¹ Kala firissa gbi'zaz i teegu diga marirə te' i teegu səna gau no̱k ii tomteya Billəirə, sə ina esə esək naa hadaya busuka hakkeirək. ² Na gau ura ɓəs baar naa ri'gəta iya i me̱e̱ unapai naa iya i doo səəru de gau naa iya ipu okapai pa. ³ Nok a an, gabsapu doole esək en hadaya no̱k hakkeiya ulləi, ni ur bən bo'rən marirək. ⁴ Maz kinə gbi'kəm no̱k zura gwandə pal. Gobtəra ri'il, Billi deru, ni Haruna ak. ⁵ Ri'zi bən Kweebaaz pe' gbi'kəm naa zura gwandəl pa sə gau firist a gbi'zaz. Gobtəra ri'il, ama ura pagnus doo bonge, ''Moozi Waza miiz; wonka n gaupu Daa mooz.'' ⁶ Ni doon ar ukarək, ''Moo firist zi haa ɓamnarə gweka ni Malkisadek." ⁷ Zoora pin zokrə rook, Kweebaaz de yoo weerəka ullək naa ooruka orək naa wora wessa we'ek naa meem rekarə Billək, ura kweekuz diga wərkrəz. I ge'u, yii zura gwandəl haa ullə. ⁸ Koo de ur Wazzi kam, kubrə eska gbi'kəm diga i nau ɓe'rurə te'. ⁹ De' gapsapu oomi o' bən, sə gau Kweebaaz ɓamkpa piipazak, iya esu gbi'kəm rəi yas. ¹⁰ Bil desu ni firist a gbi'zaz ri'gəskəna Malkisadek ak. ¹¹ A punaa net gənɲa eka doot Yesso rə paat, ama gomgon rekarə, de' i gau naa mo'kaa ròrək. ¹² Bəlla ri'ak kal too ika gapsapu lami, naa lo'kaa irək, gamn mariya kubrəsənai, I ii in uza naa, kubrəsən ina ma'ka meeka Billək, i gapsapu iya ii bommai, rekaa puna gbam pak. ¹³ Ura boo bommaz yaz meegəskən paka go'numrə eki pa, no̱k ur waa wazzi. ¹⁴ Naa ukarə bo, reka gbam piik, reka mariya re'kiiyi, iya i puna ina go'on naa go'panak, nok i keen kubrəzka sə mee wessa naa keku.