¹ Ke̱e̱ska gə Kweebaaz ke̱e̱sapu. De'sən zok, kaina gənnən se̱nurə dii gəbən pa. ² Gwenən, mii Bulus, npu dooskəndə minge ina ii sə ína nawən, una bakskən Kweebaazzə pa, koo bilaa pakrə ya. ³ Npu dooskəndə gəbən ura ii sə í nawwaz gapsapu doole ullə paa duuk dookai. ⁴ Iya í gbisən pu dookairə ai, í massən pu naa Kweebaaz; i kink go'numa Billəm pa. ⁵ Nok Rumsə zi, naa eska timr, sə a zo' kinkaa go'numrək. ⁶ Ina nawa koo í nawa pa Kweebaaz Yeesorə unani pa, ama eska timli naa gbaaka uni ina aran. ⁷ Ipu rekrə mu' wessa, neezi le'nən duuka gonga ya? ⁸ Paarəkaa ri'eki keetə ura derənazzəzi pa! ⁹ Yiisti a waa finti puus pun zuma burodi rəm. ¹⁰ N tabbəsəm pu Billə mu' n sunduk duuka bila uka ɓes pa, ura ru'gusunaz, koo uzi neeya í zeesku bis. ¹¹ Uriyangi, gəbən minaka pu dook paka nakkparək rəzi gə, nok anni ri'ak sə ípu ɓəskine baalə ya? Naka ri'zi gə billa kamtə dəkkpa də' naa vaga rawal ka pedəsapu. ¹² Íya í gbaagəsənnai boo, n wín íka bər zuta gwanirət. ¹³ Uriyangi Bil dennən sə keesənən pu se̱nurə dii akgə, kai pe' keekska eki sərə yesən bilaa laatər lək pa. Goptəra ri'ik, po'kə́nkə̀n ində te'. ¹⁴ No̱k dookai yas i yi'ispu zok dookaa azzə; ''Gbaam bogreya mooz , ni a gbaan zura mondəllak.'' ¹⁵ Kai gwaarə sə i yerkən deetamenki pa, geen gen kai wo'os zuta indət pa. ¹⁶ Ama ri'gən ri'gəta Rumsət, i se̱'ek bo'ka tomsa zokrəs pa. ¹⁷ No̱k tomteya zokrəi i mu'us mun tomteya Rumsəi, tomteya Rumsəi bən i mu'us tomteya zokrəi. Íí yas i ge̱e̱kən gwanirə te' pa, noka ri'ik i bo'ok neta ində i iit pa. ¹⁸ Ama Rums naa duun ipu bissə dii pa. ¹⁹ Tomteya zokrəi ipu kaakarə: Kima ki'ei, gabta rums pipat, winka go'pak, ²⁰ nooska doi, tomteya təgra rəi, ro'or zug zuk, sutun baar, keerəz, timr ma'sənk, be'səm, markənka, ²¹ War kiis, yaasa bo'rəka nettəs, naa ruuska ro'or, naa irəm neta goo ri'eti. Npu dingskən to'rə, ni do̱o̱ n dingsənən to'ok, iya i bo'rə neta ri'etii i pe'ek ɓinta gwanta Billəttə pa. ²² Ama yangiya Rumsəi gbaakaki, yaksa zok, gabta wessat, ɓəska baar, yirku, go'num, naa eska timr, ²³ tiska zur, naa kamska zok; neta eti yas bis pu ullə paa pa. ²⁴ Iya ipu Kweebaaz Yeesorəi i ɓaasapu go̱o̱sa zokrəs naa iika winkaa go'pakrək. ²⁵ Ana pu gamnaa Rumsəkrə, a ri'gə ri'gəta Rumsət. ²⁶ Ka gau naa təka zur pa, ko laakabə andə te'ka, ko mu'uska do̱o̱mei