¹ Nka ri'ik gamn kuburubaiya Billəi, ni yangiya ullə gbaaniyai. ² Sə i gau naa iikənka ni Kweebaaz iinaa sə esə zoka ullək no̱k aa, dəətəma hadayaa wessam Billə. ³ Ama kiima ki' koo ina səərurən, koo iika netta dellət kai sundə iirə te'pa, nok to̱o̱ iya ipu ookapai Billə pa. ⁴ Koo winsa, paka mə'əmrək, koo dakrənka zukkak, nok go'pa. Gobtəra ri'il iisən Bil useeko. ⁵ Nok ri'ik i meegəsapu, kima ki', koo ura bo'rə tomsa səərurəu as, koo ura naa ningsas, (naa ura noos maazaz ipu muyo) ii yas ipunaa ɓint gwaanta Kweebaazəttə naa a Billəttə pa. ⁶ Uza kana səərən naa paka zukkak pa, nok neta etitti sə suksa baara Billəl zak yangiya i weng zulləirə paa. ⁷ Kai daks zur naa ii pa. ⁸ Nok do̱o̱ ii mariya təgrarəiyi, ama ri'ak ii oosaki Daa Billə. Ri'gən ni yangiya oosarəi yak, ⁹ (nok yangiya nen teta oosarət uti ina wessan, go'num, naa zəma) ¹⁰ bo'rən ina wessa Dangwanz iin ak. ¹¹ Kai daks zur naa neta təgrarəttə roopa, ama doorəmi don. ¹² Nok neta i bo'rə təgrarən ina dəksa zullənni go' dookarə pa. ¹³ Ama Koo anya keetə zok oosarən, gbərk gbən kaaka allə. ¹⁴ Nok kala neta gbər kaaka allət oosaki. Noka ri'ik doo bonge, ''Weem mooa rumrəz, ruutəm diga iya i wərairə, sə Kweebaaz okək' moorə.'' ¹⁵ Noka ri'ik gèèn gèn gapta iit, kai gau ni mə'əi pa ama gamn ni iya naa ɓe'kui. ¹⁶ Kamən toms naa bəl nok ru' engkuyi. ¹⁷ Kai gau me'əi pa, ama meen men ina Bil iinak. ¹⁸ Wak kana bo'rənpa, nok kamtə kan neta go'pat. Gobtəra ri'il, yi'sən zok naa Rumsa Oomiz. ¹⁹ Koo bənaya dookənkən ində te' zaburarə, naa ges naa gessa naa rumsassə, zinən sə i noos Daa Bil ində timlə. ²⁰ Koo bənaya iisən Bil useeko neta bo'rət yas, naa Riira Dangwanza aaz Yeeso Kweebaazəllə Daa Billə. ²¹ Esən zu'tiya ii ində te'ka, gɓi'kəmma Kweebaazəmrə. ²² Kita ki', esən yaara mariya ii gbi'kəm, nok i esə Billi. ²³ Nok ya'az uzi zur kiiza ulləzzə ni Kweebaaz boo uzi zur ikiliisiyarə, no̱k Kweebaazi kweeku. ²⁴ Ama ni ikiliisiya esən gɓi'kəm Kweebaazzək, ri'izi sə kita ki' i esək yariya ii koo andeya. ²⁵ Yara mari iin ki'a ii ni Kweebaaz iin ikiliisiyak sə esə zokka ullək nok urak. ²⁶ Kweebaaz esə zura gwandəl no̱k ikiliisiya sə na gau naa riisəm, nok neksupu naa maam paka ulləkrə, ²⁷ nok səbo yii ikiliisiya zura gwandəllə no̱k noosək, naa diks koo wiira pakpa, koo in una pa, ama ookapa naa aibe pa. ²⁸ Ri'erizi gəbən, gəə yara mari ina gbaa ki'a ii ni zoka indəkak. Koo neeya ura gbaa kiiza ulləzak gbaa zoka gwandəkki. ²⁹ Mazza mu'us zoka ulləkaz pipa, ama kangɓə kan zokki gə gbaagban, ni gwan Kweebaaz gbaan ikiliisiyak. ³⁰ No̱k aayi dalətta ullə zokrət. ³¹ ''Noka ri'ik maz daak Daa naa maiya ulləz sə i dakən naa kiiza ulləz, sə i gau zok muko.'' ³² Paka gɓi'ka sə sums zokakki zəma ama npu pakrə Kweebaaz naa ikiliisiyarə. ³³ Koo neeya, na ii kiiza ulləz ni zoka gwandəkak, kita ki' boo ina esə yariya ii gɓi'kəm.