¹ Ii yangi, esən do'ga mariya ii gbi'kəm, no̱k pu oomi Daa Billə. ² "Esəm Daa mooz naa maiya mooz gɓi'kəm'' (uni dokaa seenzaz doksənin), ³ ''nok ri' sə i gau naa sə'səm sə ru'a ii ina ye' dellə.'' ⁴ Ii Dai kai fiiwəs yangiya ii sə baar na sugi pa. Gobtəra ri'il, dingsini to' sə i bi'si naa paka Dangwanzək. ⁵ Seni, duun ina dangwaniya ii a dəlləi naa gɓi'kəm naa ser, naa timra wessal. Esni gbi'kəm ni i esən Kweebaazak. ⁶ Esni gbi'kəm nok oka pa, sə zok na yagi naa ii pa. Gobtəra ri'il, esən gbi'kəm ni seniya Kweebaazəiyak, ura bo'rə ina Bil iin ində timlə. ⁷ Kam toms naa timr mulə, ni ipu seenək Dangwanzək ni marik pa, ⁸ no̱k i me̱e̱men ina maz bo'rə wessan, kweek kwen faasəm Daa Billə, koo senz koo ura i keesuz. ⁹ I dangwani, bosən seeniya ii ri' kai ribdi zuk pa. Nok i me̱e̱men Dangwanza iiz naa a iil pu billə paari, iika zur pu ullə pa. ¹⁰ Gbakskarə, gamn naa gbam Daa Billə naa gɓi'kəma ulləmrə. ¹¹ tə'ən neta ya'amrə Billət, sə i kinə gɓi'kəma ɓiskarəm yiirəya Seetan dəirə. ¹² No̱k yaama aam a zok naa kwaaləmmi pa. Gobtəra ri'il, a gwant naa gɓi'kəm naa zeeska bissa bəlla təkrarəlləz naa rumsa go'pas billə paari. ¹³ Noka ri'ik pe'en neta ya'amrə Billət, nok sə i le' de'ka ublaa enkubairək, sa'kaa i bo'rəpu koo anyas, sə i le' de'ka naa gbam. ¹⁴ Nok ri'ik de'en naa gbam, zəma naa gau doka seega iik, tarnaa iirə gumbrək na gau go'numa iim. ¹⁵ Ni i tə'ən taga dentək go'rəs zok nok dooka paka tingkaa gabta wessattək. ¹⁶ Koo bənaya pe'en goosa eska timləs sə i le' rimsəka ra'a səraa enkabaazək. ¹⁷ Pe'en buleya kweeska zulləz naa fonkaaza Rumsəz, uzi paka Billək. ¹⁸ Koo bənaya weerən sə i oorə gɓi'kəma Rumsa Billəssəm. Kai gbaspa, zo'on iika ullək gbaska roopa, naa weerək nok iya ipu wessa Billəi. ¹⁹ Weerən nok mii, sə n kinə esəka do̱o̱ka pagrək sə n pag naa sərpa, sə doo sumsuka zəmak paka tingkakrə. ²⁰ Nok mii tombaazi dooka paka tingkakrək ura dokdənzəz, nok sə mina pak naa sərpa iirə te', ni to̱o̱n bo'rəka rək. ²¹ Nok ii bən sə i mee ni gapta miit pinnak, ni ipu bo'kəndək, Tikiikus doowiya aaz gbaanzaz senza Billəz, doosəkən don koo anya. ²² Noka ri'ikki sə n to̱mtu iirə, nok sə i mee gapta eet, sə na wengrəsən timra iil. ²³ Gabta wessat na gau naa uriyangi, naa gbaaka, naa eska timr diga Daa Billə naa Daa Yeeso Kweebaazə. ²⁴ Go'num naa gau naa iya i ii Daa Yeeso Kweebaaz naa iikaa ɓampakai.