¹ Uriyangi, ina kam uza napu bo'ok hakkeirə, mooi iya ipunaa rumsai doosnu rumsə naa tiska zur. Ge̱e̱m ge̱n zura mondəl, no̱k sə kai naa səəra pa. ² Po'kənkən ində te' naa ri'ikki sə i yi'sək dookaiya Kwebaazəi. ³ Ura og zura gwandəl unazəzaz, ur boo unani pa, səərə zura gwandəlli. ⁴ Koo neeya na gwenə tomteya gwandə zulləi zanga, səna kinə ina bo'kən do̱o̱tan, sei na riigəs zura gwandəl naa uza pa ⁵ No̱k koo ne̱e̱ya gumkp gumsa gwandəs. ⁶ Ura i kubrusənu pakakaz to̱o̱ ton ika mar ina wessan naa ura kubrusənus. ⁷ Kaina səərən pa. Bil ina ɓandəskarənni pa, no̱k ina maz ta'an, uni gə pe'tək gwa'. ⁸ Ura ta' dokta ullət go̱o̱sa zokrə hakkeirəs, wo̱'o̱k. Ura ta' dokta Rumsətaz, kink zəngsa ɓampas Rumsə. ⁹ Kaa yaps naa bo'ka tomsa oomis pa, no̱k ana yaps pa a kink zəngs zoora rool na zaa gə. ¹⁰ De apu naa bila, a bo'sə uriyangi neta wessat, musamman iya i esə timrai. ¹¹ Gwenən wasikai gənŋa a n biitənnii naa na'a mindəi. ¹² Iya i íí yiika go̱o̱sa wessa zokrəs iiyi i pi'in ina nau. I bo'rə ri'eri zi nok géé bo'ta i ɓəsbo baar nok vaga rauwa Kweebaazəu. ¹³ Nok ko iya i napsa pui i duu dookai pa. Ama noka ri'ik i íí ína nau, səbo ɗuns kur nok zoka iik. ¹⁴ Ama karə gau n ii təka zur pa sei vaga rawa Daa ààz Yeeso Kweebaazəurə, okaa miikrəgə no̱k ɓaaka Yeesorək sə n ɗons neta dəllət, mii bən sə neta dəllət kee miirə. ¹⁵ Mona nau koo a nau pa unani pa, ama ina ar go'karən gə uni dingkaa pəkkak. ¹⁶ Gabta wessat naa go'num na gau iya i duu dooka azzai, Israilaawaiya Billə zəmai. ¹⁷ Diga ri'ak rekarə mu' uza kana moose pa, nok npu naa se̱'era Yeesorəl miirə zokrə. ¹⁸ Go'numa Daa Yeeso Kweebaazəm naa gau naa rumsa iiz, uriyangi. Na gau ri'.