¹ Ren mu' naa iika uriyangiya moorə eska timləi. ² Kaa zins naa kweeka maragini naa iya ipu ginəmrə paai pa. Mona gbaa maragini, gbaaka maragini mari uri i tiis malaikai naa meekaa iik pa. ³ Sundun sə i po' iya ipu pursunarəi no̱k i esən timrak, ni ipu yam ɓərək baalə zokrə naa iik. ⁴ Yara mari naa kitaki' a kamkpən kiimai ina gbaakən. Bil wo'sək won iya i gau wessa pa koo i ruurə ya'az koo kiiza uzarəz. ⁵ Kai gau naa ninsaa iika weesək koo bənaya pa, gə neta pisənnat na dagsən. Sundun ina Muusa bii bonge Bil doon: "N daaka pa ves; N daak eska pa." ⁶ No̱k ri'ik a dook naa timr mulo ni zinba gel dook, gee, "De Daa Yeeso uzi ura po'ez, Ser kamkpe pa! Marii le'ek bo'oske ina le'kən Bil po'ken pa." ⁷ Dooniya iire rumsei i doosipu pak kweebaazə paa. Sundun naa ni i gamn gapta iit sə i gwegrə ni i esən timr kweebaazək. ⁸ Yeeso kweebaaz as zok pa, ni pin rikakkak, koo bənaya pu ri', gə seek ri' tingting. ⁹ No̱k ri'ik kai dàà mari uri sə ina gou hakkilowa iiz sə i ese timr net utarə som Billə paa pa, neta məsumdə i kubrə eere pat. Misaali, kai daa una sena bo'rən sə i duu dookai somaso ina i rekandə pa. ¹⁰ Dookaiyi i po'kən pa. Iya i kam toms ar bagadirəi kaina reg rent roo pa no̱k ara a noosən kweebaazakki. ¹¹ Sa'kaa firist a gbi'kiyai i kamtənpu kwaala do'neta i ma' no̱k ra'aska hakkeiyak, mari uri i du' zongna roon ara i gawunakrə sa. ¹² Rii gə Yeeso ɓər baar sə wər sugognaa Ursaliimakrə sa' no̱k yerkənaa mariya ullə Billəiyak. Bo'rə eni naa eska kwaala ulləl ni hadayak no̱k hakkeiya aai. ¹³ No̱k ri'ik doole a rek Yeesorə sə a bii; Doole i daak uri sə i də'aa ni doo i də'nu urak. ¹⁴ Dəllə te' ang, aa a a esə timrȧi apu naa dəlla gbi'lal ula sə ar Ursaliima pa. Goptera ri'il, apu zo'ok dəlla Billə paa a gakpən tingting allə. ¹⁵ No̱k Yeeso wərən no̱k aak, doole a rek mu' naa nooska Bil koo an bo'rəmya. Uni gakp ina a eskən zuta aat goptəra do'netal. A de'es zok no̱k dooska uri a essəpu timr Kweebaazə. ¹⁶ Koo bənaya bo'on tomteya wessai no̱k uri sə gə i do' ina pisinnan, no̱k bo'kaa riiki gook ni i esəpu hadaya tinsək Billat. ¹⁷ Duun dooniya ii sə i bo'rə ina i doosunnan de iiyi iya ipu zo'okəndəi gə. Ubla uka i de'ek Billə mu' no̱k sə dook na kweesapu ina i bo'rən gə. Duuni no̱k sə ina bo're'ə tomsa zo'kən dəz naa yaksa zok, kai bo'rə naa dokska muug pa, no̱k ina tosi sə ina bo're'ə naa dokska muug, eni po'kən pa koo topa. ¹⁸ Weerən Bil no̱k mii naa iya epu yammai. N me̱e̱men dən n bo'rə ina tinsə Bil panpa. Npu yaakrə no̱k ii koo bilaa pakrəya. ¹⁹ N oorun weerən Bil naa ningska zok səna pe'es neta le'kəne zaka iirət. ²⁰ Yeeso esaa koo anya, ko'saa, sə neeya ni neebaaza gbi'za bo'sən maiya ulləiyak. Billa gabta wessa timterəz ura ruus Yeeso wərkrə. Naa bo'kaa ri'ik, Bil tabbusnaa dokaa ullə ɓampak naa aa kwaala kuu diga Kweebaazə de wər vaga raurə paak. ²¹ No̱k ri'ik n weerə Bil na esən ina i iin yas sə i bo'rə ina iin, Yeeso Kweebaazə ulləzi nooska ting ting. Na gau ri'. ²² Uriyangiya miire eska timləi, de wasiikaa az a waanizzi n biisunnuu, n oorən i buu timr naa duuka ina n biisinan no̱k wengsəkən zokan. ²³ N ii i me̱e̱ Timtaawus, ungwanza aarə eska timləz kee diga pursunarə. Na zaa ari gbaske mina re gwenkəndə. ²⁴ De'sən dooniya iirə rumsəi naa iya i esə timr ai. Iya ipu Itaaliyai ipu də'əskəndə. ²⁵ Go'num na gau naa ii yas.