¹ No̱ka ri'ik uriyangiya naa riisəm ai, ni derənnak. Sundən naa Yeeso, manzo naa firist a gbi'zaz a dooka hakkeiya aairək. ² Sen Bil naa timr mulə, ura teegus, ni Musa sen naa timr mulə gwaaga Billəkrə. ³ No̱k i pe' Yeeso ura wessa naa gbi'kəma nooskarək sə ar Musa, no̱k ura wom gwaagaz punaa noosək sə ar gwaagi. ⁴ Kala gwaag uzazi wom, ama ura wom koo anyas tele uzi Bil. ⁵ Musa senza wesazzi Billə gwa, doo don neta bo̱'rumkpat a zaakaz. ⁶ Ama kweebaaz uzi Waza gau koo andəya gwaaga Billekrə. Aayi gwaaga ullək, ana kam gbama am wessa we' naa gapsa to'a kənkarəi. ⁷ No̱ka ri'ik puni Rumsa Oomiz doo bonge: "wonka ina gee gwera ullək. ⁸ Kai wengs timtəya íí pa, ni Isaraila i bo'rən sinkənkənak ni gwegnik doolə roo. ⁹ Ara daiya íí i gwegnek haa, wi' zu' ittə ipu ok timteya miirəkrək. ¹⁰ A eni rəzi timra miil laa naa dəna roon. N doo minge, tomteya íí koo bənaya ipu kanarə i mee billəta miit pa'. ¹¹ Ni N gba'təm suksa baara mindəirə: 'I tork miirə zəngsarə pa.''' ¹² Geen gen, uriyangi sə timra rumsa go'pas kana kinə zok irə te'pa. Timra yesək Bil kurraz. ¹³ Ama wengrəsən zu'teya indəi wongka naa bo'ta haa ubla uka na pii ina der wonka no̱k sə uza iirə te'ka kana wengs naa səərəmeya hakeirəi pa. ¹⁴ A gapsapu iya popsa naa Kweebaazzəi, ana de' naa gbam ullə diga ma'karə rekarə poorot. ¹⁵ A enirəzi i doo bonge, ''Wonka ina gee gwera ullək, kai wengs timteya ii pai ni Israila i bo'on toi yandək.'' ¹⁶ Sei neriya i gee Bil sə i toriya? iya Musa meetən ya'az diga Masaraawairə paya? ¹⁷ Naa neezi Bil baar sugu haa ublut zu' ittə ya? Naa iya i bo'rə hakkeiyai, iya wəngna iin kittə doolə roo zi paya? ¹⁸ Neeyi Bil gba'təm bonge i tork boorə ar əngəskarə pa, naa iya i duu wuw pazzi gə? ¹⁹ A og noka ri'ik ii kinə torka ar əngəska ulləkrə pa no̱k eska timr piipa.