. Ser Kami gwanki i ooru naa paktə naa gwan gəbən pa. ²⁰ No̱k Bil doosipu, "Maz koo do'net na pog ge'a eki, doole i ipsku." Ser kam mariyi. ²¹ Zəma, no̱k ser kam Muusa de og ina bo'rum ge'ekirən. Doo bonge, "N ning no̱k ser kamsepu wessawe" ²² I zaapu Billə mu' ura gau Billə paaz, rekarə "Ursalimaa pəzzazzə." Pii ni domdaiya ii i bo'rən de i zaa noosək Billə Ge'a Sihiyoonakrə Israila, ara i womun Ursalima dəlləzak. I zaapu ara malaikai ge'em pii pai i pun yaksa zokrə ni i tookənnən yammak. ²³ I kinsapu bansa iya i esə timteya ii, iya i daasi bila ni iya i see dingki sə i bii ri'teya ii Billə paak. I zaapu ara rumsa mariya Billəi i gamn naa go'num nakrə. ²⁴ I zaapu Yeesorə, ura de' aarə naa Billə te' naa kwaala ullə wuu de wər vaga raurə paak. Yeeso bo'rə sə Bil ra'səsaa no̱k kwaala ulləl ar an a Habilarəl. ²⁵ Geengen kai mu'us ke'ka to' Billa pag naa iilə pa. mariya Israilai i gbis bisa Billəs pa de Muusa dinsi to' dəllə te' ang. No̱ka ri'ik aa bən zəma a gbisək pa ana mu'us dinka to'a ipu dinskaarəi diga Billə paai. ²⁶ Dəl lamrəm de pag Ge'a Sinaiyakrə. Amma rikak doosaa bonge, "N lamsək dəl gəbən də' muko, sə N lams billa paal gəbən." ²⁷ paka gee, "Gəbən də' mukok" yii Bil keesək netti dəllə te' sə lams koo anya ina womandə. Bo'ok rii no̱k neta billə paat lamkp pat na see tingting. ²⁸ No̱k ri'ik a iisə Bil Useeko no̱k apu gakprə mariya gwanta una lamsəki pairə. A noos Bil sə a iisu useeko no̱k məsəma ullə gbi'ma ullə gbam naa iikarəm. ²⁹ Sundun Billa a noosal puni ra'a doos koo anya a oopanak.