¹ Noka ri'ik, kai daa kubrukəna ma'karə paka kweebaazək ekirək, a rekni mu'kak haa ɓapsarəkai gəə sə i kur pokna a timteya roobamrəi pa, naa eska timlə Billə bən. ² Koo naa kubruskəna batismarək, naa pa'ka na,' ruukaa roobaamrək naa zeesəka bissa ɓampas. ³ A bo̱'ogbon neta Bil iit. ⁴ Naka dookaa iya oosa osən də mukəi, iya lellei esəka paarik, iya i kinə Rumsa Billəz. ⁵ Naa ura ulləz paka Billə tingkak naa gbi'kəma wi'a iirə zakrəi. ⁶ Naa ura, gəə sa'kaz, go'rumkpa ara i mukən gomtitik po'ka na'rək, no̱k gəə sə i ɓaa Waza Billəzzi bən sə i dəksu zur te'kate' ⁷ Buta ma' bo'os maama i laasaz koo bonəya, keetətək dokta omit iya i kam tomsi buttərəi sə kwee sə'səma Billəm. ⁸ Ama na bu'tə keptə naa bangsa eli boota pisupa, gbəəgbə baar haa sei i kamkpənu sù, ɓamsənarə doosək don zok. ⁹ Ri'zi e doosapu i naa an uriyangiya gbaanai e meesapu i desapu netta wessak te paka kweeka zəngsək. ¹⁰ Bil ura timr i zinsuku naa tomteya ii yas pu naa iika i yiisuku no̱k riira ulləi laz, ara i go'sən iya ipu okapaiyak, naa haa ri'ak ipu gò̱'kəndək. ¹¹ E ii in kala neya naa bage zok naa go'karə naa gbaksa tok wessa we, haa zakarə bapsəkarə. ¹² No̱k è ii ara i gakpən wərbaiya pa, uma kubrən naa iya i kwee yiisəka dooka re'kak, eska timra iil naa ɓəska baar. ¹³ De' Bil go rə doka naa Ibrahim, sə gba'təm naa gwandəl, de uza aru sə gba'təmsku pa. ¹⁴ Doo bonge, ''N sə'səka naa bən N baksəka zeeuwi.'' ¹⁵ Bilaa ekirə, Ibrahim de ɓəs baar, kwee yi'səka dokaa ekirək. ¹⁶ Zəma zi mari i gba'təm naa ina arin, gba'təmkpa iirek uki yii gakpa pagrəmrə haa ɓamsənarə. ¹⁷ A enirə te' Bil i yiisəkən iya i pe'ek ɓinta dokaa kirrətəi, gəə ika bo'ok kana azzok pa sam, haa sə daksən gba'təmkpa. ¹⁸ No̱k go'num neta ittəmə am a azzok pa an, a ii, Bil meedək sə go'rə songb pa, aa a noktəi sə a kəna ar bo'̀na , a dénaa wessəkənka wessawè sə a kamz ina a batisma to̱o̱ an arə mu'̀ka. ¹⁹ E gbaksapu to', ni anko waa zəngsəz, a de'sapu wessawe, go'mago, uzi bən tor haa yaluwa sugognarəurə. ²⁰ No̱k a yii Yeeso artə torkarə, də gapsapu firist a gbi'zaz haa ɓamsənarə ni Malkisadekak.